1 Ndien idahaemi sese, iduhe odu uwem owo ke ofuri mbon mme Nephite emi ekeyikde mme ikɔ kpukpru ndisana prophet emi eketiŋde ndomo kiet; koro mmɔ ema efiɔk ete ke ana nte mmɔ esu.

2 Ndien mmɔ ema efiɔk ete ke akana ɔfɔn ete ke Christ ama edi, ke ntak ediwak idiɔŋɔ emi ekenɔde, nte mme ikɔ mme prophet edide; ye ke ntak mme ŋkpɔ emi etibide kaŋa, mmɔ ema efiɔk ete ke ana edi ete ke kpukpru ŋkpɔ ana etibe nte asaŋade ye se eketiŋde.

3 Ke ntak oro mmɔ ema ekpɔŋ mme idiɔk ŋkpɔ mmɔ, ye mme mbubiam mmɔ, ye mme use mmɔ, enyuŋ enam ŋkpɔ enɔ Abasi ke ofuri ifik uwemeyo ye okoneyo.

4 Ndien idahaemi edikem ete ke ini mmɔ ekemumde kpukpru mme inɔ nte mbon ŋkpɔkɔbi, tutu ete ke ndomo kiet ikifeheke emi mme Nephite mikiwotke, mmɔ ema esin mbon ŋkpɔkɔbi mmɔ ke ufɔk ŋkpɔkɔbi, enyuŋ enam ete ekwɔrɔ ikɔ Abasi enɔ mmɔ; ndien adaŋa nte ediwak emi ekekabarede esit ke mme idiɔk ŋkpɔ mmɔ enyuŋ eduk ke ediomi ete ke mmɔ idiwotke owo aba ema esana eyak ke uwɔrɔ ufin.

5 Edi adaŋa nte ediwak emi mikidukke ke ediomi, ye emi ekekade iso enyene mme ndedibe uwot owo oro ke esit mmɔ, iŋ, adaŋa nte ediwak emi ekekutde nte efimide mme ikɔ ndidikhe nditɔ eka mmɔ, ema ebiom mmɔ ikpe enyuŋ enɔ ufen nte mbet edide.

6 Ndien ke ntem mmɔ ema etre kpukpru idiɔk oro, ye ndedibe, ye mbubiam ebuana, emi ɔkpɔsɔŋ ibak okodude, ye emi ekenamde ata ediwak uwot owo.

7 Ndien ke ntem ke ɔyɔhɔ isua edip ye iba ekebe efep, ye ɔyɔhɔ isua edip ye ita ŋko, ye ɔyɔhɔ edip ye inaŋ, ye ɔyɔhɔ edip ye ition; ndien ke ntem ke isua edip ye ition ekebe efep.

8 Ndien ediwak ŋkpɔ ema etibe emi, ke enyin usuk owo, edidide akwa ye utibe; edi, Mormon ikemeke ndiwet mmɔ kpukpuru ke ŋwed emi; iŋ, ŋwed emi ikemeke ndidɔŋɔ kiet ke ubak ikie eke se ekenamde ke ufɔt ata ediwak owo ke ufaŋ isua edip ye ition.

9 Edi sese mme ŋwed edu emi edɔŋɔde edinam mbon emi; ndien edi Nephi ɔkɔnɔ ibio ibio mbuk akpanikɔ.

10 Ke ntak oro ami mewet ŋwed mi mbaŋa mme ŋkpɔ emi nte ŋwed Nephi edide, emi ekemiŋde ke mme usan emi ekekotde mme usan ŋwed Nephi.

11 Ndien sese, ami ŋwed ke mme usan emi ami nnamde ye ubɔk mi.

12 Ndien sese, ekot mi Mormon, koro ekekot mi edian isɔŋ Mormon, isɔŋ emi Alma akasiakde ufɔk Abasi ke ufɔt mme owo, iŋ, akpa ufɔk Abasi emi ekesiakde ke ufɔt mmɔ ke ini mmɔ ema ekedue.

13 Sese, ami ndi mbet Jesus Christ, Eyen Abasi. Enye okokot mi ete ŋkwɔrɔ ikɔ esie ke ufɔt mbon esie, man mmɔ ekan enyene nsinsi uwem.

14 Ndien ama ɔfɔn ete ami, nte uduak Abasi edide, man mme akam mbon emi ekekpade, emi ekedide ndisana owo, osu nte mbuɔtidem mmɔ ekedide, ewet mme ŋkpɔ emi enamde—

15 Iŋ, ekpri ŋwed abaŋade se ikidade itie tɔŋɔ ke ini emi Lehie ɔkɔkpɔŋde Jerusalem, tutu ɔsuhɔde esim idahaemi.

16 Ke ntak oro ami ŋwet ŋwed mi nto mme mbuk mbon emi ekembemde mi iso edu ekenɔde, tutu ke ntɔŋɔ usen mi;

17 Ndien ami ŋwet mme ŋkpɔ emi ami nkutde ke enyin mi.

18 Ndien ami mɔfiɔk ke ŋwed emi ami ŋwetde edi edinen ye ŋwed akpanikɔ; edi ediwak ŋkpɔ edu emi, nte usem nnyin edide, nnyin ikemeke ndiwet.

19 Ndien idahaemi ami ntre ikɔ mi, emi abaŋade mi, ndien ŋka iso ndinɔ mbuk mi mbaŋa mme ŋkpɔ emi ekedude mbemiso ami.

20 Ami ndi Mormon, ndien nto ata ubon Lehi. Ami menyene ntak ndidiɔŋ Abasi mi ye Andinyaŋa mi Jesus Christ, ke ntak emi enye akadade mme ete nnyin ɔwɔrɔ ke isɔŋ Jerusalem, (ndien owo ndomo kietikifiɔkke ibɔhɔke ekedi enye ye mbon emi enye akadade ɔwɔrɔ ke isɔŋ oro) ndien ke enye ɔnɔ mi ye ikɔt mi ata ediwak ifiɔk abaŋa erinyaŋa ukpɔŋ nnyin.

21 Ke akpanikɔ enye ɔdiɔŋ ufɔk Jacob, onyuŋ enyene mbɔm ɔnɔ ubon Joseph.

22 Ndien ke adaŋa nte nditɔ Lehi enimde mme ibet esie enye ɔdiɔŋ mmɔ onyuŋ anam mmɔ eforo nte ikɔ esie edide.

23 Iŋ, ndien ke akpanikɔ ke enye edifiak ida nsuhɔ ubon Joseph idi ifiɔk Jehovah Abasi mmɔ.

24 Ndien adaŋa nte Jehovah odude uwem, enye ayataŋ kpukpru nsuhɔ ubon Jacob obok, oto ŋkaŋ isɔŋ mbinaŋ, emi esuande ke aŋwa ke ofuri iso isɔŋ.

25 Ndien nte enye ekediomide ye ofuri ufɔk Jacob, kpa ntre ke ediomi emi enye okodiomide ye ufɔk Jacob edisu ke ekem ini esie, ɔnɔ ndifiak nnim ofuri ufɔk Jacob ke ifiɔk ediomi emi enye okodiomide ye mmɔ.

26 Ndien ke ini oro ke mmɔ edifiɔk Andifak mmɔ, emi edide Jesus Christ, Eyen Abasi; ndien ke ini oro ke editaŋ mmɔ ibok ito ke ŋkaŋ isɔŋ mbinaŋ ke mme isɔŋ mmɔ, emi ekesuande mmɔ; iŋ, adaŋa nte Jehovah odude uwem ntre ke edidi. Amen.