1 Ndien ke ini oro ke se ewetde edisu: Kwɔ, O ada, afo emi mukumanke eyen; bumede ke ukwɔ ikwɔ, nyuŋ fiori mkpo, afo emi mukumiaŋake ye uman; koro nditɔ ada ewakde ekan nditɔ ŋwan ndɔ, Jehovah ɔdɔhɔ.

2 Tat ebiet tent fo, nyuŋ yak mmɔ enyanade mme ikpehe iduŋ fo; kutua mbɔm, nam mme uruk fo eniɔŋ nyuŋ nam mme eto fo esɔŋɔ;

3 Koro afo ayasiaha ke ubɔk nnasia ye ke ufien, ndien ubon fo eyeda mme Gentile enyene enyuŋ enam eduŋ ke mme ŋwure obio.

4 Kufehe ndik, koro esuene midisimke fi, kunyuŋ uyak nsia etimede fi, koro afo mudukwe but ; koro afo edifrede but uyen fo, udunyuŋ utihi esuene uyen fo, udunyuŋ utihi aba esuene itie ebe-akpa fo.

5 Koro andibot fi, ebe fo, Jehovah mme Udim edi enyiŋ esie; ye Andifak fi, Edisana Abasi Israel—Abasi ofuri ererimbot ke edikot enye.

6 Koro Jehovah okotde fi nte ŋwan emi ekpɔŋde ye emi ɔfuhɔde ke spirit, ye ŋwan uyen, ke ini ekesinde fi, Abasi fo ɔdɔhɔ.

7 Ke esisit ini ke ami mkpɔŋ fi, edi ke mme akwa mbɔm ke ami ndibok fi.

8 Ke ekpri iyaresit ke ami nkedip fi iso mi ke esisit ini, edi ye nsinsi ima ke ami nditua fi mbɔm, Jehovah Andifak fi ɔdɔhɔ.

9 Koro emi, etiede nte mme mmɔŋ Noah ɔnɔ mi, koro nte ami nkotomode nte ke mme mmɔŋ Noah idifukke aba isɔŋ, kpa ntre ke ami ntomo nte ke ami ndiyatke esit ye afo.

10 Koro ikpɔ obot eyedaha ndien esik mme obot, edi ima mi ididahake ikpɔŋ fi, ŋko ediomi emem mi idisikke, Jehovah emi atuade fi mbɔm ɔdɔhɔ.

11 O afo owo ukut, emi oyobio ɔbɔŋde, ndien ukopke ndɔŋesit! Sese, ami nyenim mme itiat fo ye mme ediye uduot, nyuŋ nnim mme itiat idakisɔŋ fo ye mme sapphire.

12 Ndien ami nyenam mme window fo ke mme agate, ye mme inuaotop fo ke mme carbuncle, ye kpukpru mme adaŋa fo ke mme edifɔn itiat.

13 Ndien Jehovah eyeteme kpukpru nditɔ fo; ndien akamba ke emem nditɔ fo edidi.

14 Ke nnen nnen ido ke edisiak fi; ufik oyoyom usuŋ ɔkpɔŋ fi koro afo udufehe ndik, ŋko ye ɔkpɔsɔŋ ndik koro enye idikpereke fi.

15 Sese, ke akpanikɔ mmɔ eyesobo ɔtɔ kiet ebaŋa fi, itoho ke ami; owo ekededi emi edisobode ɔtɔ kiet ibaŋa fi ɔyɔduɔ ke ntak fo.

16 Sese, ami mobot odomutim emi ofumde ukaŋ ke ikaŋ, ye emi anamde ŋkpɔutom ɔnɔ utom esie; ndien ami mobot andisobo nte owot.

17 Ŋkpɔekɔŋ ndomo kiet emi ebotde ebaŋa fi idikwe unen; ndien kpukpru edeme emi edisuŋide fi ke ubiereikpe afo ayanam ikpe etip. Emi edi unen mme asaŋutom Jehovah, ndien nnennen ido mmɔ oto ke ami, Jehovah ɔdɔhɔ.