1 Ndien idahaemi edikem ete ke ini Jesus ama eketiŋ mme ikɔ emi enye ama afiak ɔŋwɔŋɔde ebine otu owo, ndien ama ɔkubɔre inua esie, ɔdɔhɔ ete: Ke akpanikɔ, ke akpanikɔ, ke ami ndɔhɔ mbufo nte, Ekubiere ikpe unɔ owo, mbak Jehovah edibiere ikpe unɔ mbufo.

2 Koro ubiere ikpe emi mbufo edade ebiere ikpe, kpa ntre ke edibiere inɔ mbufo; ndien udomo ŋkpɔ emi mbufo edade edomo, eyefiak eda edomo enɔ mbufo.

3 Ndien ntak emi afo esede ekpri mbio emi odude ke enyin eyen eka fo, edi ukereke obukpɔk emi odude fi ke enyin?

4 Mme edinam didie idɔhɔ eyen eka fo ete: Yak mi nsio fi ekpri mbio ke enyin—ndien sese, obukpɔk odu fi ke enyin?

5 Afo owo mbubik, bem iso sio obukpɔk ke enyin fo fep; ndien ke ini oro ke afo editim ikut nte edisiode ekpri mbio ke enyin eyen eka fo ufep.

6 Kunɔ mme ebua se isanade, kunyuŋ uduɔŋɔ mme ŋkpɔ uto fo ke iso mme edi, mbak mmɔ idudighi mmɔ ke idak ikpat mmɔ, inyuŋ ifiak iwɔŋɔde iwai fi.

7 Ebeŋe, ndien eyenɔ mbufo; eyom, ndien mbufo eyekut; ekɔŋ, ndien eyeberede enɔ mbufo.

8 Koro kpukpru owo emi ebeŋede, eyebɔ; ndien enye emi oyomde, eyekut; ndien enye emi ɔkɔŋde, eyeberede enɔ.

9 Mme anie owo idu ke otu mbufo, emi, edieke eyen esie ebeŋede uyo, ɔnɔ enye itiat?

10 Mme edieke enye ebeŋede iyak, ɔnɔ enye urukikɔt?

11 Edieke mbufo ndien, emi edide idiɔk, efiɔkde nte enɔde nditɔ mbufo nti enɔ, adaŋa didie akan oro ke Ete mbufo emi odude ke heaven edinɔ mmɔ emi ebeŋede enye nti enɔ?

12 Ke ntak oro, sededi emi mbufo eyomde ete mme owo enam enɔ mbufo, enam kpa ntre enɔ mmɔ, koro emi edi mbet ye mme prophet.

13 Mbufo ebe eduk ke mfafaha inua-otop; koro inua-otop atara, ndien usuŋ aŋwaŋa, emi adade aka nsobo, ndien ediwak edu emi edukde do;

14 Koro inua-otop afafaha, ndien usuŋ esire, emi adade aka uwem, ndien mbon emi ekutde enye iwake.

15 Ekpeme idem ebaŋa mme prophet abiaŋa, emi efɔrɔde ikpa erɔŋ edi etiene mbufo, edi, edi anawuri-ekpe ke esit mmɔ.

16 Mbufo eyeda mfri mmɔ efiɔk mmɔ. Ndi mme owo etet mme grape ke mme ŋkukim, mme, mme fig ke mme mbarekpe?

17 Kpa ntre ke kpukpru eti eto eŋwum eti mfri; edi mbiara eto oŋwum idiɔk mfri.

18 Eti eto ikemeke ndiŋwum idiɔk mfri, mbiara eto inyuŋ ikemeke ndiŋwum eti mfri.

19 Ekpi kpukpru eto emi miŋwumke eti mfri eduɔk, enyuŋ emen esin ke ikaŋ.

20 Ke ntre, ke mfri mmɔ ke mbufo edida ifiɔk mmɔ.

21 Idighe kpukpru owo emi edɔhɔde mi ete, Jehovah, Jehovah, ediduk ke obio ubɔŋ heaven; edi enye emi anamde uduak Ete mi emi odude ke heaven.

22 Ediwak eyedɔhɔ mi ke usen oro ete: Jehovah, Jehovah, nte nnyin iketiŋke nte prophet ke enyin fo, ndien ke enyin fo imibin mme demon isioŋo, ndien ke enyin fo iminam ediwak utibe utom?

23 Ndien ke ini oro ke Ami ndidɔhɔ mmɔ nte: Akananam ami mfiɔkke mbufo, ediaŋade ekpɔŋ mi, mbufo emi enamde ukwaŋ-ŋkpɔ.

24 Ke ntak oro, owo ekededi emi okopde mme ikɔ mi emi ndien anam mmɔ, ami nyedomo enye ye ɔfiɔk-ŋkpɔ owo, emi ɔkɔbɔpde ufɔk esie ke enyɔŋ itiat—

25 Ndien edim edep, mmɔŋ-ukwɔ onyuŋ edi, mme ofum enyuŋ ebara, enyuŋ emia ufɔk oro; ndien enye iduɔhɔ, koro ekebɔpde enye ke enyɔŋ itiat.

26 Ndien kpukpru owo emi ekopde mme ikɔ mi emi ndien inamke mmɔ eyedomo mmɔ ye ndisime owo, emi ɔkɔbɔpde ufɔk esie ke enyɔŋ utan—

27 Ndien edim edep, mmɔŋ-ukwɔ onyuŋ edi, mme ofum enyuŋ ebara, enyuŋ emia ufɔk oro; ndien enye ɔduɔ, ŋwure esie onyuŋ okpon.