1 Ndien idahaemi edikem ete ke ɔyɔhɔ isua efudekiet tɔŋɔ ke edidi Christ, Lachoneus, andikara isɔŋ oro, ama ɔbɔ ŋwed oto ada usuŋ ye andikara mme inɔ emi; ndien emi ekedi mme ikɔ emi ekewetde, ete:

2 Lachoneus, akwa ɔbɔŋ ye ada ibuot mme andikara isɔŋ, sese, ami ŋwet ŋwed emi nnɔ fi, nyuŋ ntoro fi ata eti eti ke ntak nsɔŋɔ-nda fo, ŋko ye nsɔŋɔ-nda ikɔt fo, ke ndikpeme se afo ekerede ke edi unen ye uwɔrɔ-ufin mbufo; iŋ, afo amada ɔfɔn, nte edi ubɔk Abasi aŋwam fi, ke ndikpeme uwɔrɔ-ufin mbufo, ye inyene mbufo, ye obio mbufo, mme enye emi afo okotde ntre.

3 Ndien etie nte ŋkpɔ mbɔm ɔnɔ mi, akwa ɔbɔŋ Lachoneus, ete ke afo emekeme ndisime nyuŋ ntaŋidem ndikere nte ke afo emekeme ndiŋwana ye utɔ ediwak mme okop odudu owo emi ebetde uyo mi, emi ke ini emi ekamade mme ŋkpɔ ekɔŋ mmɔ, ndien ebet ikɔ emi ye ɔkpɔsɔŋ ekikere—Esuhɔde eka ekeŋwana ye mme Nephite enyuŋ esobo mmɔ.

4 Ndien ami, ke mfiɔkde mbaŋa spirit mmɔ emi owo mikemeke ndikan, ke nkodomode mmɔ nse ke ekɔŋ, ye ke mfiɔkde mbaŋa nsinsi usua mmɔ kabaŋa mbufo ke ntak ediwak idiɔk emi mbufo enamde mmɔ, ke ntak oro edieke mmɔ esuhɔrede edi eŋwan ye mbufo mmɔ eyedise mbufo ye nsobo.

5 Ke ntak oro ami mme ŋwet ŋwed emi, ndian enye ye ubɔk mi, koro nkerede mbaŋa unwam mbufo, ke ntak nsɔŋɔ-nda mbufo ke se mbufo enimde ete ke edi nnen nnen, ye spirit odudu mbufo ke aŋwa ekɔŋ.

6 Ke ntak oro ke ami ŋwet nnɔ fi, nyom nte yak mbufo eyak enɔ mbon mi emi, mme obio mbufo, mme isɔŋ mbufo, ye mme inyene mbufo, midighe ntre mmɔ eyedise mbufo ye akaŋkaŋ ndien nsobo eyedisim mbufo.

7 Midighe ke usuŋ efen, eyak idem mbufo enɔ nnyin, enyuŋ ediana ye nnyin enyuŋ efiɔk mme ndedibe utom nnyin, enyuŋ edi nditɔ eka nnyin man mbufo etie nte nnyin—idighe ifin nnyin, edi nditɔ eka ye mme ufan nnyin ke ofuri inyene nnyin.

8 Ndien sese, ami motomonnɔ fi, ye uŋwɔŋɔ, edieke mbufo edinamde emi, owo idiwotke mbufo; edi edieke mbufo midinamke emi, ami motomo nnɔ fi ye uŋwɔŋɔ, nte ke ɔfiɔŋ efen ami nyɔnɔ uyo nte mbon ekɔŋ mi esuhɔde edi ekɔŋ ye mbufo, ndien mmɔ idifepke ubɔk, mmɔ idinyuŋ isuhɔke, edi eyewot mbufo, ndien eyeyak ofut ɔduɔ mbufo ke idem tutu mbufo isuhɔke aba.

9 Ndien sese, ami ndi Giddianhi, ndien ami ndi andikara ndedibe nka Gadianton emi; ŋka emi ye mme utom mmɔ emi ami mfiɔkde ke edi eti; ndien mmɔ edi eke eset ndien ekeyak mmɔ enɔ nnyin.

10 Ndien ami ŋwet ŋwed emi nnɔ fi, Lachoneus, ndien ami meyene idorenyin nte ke mbufo eyesana mme isɔŋ mbufo ye mme inyene mbufo eyak, ke iyip miduɔhɔke, man ikɔt mi emi efiak enyene mme unen ye ukara mmɔ, emi ekewɔrɔde ekpɔŋ mbufo ke ntak ibak mbufo ke ndibɔ mmɔ mme unen ukara mmɔ, ndien ibɔhɔke mbufo enam emi, ami nyosio usiene idiɔk mmɔ. Ami ndi Giddianhi.

11 Ndien idahaemi edikem ke ini emi Lachoneus ɔkɔbɔde ŋwed emi idem ama akpa enye ata eti eti, ke ntak uko Giddianhi ndiyom ndinyene isɔŋ mme Nephite, ŋko ye ndisin mme owo ndik nyuŋ nsio usiene mme idiɔk mbon emi owo mikiduehe, ibɔhɔke ke mmɔ ema enam idem mmɔ idiɔk ke ndiwɔrɔ mbine mme idiɔk owo ye mme mbubiam inɔ oro.

12 Idahaemi esese, Lachoneus, andikara emi, ekedi edinen owo, ndien se inɔ emi okoyomde ye mme ndik esie ikinamke ndik anam enye; ke ntak oro enye ikikpaŋke utɔŋ inɔ ŋwed Giddianhi, andikara mme inɔ oro, edi enye ama anam ete ikɔt esie eseme enɔ Jehovah eyom odudu ebaŋa ini emi mme inɔ oro edisuhɔrede idi eŋwan ye mmɔ.

13 Iŋ, enye ama ɔnɔ ntɔt ke ufɔt ikɔt esie, ete mmɔ ebok iban mmɔ ɔtɔ kiet, ye nditɔ mmɔ, ufene mmɔ ye mme enaŋ mmɔ, ye kpukpru inyene mmɔ, ibɔhɔke ekedi isɔŋ mmɔ, ke ebiet kiet.

14 Ndien enye ama anam ete ebɔp mme ebiet ukpeme ekanade mmɔ ekuk, ndien odudu esie ɔsɔŋ ata eti eti. Ndien enye ama anam mbon ekɔŋ, eke mme Nephite ye mme Lamanite mbiba, mme eke kpukpru mbon emi ekebatde enɔ mme Nephite, yak enim nte mbon ukpeme ekanade ekuk ndikpeme mmɔ, man ekpeme mmɔ ebaŋa mme inɔ oro ke uwemeyo ye ke okoneyo.

15 Iŋ, enye ɔdɔhɔ mmɔ ete: Adaŋa nte Jehovah odude uwem, ibɔhɔke mbufo ekabade esit ke kpukpru ukwaŋ-ŋkpɔ mbufo, enyuŋ eseme enɔ Jehovah, mbufo idikemeke ndibɔhɔ nwɔrɔ ke ubɔk mme inɔ Gadianton oro.

16 Ndien mme ikɔ ye mme prophecy Lachoneus ekedi ata akwa ye utibe tutu ete ke mmɔ ema enam ndik esim kpukpru owo; ndien mmɔ ema edomo ke ofuri ukeme mmɔ ndinam mme ikɔ Lachoneus.

17 Ndien edikem ete ke Lachoneus ama emek mme ada ibuot mme etubom ekɔŋ ɔnɔ ofuri mbon ekɔŋ mme Nephite, ndinɔ mmɔ uyo ke ini emi mme inɔ edisuhɔrede iwɔrɔ idi ke wilderness idiŋwana ye mmɔ.

18 Idahaemi ema emek ada ibuot ke otu kpukpru mme ada ibuot mme etubom ekɔŋ ye ata akwa etubom ekɔŋ enɔ ofuri mbon ekɔŋ mme Nephite, ndien enyiŋ esie ekedi Gidgiddoni.

19 Idahaemi ekedi ido ɔnɔ ofuri mme Nephite ndimek mme ada ibuot mme etubom ekɔŋ mmɔ, (ibɔhɔke ekedi ke ini ibak mmɔ) owo emi ekenyenede spirit ediyarade ye eke prophecy; ke ntak emi, Gidgiddoni emi ekedi akwa prophet ke otu mmɔ, ŋko ye ada ibuot mme ebiere ikpe.

20 Idahaemi mme owo ema edɔhɔ Gidgiddoni ete: Bɔŋ akam nnɔ Jehovah, nyuŋ yak nnyin idɔk ika ke mme obot ye ke wilderness, man nnyin iŋwana ye mme inɔ oro inyuŋ iwot mmɔ ke mme isɔŋ mmɔ.

21 Edi Gidgiddoni ɔdɔhɔ mmɔ ete: Jehovah akpan; koro edieke nnyin idɔkde ika eŋwan ye mmɔ Jehovah ayayak nnyin esin ke ubɔk mmɔ; ke ntak oro nnyin iyibeŋe idem nnyin ke ufɔt mme isɔŋ nnyin, ndien nnyin iyibok kpukpru mbon ekɔŋ nnyin ɔtɔ kiet, ndien nnyin idikaha eŋwan ye mmɔ, edi nnyin iyibet tutu mmɔ edi eŋwan ye nnyin; ke ntak oro adaŋa nte Jehovah odude uwem, edieke nnyin inamde emi enye ayayak mmɔ esin ke ubɔk nnyin.

22 Ndien edikem ke ɔyɔhɔ isua efudeba, ke mkpere utit isua, ntɔt Lachoneus ama aka ke ofuri iso isɔŋ, ndien mmɔ ema eda mme horse mmɔ, ye mme chariot mmɔ, ye mme ufene mmɔ, ye mme enaŋ mmɔ, ye mkpasip mmɔ, ye ofuri inyene mmɔ, enyuŋ esaŋa ke mme tɔsin ye mme duop ke tɔsin, tutu kpukpru mmɔ ema eka ke ebiet emi ekemekde ete mmɔ esobo idem mmɔ ɔtɔ kiet, ndikpeme idem mmɔ mbaŋa mme asua mmɔ.

23 Ndien isɔŋ emi ekemekde ekedi isɔŋ Zarahemla, ye isɔŋ emi okodude ke ufɔt isɔŋ Zarahemla ye isɔŋ Bountiful, iŋ, ke adaŋa emi okodude ke ufɔt isɔŋ Bountiful ye isɔŋ Desolation.

24 Ndien ata ediwak tɔsin mme owo ema edu emi ekekotde mme Nephite, emi ekesobode idem mmɔ kiet ke isɔŋ emi. Idahaemi Lachoneus ama anam ete mmɔ esobo ɔtɔ kiet ke isɔŋ ke usuk usuk, ke ntak akwa isuŋi emi okodude ke isɔŋ ke edem edere edere.

25 Ndien mmɔ ema esɔŋɔ idem mmɔ ebaŋa mme asua mmɔ; ndien mmɔ ema eduŋ ke isɔŋ kiet, ye ke eboho kiet, ndien mmɔ ema ebak mme ikɔ emi Lachoneus eketiŋde, tutu ete ke mmɔ ema ekabade esit ke kpukpru idiɔk ŋkpɔ mmɔ; ndien mmɔ ema ebɔŋ mme akam mmɔ enɔ Jehovah Abasi mmɔ, ete enye anam mmɔ ebɔhɔ ke ini emi mme asua mmɔ edisuhɔrede idi ndiŋwana ekɔŋ ye mmɔ.

26 Ndien mmɔ ema efuhɔ ata eti eti ke ntak mme asua mmɔ.Ndien Gidgiddoni ama anam ete mmɔ enam mme ŋkpɔ ekɔŋ ke utɔ ke utɔ, ndien yak mmɔ esɔŋɔ idem ye ŋkpɔ mkpeme idem, ye mme otu ekɔŋ, ye mme buckler, nte item esie edide.