1 Ndien idahaemi edikem ete ke ini Jesus amakɔdɔk oduk heaven, otuowo ema esuana, ndien edenowo kiet kiet ama ada ŋwan esie ye nditɔ onyuŋ afiak ɔnyɔŋ ufɔk esie.

2 Ndien ema etiŋ aŋwa-aŋwa ke otu mme owo ke ndondo oro, mbemiso eyo okut, ete ke otuowo ema ekut Jesus, ndien ete ke enye ama anam utom ɔnɔ mmɔ, ndien ete ke enye ŋko oyowut otuowo idem esie ke mkpɔŋ.

3 Iŋ, ndien kpa ofuri okoneyo oro ema etiŋ aŋwa-aŋwa ebaŋa Jesus; tutu ete ke mmɔ ema ekot mme owo emi ekewakde, iŋ, ata ediwak ibat owo, ema enam utom ata eti eti ofuri okoneyo oro, man mmɔ edu ke ebiet emi Jesus ediwutde otuowo idem esie ke mkpɔŋ.

4 Ndien edikem ete ke mkpɔŋ, ke ini otuowo ema ekesobo ɔtɔ kiet, sese, Nephi ye eyeneka esie emi enye akanamde eset ke mkpa, emi enyiŋ esie ekedide Timothy, ŋko ye eyen esie, emi enyiŋ esie ekedide Jonas, ŋko ye Mathoni, ye Mathonihah, eyeneka esie, ye Kumen, ye Kumenonhi, ye Jeremiah, ye Shemnon, ye Jonas, ye Zedekiah, ye Isaiah—idahaemi emi ekedi mme enyiŋ mme mbet emi Jesus ekemekde—ndien edikem ete ke mmɔ ema eka iso enyuŋ eda ke ufɔt otu owo.

5 Ndien sese, otuowo ema ewak eti eti tutu mmɔ enam ete ebahade mmɔ ke mme eboho duopeba.

6 Ndien mbet duopeba oro ema ekpep otuowo; ndien sese mmɔ ema enam ete otuowo etɔŋɔ edɔŋ ke iso isɔŋ, enyuŋ ebɔŋ akam enɔ Ete ke enyiŋ Jesus.

7 Ndien mme mbet oro ema ebɔŋ akam enɔ Ete ŋko ke enyiŋ Jesus. Ndien edikem ete mmɔ edahaeda enyuŋ enam utom enɔ mme owo.

8 Ndien ke ini mmɔ ema ekekpep mme ukem ikɔ emi Jesus amaketiŋ—ŋkpɔ ikpuhɔke ke mme ikɔ emi Jesus amaketiŋ—sese, mmɔ efiak etɔŋɔ edɔŋ enyuŋ ebɔŋ akam enɔ Ete ke enyiŋ Jesus.

9 Ndien mmɔ ema ebɔŋ akam ebaŋa se mmɔ ekeyomde ekan; ndien mmɔ ekeyom ete yak enɔ mmɔ Edisana Spirit.

10 Ndien ke ini mmɔ ema ekebɔŋ akam ntem mmɔ ema esuhɔde eka mben mmɔŋ, ndien otuowo etiene mmɔ.

11 Ndien edikem ete Nephi ama ɔsuhɔde oduk mmɔŋ enyuŋ enim enye uduɔkmmɔŋ.

12 Ndien enye ɔwɔrɔ ke mmɔŋ onyuŋ ɔtɔŋɔ ndinim uduɔkmmɔŋ. Ndien enye enim kpukpru mbon emi Jesus ekemekde uduɔkmmɔŋ.

13 Ndien edikem ke ini kpukpru ema ekena uduɔkmmɔŋ enyuŋ ewɔrɔde ke mmɔŋ edi, Edisana Spirit amadoro mmɔ ke idem, ndien mmɔ ema eyɔhɔ ye Edisana Spirit ye ikaŋ.

14 Ndien sese, ema ekanade mmɔ ekuk nte ekpedi ye ikaŋ; ndien okoto enyɔŋ ɔsuhɔde edi, ndien otuowo ema ekut, enyuŋ etie ntiense; ndien mme angel ema esuhɔde ke heaven edi enyuŋ enam utom enɔ mmɔ.

15 Ndien edikem ete ke ini mme angel ekenamde utom enɔ mme mbet oro, sese, Jesus edi onyuŋ ada ke ufɔt onyuŋ anam utom ɔnɔ mmɔ.

16 Ndien edikem ete ke enye amatiŋ ikɔ ɔnɔ otuowo, onyuŋ ɔnɔ mmɔ uyo ete mmɔ efiak etɔŋɔ edɔŋ ke isɔŋ, ndien ŋko ete yak mme mbet esie etɔŋɔ edɔŋ ke isɔŋ.

17 Ndien edikem ete ke ini kpukpru mmɔ ema eketɔŋɔ edɔŋ ke isɔŋ, enye ɔnɔ mme mbet esie uyo ete yak mmɔ ebɔŋ akam.

18 Ndien sese, mmɔ etɔŋɔ ndibɔŋ akam; ndien mmɔ ema ebɔŋ akam enɔ Jesus, ekotde enye Jehovah mmɔ ye Abasi mmɔ.

19 Ndien edikem ete Jesus ama ɔwɔrɔ ke otu mmɔ, onyuŋ adaha ekpri ɔkpɔŋ mmɔ onyuŋ osuk idem esie ke isɔŋ, onyuŋ ɔdɔhɔ ete:

20 Ete, ami mɔkɔm fi nte ke afo ɔmɔnɔ Edisana Spirit ɔsɔk mbon emi ami mmekde; ndien edi ke ntak mbuɔtidem mmɔ ke ami ete ke ami mmek mmɔ nsio ke ererimbot.

21 Ete, ami mbeŋe fi nte ke afo ɔyɔnɔ Edisana Spirit ɔsɔk kpukpru mmɔ emi edibuɔtdeidem ke mme ikɔ mmɔ.

22 Ete, afo ɔmɔnɔ mmɔ Edisana Spirit koro mmɔ ebuɔtdeidem ke ami; ndien afo omokut ete ke mmɔ ebuɔtidem ke ami koro afo omokop mmɔ, ndien mmɔ ebɔŋ akam enɔ mi; ndien mmɔ ebɔŋ akam enɔ mi koro ami ndude ye mmɔ.

23 Ndien idahaemi Ete, ami mbɔŋ akam nnɔ fi mbaŋa mmɔ, ŋko ye kpukpru mbon emi edibuɔtdeidem ke mme ikɔ mmɔ, man mmɔ ebuɔtidem ke ami, man ami ndu ke mmɔ nte afo, Ete, odude ke ami, man nnyin idi kiet.

24 Ndien edikem ete ke ini Jesus amakɔbɔŋ akam ntem ɔnɔ Ete, enye edi etiene mme mbet esie, ndien sese, mmɔ ema eka iso, ikitreke, ndibɔŋ akam nnɔ enye; ndien mmɔ ikitiŋke uwak ikɔ, koro ema enam mmɔ efiɔk se mmɔ edibɔŋde akam ibaŋa, ndien mmɔ ema eyɔhɔ ye udɔŋ.

25 Ndien edikem ete Jesus amadiɔŋ mmɔ nte mmɔ ekebɔŋde akam enɔ enye; ndien iso esie ama asak ɔnɔ mmɔ, ndien uŋwana iso esie ama ayama ɔnɔ mmɔ, ndien sese mmɔ ema eyama nte iso ye ŋko mme ɔfɔŋ Jesus; ndien sese afia esie ama akan ofuri afia, iŋ, ke akpanikɔ ŋkpɔ ndomo kiet iduhe ke ererimbot emi afiade nte afia esie.

26 Ndien Jesus ɔdɔhɔ mmɔ ete: Eka iso ebɔŋ akam; edi mmɔ ikitreke ndibɔŋ akam.

27 Ndien enye afiak adaha ɔkpɔŋ mmɔ, onyuŋ esik aka ekpri onyuŋ osuk idem esie ke isɔŋ; ndien enye afiak ɔbɔŋ akam ɔnɔ Ete, ete:

28 Ete, ami mɔkɔm fi ete ke afo amanam mbon emi ami mmekde esana, ke ntak mbuɔtidem mmɔ, ndien ami mbɔŋ akam nnɔ mmɔ, ye ŋko mbon emi edibuɔtdeidem ke mme ikɔ mmɔ, man enam mmɔ esana ke ami, oto ke mbuɔtidem ke mme ikɔ mmɔ, kpa nte enamde mmɔ esana ke ami.

29 Ete, ami mbɔŋke akam nnɔ ererimbot, edi mbɔŋ nnɔ mbon emi afo okosiode ke ererimbot ɔnɔ mi, ke ntak mbuɔtidem mmɔ, man enam mmɔ esana ke ami, man ami ndu ke mmɔ nte afo, Ete, odude ke ami, man nnyin idi kiet, man nyene ubɔŋ ke mmɔ.

30 Ndien ke ini Jesus amaketiŋ mme ikɔ emi enye ama afiak edi etiene mme mbet esie; ndien sese mmɔ ema esɔŋɔ ebɔŋ akam, ikitreke, enɔ enye; ndien enye ama afiak asak ye mmɔ; ndien sese mmɔ ekedi afia, kpa nte Jesus.

31 Ndien edikem ete enye ama afiak esik adaha ekpri onyuŋ ɔbɔŋ akam ɔnɔ Ete;

32 Ndien edeme ikemeke nditiŋ mme ikɔ emi enye ɔkɔbɔŋde akam, ŋko owo ikemeke ndiwet mme ikɔ emi enye ekebɔŋde akam.

33 Ndien otuowo oro ema ekop enyuŋ etie ntiense; ndien esit mmɔ ama atara ndien mmɔ ema efiɔk ke esit mmɔ mme ikɔ emi enye ɔkɔbɔŋde akam.

34 Edi, ata akwa ye utibe ke mme ikɔ emi enye ɔkɔbɔŋde akam ekedi ete ke owo ikemeke ndiwet mmɔ, ŋko owo ikemeke nditiŋ mmɔ.

35 Ndien edikem ete ke ini Jesus ama eketre ndibɔŋ akam enye afiak edi etiene mme mbet, onyuŋ ɔdɔhɔ mmɔ ete: Utɔ akwa mbuɔtidem emi akananam ami nkwe ke otu kpukpru mme Jew; ke ntre ami nkekanke ŋwut mmɔ mme utɔ akwa utibe ŋkpɔ emi, ke ntak unana mbuɔtidem mmɔ.

36 Ke akpanikɔ ami ndɔhɔ mbufo, owo mmɔ ndomo kiet iduhe emi okutde mme utɔ akwa ŋkpɔ nte mbufo ekutde; ŋko mmɔ ikopke mme utɔ akwa ŋkpɔ nte mbufo ekopde.