1 Ndien ke akpanikɔ, ke akpanikɔ, ke ami ndɔhɔ mbufo nte ke ami menyene mme erɔŋ efen, emi miduhe ke isɔŋ emi, emi minyuŋ iduhe ke isɔŋ Jerusalem, emi minyuŋ iduhe ke mme isɔŋ ndomo kiet emi ekanarede ebiet emi ami nkakade nkanam utom.

2 Koro mmɔ emi ami ntiŋde mbaŋa edi mmɔ emi mikopke uyo mi kaŋa; ŋko ami nyarakede idem mi nnɔ mmɔ kaŋa.

3 Edi ami mɔbɔ ibet nto Ete nte ke ami nyaka mbine mmɔ, ndien ete ke mmɔ eyekop uyo mi, ndien eyebat mmɔ esin ke otu mme erɔŋ mi, man mmɔ edi ufɔk-erɔŋ kiet ye ekpeme-erɔŋ kiet; ke ntak oro ami nka ndiwut mmɔ idem mi.

4 Ndien ami nnɔ mbufo uyo nte yak mbufo ewet mme ikɔ emi ke ami mma ndaha, man edieke edide ete ke ikɔt mi ke Jerusalem, mmɔ emi ekutde mi enyuŋ edude ye ami ke utom mi, mibeŋeke Ete ke enyiŋ mi, man mmɔ ebɔ ifiɔk ebaŋa mbufo eto Edisana Spirit, ŋko ye eke mme ubon eken emi mmɔ mifiɔke ibaŋa, ete ke eyenim mme ikɔ emi mbufo ediwetde enyuŋ eyarade enɔ mme Gentile, man oto ke uyɔhɔ mme Gentile, nsuhɔ ubon mmɔ, emi edisuande ke iso isɔŋ ke ntak unana mbuɔtidem mmɔ, eyeda mmɔ edi, mme eyeda mmɔ edi ifiɔk abaŋade mi, Andifak mmɔ.

5 Ndien ke ini oro ke ami nditaŋ mmɔ nbok nto ŋkaŋ isɔŋ mbinaŋ; ndien ke ini oro ke ami ndinam ediomi osu, emi Ete anamde ɔnɔ kpukpru mbon ufɔk Israel.

6 Ndien ɔfɔfɔn ɔnɔ mme Gentile, koro mmɔ enimde mi ke akpanikɔ, ye ke Edisana Spirit, emi etiede ntiense ɔnɔ mmɔ abaŋa mi ye Ete.

7 Esese, koro mmɔ enimde mi ke akpanikɔ, Ete ɔdɔhɔ ete, ndien ke ntak unana mbuɔtidem mbufo, O ufɔk Israel, ke ukperedem usen ke akpanikɔ edidi isim mme Gentile, man enam mmɔ efiɔk mme ŋkpɔ emi ɔyɔhɔyɔhɔ.

8 Edi ɔyɔdɔdiɔk, Ete ɔdɔhɔ, ɔnɔ mme Gentile emi enanade mbuɔtidem—koro misehe ke mmɔ edi ke iso isɔŋ emi, enyuŋ esuan ikɔt mi emi edide eke ufɔk Israel; ndien ebin ikɔt mi emi edide eke ufɔk Israel esio ke otu mmɔ, enyuŋ edihi mmɔ ke idak ikpat;

9 Ndien ke ntak mme mbɔm Ete enyenede ɔnɔ mme Gentile, ŋko ye mme ubiere ikpe Ete kabaŋa ikɔt mi emi edide eke ufɔk Israel, ke akpanikɔ, ke akpanikɔ, ke ami ndɔhɔ mbufo, nte ke kpukpru emi ama ebe, ndien ke mma nkanam emia ikɔt mi emi edide eke ufɔk Israel, enyuŋ ekut ukut, enyuŋ ewot, enyuŋ ebin esio ke otu mmɔ, enyuŋ ekabade esua mmɔ, enyuŋ ekabade edi esi ye ufiet ke otu mmɔ—

10 Ndien ntem ke Ete ɔkɔnɔ uyo ete ami ndɔhɔ mbufo nte: Ke usen oro emi mme Gentile edinamde idiɔk ŋkpɔ ye gospel mi, ye edisinde ɔyɔhɔ gospel mi, ye edimenerede ke ntaŋidem esit mmɔ ikan kpukpru mme idut, ye ke okponde akan oro kpukpru mme owo ke ofuri ererimbot, ye ediyɔhɔde ye utɔ kpukpru nsu, ye mme abiaŋa, ye mme idiɔk ŋkpɔ, ye kpukpru utɔ mbubik, ye mme uwot owo, ye mme ifɔt, ye mme use, ye mme ndedibe mbubiam; ndien edieke mmɔ edinamde kpoukpuru mme ŋkpɔ emi, edinyuŋ isinde ɔyɔhɔ gospel mi, esese, Ete ɔdɔhɔ, ami nyesio ɔyɔhɔ gospel mi ke otu mmɔ mfep.

11 Ndien ke ini oro ke ami nditi ediomi emi ami nnamde nnɔ ikɔt mi, O ufɔk Israel, ndien nyada gospel mi nsɔk mmɔ.

12 Ndien ami nyewut mbufo, O ufɔk Israel, nte ke mme Gentile idinyeneke odudu ke idem mbufo; edi ami nyeti ediomi mi ye mbufo, O ufɔk Israel, ndien mbufo eyedinyene ifiɔk ɔyɔhɔ gospel mi.

13 Edi edieke mme Gentile edikabarede esit inyuŋ inyɔŋ itiene mi, Ete ɔdɔhɔ, esese eyebat mmɔ esin ke otu ikɔt mi, O ufɔk Israel.

14 Ndien ami ndiyake ikɔt mi, emi edide eke ufɔk Israel, ete ebe ke ebiet mmɔ, ndien edighi mmɔ enim, Ete ɔdɔhɔ.

15 Edi edieke mmɔ midiŋwɔŋɔkede itiene mi, inyuŋ ikop uyo mi, ami nyeyak mmɔ, iŋ, ami nyeyak ikɔt mi, O ufɔk Israel, ete mmɔ eka ke ebiet mmɔ, ndien edighi mmɔ enim, ndien mmɔ eyebiet inuŋ emi adabade esie, ndien tɔŋɔke emi ifɔnke, edi ana nte ebin esio, enyuŋ edighi ke idak ikpat mme owo mi, O ufɔk Israel.

16 Ke akpanikɔ, ke akpanikɔ, ke ami ndɔhɔ mbufo, ke ntem ke Ete ɔkɔnɔ mi uyo—ete nnɔ mbon emi isɔŋ emi nte isɔŋ inyene.

17 Ndien ke ini oro ke mme ikɔ prophet Isaiah edisu, emi edɔhɔde ete:

18 Mbon ukpeme mbufo eyemenede uyo; ye uyo kiet ke mmɔ edikwɔ, koro mmɔ eyekut enyin ke enyin ke ini Jehovah edifiakde ida Zion idi.

19 Ebumede ke idaresit, ekwɔ ye uyo kiet, mbufo mme ŋwure ebiet Jerusalem; koro Jehovah ɔdɔŋde ikɔt esie esit, enye afak Jerusalem.

20 Jehovah ɔfɔhɔde edisana ubɔk esie ke enyin kpukpru mme idut; ndien kpukpru mme utit ererimbot eyekut edinyaŋa Abasi.