1 Ndien edikem ete nte mme mbet Jesus ekesaŋade enyuŋ ekwɔrɔde mme ŋkpɔ emi mmɔ ekekopde enyuŋ ekutde, enyuŋ enimde uduɔkmmɔŋ ke enyiŋ Jesus, edikem ete ke mme mbet ema eboho ɔtɔ kiet enyuŋ ediana kiet ke ɔkpɔsɔŋ akam ye utre udia.

2 Ndien Jesus afiak owut mmɔ idem esie, koro mmɔ ekebɔŋ akam enɔ Ete ke enyiŋ esie; ndien Jesus edida ke ufɔt mmɔ, onyuŋ ɔdɔhɔ mmɔ ete: Nso ke mbufo eyom ete yak ami nnɔ mbufo?

3 Ndien mmɔ edɔhɔ enye ete: Jehovah, nnyin iyom ite yak afo ɔdɔhɔ nnyin enyiŋ emi nnyin idikotde ufɔk Abasi emi; koro mme mfaŋa edu ke otu mme owo kabaŋade ŋkpɔ emi.

4 Ndien Jehovah ɔdɔhɔ mmɔ ete: Ke akpanikɔ, ke akpanikɔ, ke ami ndɔhɔ mbufo, ntak emi edide ete ke ana mme owo ekuni enyuŋ eneni ke ntak ŋkpɔ emi?

5 Ndi mmɔ ikotke mme ŋwed Abasi, emi edɔhɔde ke ana mbufo eda enɔ idem mmɔ enyiŋ Christ, emi edide enyiŋ mi? Koro ke enyiŋ emi ke edikot mbufo ke akpatre usen;

6 Ndien owo ekededi emi adade enyiŋ mi ɔnɔ idem esie, onyuŋ ɔyɔde tutu esim utit, ukem oro ke edinyaŋa ke akpatre usen.

7 Ke ntak oro, sededi emi mbufo edinamde, mbufo edinam ke enyiŋ mi; ke ntak oro mbufo eyekot ufɔk Abasi oro ke enyiŋ mi; ndien mbufo eyekot Ete ke enyiŋ mi man enye ɔdiɔŋ ufɔk Abasi ke ntak mi.

8 Ndien didie ke edi ufɔk Abasi mi ibɔhɔke ekot enye ke enyiŋ mi? Koro edieke ekotde ufɔk Abasi ke enyiŋ Moses ndien enye edi ufɔk Abasi Moses; mme edieke ekotde enye ke enyiŋ owo ndien enye edi ufɔk Abasi owo; edi edieke ekotde enye ke enyiŋ mi ndien enye edi ufɔk Abasi mi, edieke edide ete ke ebɔp mmɔ ke gospel mi.

9 Ke akpanikɔ ke ami ndɔhɔ mbufo, nte ke ebɔp mbufo ke gospel mi; ke ntak oro mbufo eyekot mme ŋkpɔ ekededi emi mbufo ekotde, ke enyiŋ mi; ke ntak oro edieke mbufo ekotde Ete, enɔ ufɔk Abasi, edieke edide ke enyiŋ mi Ete oyokop mbufo.

10 Ndien edieke edide ete ke ebɔp ufɔk Abasi ke gospel mi ke ini oro ke Ete ediwut mme utom esie ke enye.

11 Edi edieke mibɔpke enye ke gospel mi, edi ebɔp enye ke mme utom owo, mme ke mme utom satan, ke akpanikɔ ke ami ndɔhɔ mbufo ke mmɔ enyene idaresit ke mme utom mmɔ ke ekpri ini, ndien idaha oro utit edi, ndien ekpi enyuŋ etop mmɔ esin ke ikaŋ, emi mfiak-edem miduhe.

12 Koro mme utom mmɔ etiene mmɔ, koro edi ke ntak mme utom mmɔ ke ekpi mmɔ; ke ntak oro eti mme ŋkpɔ emi ami ntiŋde nnɔ mbufo.

13 Esese ami mɔnɔ mbufo gospel mi, ndien emi edi gospel emi ami nnɔde mbufo—nte ke ami nkedi ererimbot ndinam uduak Ete mi, koro Ete mi ɔkɔdɔŋ mi.

14 Ndien Ete mi ɔkɔdɔŋ mi man emenede mi ke cross; ndien ete ke ini ema ekemenede mi ke cross, ete ami nda kpukpru owo etiene mi, man nte mme owo eke emenede mi kpa ntre ke Ete edimenede mme owo, ete eda ke iso mi, man ebiere ikpe ebaŋa mme utom mmɔ, mme mmɔ edi eti mme mmɔ edi idiɔk—

15 Ndien ke ntak emi ke emenede mi; ke ntre, nte asaŋade ye odudu Ete ami nyada kpukpru owo etiene mi, man ebiere ikpe enɔ mmɔ nte asaŋade ye mme utom mmɔ.

16 Ndien eyedikem, ete ke owo ekededi emi akabade esit onyuŋ anade uduɔkmmɔŋ ke enyiŋ mi ɔyɔyɔhɔ; ndien edieke enye ɔyɔde tutu esim utit, sese, enye ke ami ndise nte miduehe ke iso Ete mi ke usen oro ke ini ami ndidade ndibiere ikpe nnɔ ererimbot.

17 Ndien enye emi miyɔhɔ tutu esim utit, ukem oro ŋko edi enye emi emi edikpide inyuŋ etop isin ke ikaŋ, emi mmɔ midikemeke ndifiak edem, ke ntak nnen nnen Ete.

18 Ndien emi edi ikɔ emi enye ɔnɔde nditɔ owo. Ndien ke ntak emi enye anam mme ikɔ esu emi enye ɔkɔnɔde, ndien enye isuho-nsu, edi anam kpukpru mme ikɔ esie esu.

19 Ndien ŋkpɔ emi misanake ikemeke ndiduk obio ubɔŋ esie; ke ntak oro ŋkpɔ ndomo kiet idukke nduɔk-odudu esie ibɔhɔke edi mmɔ emi eyetde mme ɔfɔŋ mmɔ ke iyip mi, ke ntak mbuɔtidem mmɔ, ye edikabade esit ke kpukpru mme idiɔk ŋkpɔ mmɔ, ye akpanikɔ mmɔ tutu esim utit.

20 Idahaemi emi edi ibet oro: Ekabare esit, kpukpru utit ererimbot, enyuŋ etiene mi enyuŋ ena uduɔkmmɔŋ ke enyiŋ mi, man enam mbufo esana ke edibɔ Edisana Spirit, man mbufo enana ntɔi ke iso mi ke akpatre usen.

21 Ke akpanikɔ, ke akpanikɔ, ke ami ndɔhɔ mbufo, emi edi gospel mi; ndien mbufo emefiɔk mme ŋkpɔ emi anade nte mbufo enam ke ufɔk Abasi mi; koro mme utom emi mbufo ekutde nte ami nnamde oro ke mbufo edinam ŋko; koro se mbufo ekutde nte ami nnamde kpa oro ke mbufo edinam;

22 Ke ntak oro, edieke mbufo enamde mme ŋkpɔ emi ɔfɔfɔn ɔnɔ mbufo, koro eye emenede mbufo ke akpatre usen.

23 Ewet mme ŋkpɔ emi mbufo ekutde enyuŋ ekopde, ibɔhɔke edi mmɔ emi ekpande.

24 Ewet mme ikɔ mbon emi, emi editibede, kpa nte ekewetde, ebaŋa sikitibede.

25 Koro sese, se ewetde ke mme ŋwed oro, ye emi ediwetde, ke edida ibiere ikpe inɔ mbon emi, koro ke mmɔ ke mme owo edida ifiɔk mme utom mmɔ.

26 Ndien sese, Ete ewet kpukpru ŋkpɔ; ke ntak oro edida mme ŋwed emi ediwetde ibiere ikpe inɔ ererimbot.

27 Ndien mbufo efiɔk ete ke mbufo edidi mme ebiereikpe inɔ mbon emi, nte asaŋade ye ubiereikpe emi ami ndinɔde mbufo, emi edide edinen. Ke ntak oro, nsutɔ owo ke ana nte mbufo edi? Ke akpanikɔ ke ami ndɔhɔ mbufo, kpa nte ami ndide.

28 Ndien idahaemi ami nyɔŋ ntiene Ete. Ndien ke akpanikɔ ke ami ndɔhɔ mbufo, mme ŋkpɔ ekededi emi mbufo edibeŋede Ete ke enyiŋ mi eyenɔ mbufo.

29 Ke ntak oro, ebeŋe, ndien mbufo eyebɔ, kɔŋ, ndien eyeberede enɔ mbufo; koro owo emi ebeŋede, ɔyɔbɔ; ndien enye emi ɔkɔŋde, eyeberede.

30 Ndien idahaemi, esese, idaresit mi okpon, tutu ɔyɔhɔ, ke ntak mbufo, ŋko ye emana emi; iŋ, ndien ŋko Ete adaresit, ye ŋko kpukpru ndisana angel, ke ntak mbufo ye emana emi; koro baba owo mmɔ ndomo kiet itakke.

31 Esese, ami moyom nte aŋwaŋa mbufo ; koro ami ndɔhɔ mmɔ eke emana emi emi edude ke uwem idahaemi; ndien baba owo mmɔ ndomo kiet itakke; ndien ke mmɔ ami menyene ɔyɔhɔ idaresit.

32 Edi esese, ami mɔfuhɔ ke ntak ɔyɔhɔ emana inaŋ tɔŋɔ ke emana emi, koro enye ada mmɔ ɔwɔrɔ nte mbon ŋkpɔkɔbi kpa nte akadade eyen nsobo; koro mmɔ eyeyam mi ke silver ye gold, ye ke ŋkpɔ emi uta-ŋkpɔ edibiatde ye emi mme inɔ edidukde inyuŋ iyip. Ndien ke usen oro ke ami ndise mmɔ, kpa ke ndiŋwɔŋɔde mme utom mmɔ ndori ke ibuot eke mmɔ.

33 Ndien edikem ete ke ini Jesus amaeketre mme ikɔ emi enye amadɔhɔ mme mbet esie ete: Mbufo eduk ke mfafaha inuaotop; koro inuaotop afafaha, ndien usuŋ emi adade aka uwem esire, ndien mbon ekutde enye iwakke; edi inuaotop atara, ndien usuŋ emi adade aka mkpa aŋwaŋa, ndien ediwak edu emi esaŋade ke enye, tutu okoneyo oro edisim, emi owo ndomo kiet mikemeke ndinam utom.