1 Ndien idahaemi edikem ete ke ini Jesus amaketiŋ mme ŋkpɔ emi enye ama anam mmɔ eŋwaŋa otuowo; ndien enye ama anam mme ŋkpɔ emi aŋwaŋa mmɔ, ikpɔ ye mkpri mbiba.

2 Ndien enye ɔdɔhɔ ete: Mme ŋwed Abasi emi emi mbufo mikinyeneke ye mbufo, Ete ama ɔnɔ uyo ete yak ami nnɔ mbufo; koro ekedide ifiɔk ke enye ete yak enɔ mme emana ini iso.

3 Ndien enye amanam kpukpru ŋkpɔ aŋwaŋa, kpa tɔŋɔ ke editɔŋɔ tutu ini emi anade nte enye edi ke ubɔŋ esie—iŋ, kpa kpukpru ŋkpɔ emi anade nte edi ke iso isɔŋ, tutu ete ke se edade ebot ererimbot eyetara ke ɔkpɔsɔŋ ufiop, ndien ererimbot eyeŋwine nte ikpa-ŋwed, ndien mme enyɔŋ ye isɔŋ eyebe efep;

4 Ndien tutu ke akwa ye akpatre usen, ke ini ofuri owo, ye ofuri iman, ye ofuri idut ye mme usem edidade ke iso Abasi, man ebiere ikpe ebaŋa mme utom mmɔ, mme mmɔ edi eti mme mme mmɔ edi idiɔk—

5 Edieke mmɔ edide eti, man eset ke nsinsi uwem; ndien edieke mmɔ edide idiɔk, man eset ke ubiom ikpe; emi esaŋade kiet, kiet ke ubɔk kiet ndien enye eken ke ubɔk eken, nte asaŋade ye mbɔm, ye nnen nnen, ye edisana emi odude ke Christ, emi okodude mbemiso ererimbot ɔtɔŋɔ.

6 Ndien idahaemi ami nkemeke ndiwet ke ŋwed emi ubak ikie eke mme ŋkpɔ emi Jesus ke akpanikɔ ekekpepde mme owo;

7 Edi sese mme usan ŋwed emi Nephi ekewetde edɔŋɔ mme ubak ŋkpɔ emi ewakde emi enye ekekpepde mme owo.

8 Ndien mme ŋkpɔ emi ke ami ŋwet, emi edide ekpri ubak eke mme ŋkpɔ emi enye ekekpepde mme owo; ndien ami mewet mmɔ ye uduak nte man ekpefiak eda mmɔ esɔk mbon emi, oto ke mme Gentile, nte asaŋade ye mme ikɔ emi Jesus eketiŋde.

9 Ndien ke ini mmɔ edibɔde emi, emi ɔfɔnde ete mmɔ ebemiso enyene, man edomo mbuɔtidem mmɔ ese, ndien edieke edide ete ke mmɔ eyebuɔt idem ke mme ŋkpɔ emi ke ini oro ke ediyarade mme ŋkpɔ emi ekponde ekan enɔ mmɔ.

10 Ndien edieke edide ete ke mmɔ idibuɔtke idem ke mme ŋkpɔ emi, ke ini oro ke edimum mme ŋkpɔ emi ekponde ekan ekpɔŋ mmɔ, emi edidade mmɔ ika ubiom ikpe.

11 Esese, ami nkonyom ndiwet mmɔ, kpukpru emi ekewetde ke mme usan ŋwed emi Nephi ekewetde, edi Jehovah amakpan, ɔdɔhɔ ete: Ami nyodomo mbuɔtidem ikɔt mi nse.

12 Ke ntak oro ami, Mormon, mewet mme ŋkpɔ emi Jehovah ɔkɔnɔde mi uyo. Ndien idahaemi ami, Mormon, metre mme ikɔ mi, ndien maka iso ndiwet mme ŋkpɔ emi ekenɔde mi uyo.

13 Ke ntak oro, ami moyom nte yak mbufo efiɔk ete ke Jehovah ke akpanikɔ amakpep mme owo, ke ufaŋ usen ita; ndien ke oro ekebede ke enye ama owut mmɔ idem esie ke ini ke ini, ndien ama obuŋ uyo ke ini ke ini, onyuŋ ɔdiɔŋ enye, ndien ɔnɔ mmɔ.

14 Ndien edikem ete ke enye amakpep onyuŋ anam utom ɔnɔ nditɔ otuowo emi eketiŋde ebaŋa, ndien enye ama atat edeme mmɔ, ndien mmɔ ema etiŋ enɔ mme ete mmɔ akwa ye mme utibe ŋkpɔ, kpa sikikponde ikan se enye akayayarade ɔnɔ mme owo; ndien enye ama atat edeme mmɔ man mmɔ ekan etiŋ.

15 Ndien edikem ete ke ini enye amakɔdɔk oduk heaven—ɔyɔhɔ ikaba enye owutde mmɔ idem esie, onyuŋ aka etiene Ete, ke ini enye amakɔkɔk ofuri mbon udɔŋɔ mmɔ, ye mbuŋɔ mmɔ, onyuŋ atat enyin mme nnan mmɔ onyuŋ ɔkubɔde utɔŋ mme inan, onyuŋ ɔkɔk utɔ kpukpru udɔŋɔ ke otu mmɔ, onyuŋ anam edenowo eset ke mkpa, onyuŋ owutde mmɔ odudu esie, ndien ama ɔkɔdɔk etiene Ete—

16 Sese, edikem ke mkpɔŋ ete ke otuowo ema esobo idem mmɔ ɔtɔ kiet, ndien mmɔ ema ekut enyuŋ ekop nditɔ emi; iŋ, kpa nsek nditɔ ema ekubɔde inua mmɔ enyuŋ etiŋ mme utibe ŋkpɔ; ndien ema ekpan ete owo ndomo kiet ukuwet mme ŋkpɔ emi mmɔ eketiŋde.

17 Ndien edikem ete mme mbet emi Jesus ekemekde ema etɔŋɔ ke ini oro ndinim uduɔkmmɔŋ ye ndikpep nte ediwak emi ekedide etiene mmɔ; ndien nte ediwak emi ekenimde uduɔkmmɔŋ ke enyiŋ Jesus ema eyɔhɔ ye Edisana Spirit.

18 Ndien ediwak mmɔ ema ekut enyuŋ ekop mme ŋkpɔ emi midighe se etiŋde, emi mifɔnkese ewetde.

19 Ndien mmɔ ema ekpep, enyuŋ enam utom enɔ kiet eken; ndien mmɔ ema enyene kpukpru ŋkpɔ ukem-ukem ke otu mmɔ, kpukpru owo enam ŋkpɔ nte enende, ye kiet eken.

20 Ndien edikem ete ke mmɔ ema enam kpukpru ŋkpɔ kpa nte Jesus ɔkɔnɔde mmɔ uyo.

21 Ndien mmɔ emi ekenade uduɔkmmɔŋ ke enyiŋ Jesus ema ekot mmɔ ufɔk Abasi Christ.