1 Ndien idahaemi edikem ete ke ini Jesus ama eketiŋ mme ikɔ emi ama enye ɔŋwɔŋɔde enyin esie ese otu owo, onyuŋ ɔdɔhɔ mmɔ ete: Esese, mbufo emekop mme ŋkpɔ emi ami nkekpepde mbemiso ami ndɔk ntiene Ete mi; ke ntak oro, owo ekededi emi etide mme ikɔ mi emi onyuŋ anamde mmɔ, enye ke ami ndimenede ke akpatre usen.

2 Ndien edikem ete ke ini Jesus ama eketiŋ mme ikɔ emi enye ama okut ete ke usuk ema edu emi idem akakpade, enyuŋ ekere se enye eyomde kabaŋa ibet Moses; koro ikiŋwaŋake mmɔ se ikɔ oro ɔkɔwɔrɔde, ke ŋkani ŋkpɔ ema ebe efep, ndien ke kpukpru ŋkpɔ ema ekabade edi mbufa.

3 Ndien enye ɔdɔhɔ mmɔ ete: Ekukpa idem ete ke ami mma ndɔhɔ mbufo nte ke ŋkani ŋkpɔ ema ebe efep, ndien ke kpukpru ŋkpɔ ema ekabade edi mbufa.

4 Esese, ami ndɔhɔ mbufo nte ke mbet esu emi ekenɔde Moses.

5 Esese, ami ndi enye emi ɔkɔnɔde mbet oro, ndien ami ndi enye emi okodiomide ye ikɔt mi Israel; ke ntak oro, mbet ke ami osu, koro ami ndi andinam mbet osu; ke ntak oro enye enyene utit.

6 Esese, ami mbiatke mme prophet, koro adaŋa nte ediwak emi misuhu ke ami, ke akpanikɔ ke ami ndɔhɔ mbufo, ke kpukpru eyesu.

7 Ndien sia ami nkɔdɔhɔde mbufo nte ke ŋkani ŋkpɔ ebe efep, ami mbiatke se eketiŋde ebaŋa mme ŋkpɔ emi enade nte edi.

8 Koro esese, ediomi emi ami nnamde ye ikɔt mi isuhu ofuri ofuri; edi mbet emi ekenɔde Moses enyene utit ke ami.

9 Esese, ami ndi mbet, ye uŋwana. Ese mi, enyuŋ eme tutu esim utit, ndien mbufo eyedu uwem; koro enye emi emede tutu esim utit ke ami ndinɔ nsinsi uwem.

10 Esese, ami mɔnɔ mbufo mme ibet; ke ntak oro enim mme ibet mi. Ndien emi edi mbet ye mme prophet, koro ke akpanikɔ mmɔ etie ntiense ebaŋa mi.

11 Ndien idahaemi edikem ete ke ini Jesus ama eketiŋ mme ikɔ emi, enye ɔdɔhɔ mme owo duopeba oro emi enye ekemekde ete:

12 Mbufo edi mme mbet mi; ndien mbufo edi uŋwana enɔ mbon emi, emi edide nsuhɔ ufɔk Joseph.

13 Ndien esese, emi edi isɔŋ inyene mbufo; ndien Ete ɔnɔ mbufo enye.

14 Ndien iduhe ini emi Ete ɔkɔnɔde mi uyo ete yak ami ntiŋ emi nnɔ nditɔ eka mbufo ke Jerusalem.

15 Ŋko iduhe ini emi Ete ɔkɔnɔde mi uyo ete yak ami ndɔhɔ mmɔ mbaŋa mme ubon ufɔk Israel eken, emi Ete akadade ɔwɔrɔ ke isɔŋ oro.

16 Emi ke Ete ɔkɔnɔ mi uyo, ete yak ami ntiŋ nnɔ mmɔ:

17 Ete ke ami menyene mme erɔŋ efen emi mitoho ke ufɔk-erɔŋ emi; mmɔ ŋko ke ana nte ami nda ndi, ndien mmɔ eyekop uyo mi; ndien mmɔ eyedi otu-erɔŋ kiet, ye ekpeme-erɔŋ kiet.

18 Ndien idahaemi, ikɔ ikiŋwaŋake mmɔ ke ntak nsɔŋ ibuot ye unana mbuɔtidem; ke ntak oro ema enɔ mi uyo ete nkutiŋ aba mbaŋa Ete kabaŋa ŋkpɔ emi nnɔ mmɔ.

19 Edi, ke akpanikɔ, ke ami ndɔhɔ mbufo nte ke Ete ama ɔnɔ mi uyo, ndien ami ndɔhɔ mbufo, nte ke ekebahade mbufo esio ke otu mmɔ ke ntak ukwaŋ-ŋkpɔ mmɔ; oro edi ke ntak ukwaŋ-ŋkpɔ mmɔ ke mmɔ mifiɔkke ibaŋa mbufo.

20 Ndien ke akpanikɔ, ke ami mfiak ndɔhɔ mbufo nte ke ubon eken ke Ete akabahade osio ɔkpɔŋ mmɔ; ndien edi ke ntak ukwaŋ-ŋkpɔ mmɔ ke mmɔ mifiɔke ibaŋa mmɔ.

21 Ndien ke akpanikɔ ke ami ndɔhɔ mbufo, nte ke mbufo edi mmɔ emi ami nkɔdɔhɔde nte: Ami menyene mme erɔŋ efen emi mitoho ke ufɔk-erɔŋ emi; mmɔ ŋko ke ana nte ami nda ndi, ndien mmɔ eyekop uyo mi; ndien mmɔ eyedi otu erɔŋ kiet, ye ekpeme-erɔŋ kiet.

22 Ndien ikɔ mi ikiŋwaŋake mmɔ, koro mmɔ ekekere ke ekedi mme Gentile; koro mmɔ ikifiɔke ite ke mme Gentile edikabade esit ito ukwɔrɔ ikɔ mmɔ.

23 Ndien ikɔ mi ikiŋwaŋake mmɔ ete ke ami nkɔdɔhɔ ke mmɔ eyekop uyo mi; ndien ikɔ mi ikiŋwaŋake mmɔ ete ke iduhe ini emi mme Gentile edikopde uyo mi—ete ke ami ndiyarakede idem mi nnɔ mmɔ ibɔhɔke oto ke Edisana Spirit.

24 Edi esese, mbufo emekop uyo mi, enyuŋ ekut mi; ndien mbufo edi mme erɔŋ mi, ndien ebat mbufo esin ke otu mbon emi Ete ɔnɔde mi.