1 Ndien edikem ke ini Jesus amaketiŋ mme ikɔ emi, enye etiŋ ye mme mbet esie, kiet kiet, ɔdɔhɔ mmɔ ete: Nso ke mbufo eyom eto mi, oro ama okure ami mɔnyɔŋ ntiene Ete?

2 Ndien kpukpru mmɔ edɔhɔ, ibɔhɔke owo ita, ete: Nnyin iyom ite ke nnyin ima idu uwem isim isua emi enimde enɔ owo, ite utom nnyin, emi afo okotde nnyin, enyene utit, man nnyin isɔp itiene fi ke obio ubɔŋ fo.

3 Ndien enye ɔdɔhɔ mmɔ ete: Ɔfɔfɔn ɔnɔ mbufo koro mbufo eyomde ŋkpɔ emi eto mi; ke ntak oro, ke ini mbufo edide isua atayeduopeba mbufo eyedi etiene mi ke obio ubɔŋ mi; ndien ye ami ke mbufo edinyene nduɔkodudu.

4 Ndien ke ini enye amaketiŋ ikɔ ɔnɔ mmɔ, enye ɔŋwɔŋɔre ese owo ita oro, onyuŋ ɔdɔhɔ mmɔ ete: Nso ke mbufo eyom ete ami nnam nnɔ mbufo, ke ini ami mma ŋka ntiene Ete?

5 Ndien mmɔ efuhɔ ke esit mmɔ, koro mmɔ ikanke itiŋ inɔ enye ŋkpɔ emi mmɔ ekeyomde.

6 Ndien enye ɔdɔhɔ mmɔ ete: Esese, ami mɔfiɔk mme ekikere mbufo, ndien mbufo emeyom ŋkpɔ emi John, edima mi, emi okodude ye ami ke utom mi, mbemiso mme Jew emenede mi, okoyomde oto mi.

7 Ke ntak oro, eyetim ɔfɔn ɔnɔ mbufo, koro mbufo miditabike mkpa; edi mbufo eyedu uwem ndikut kpukpru mme edinam Ete ye nditɔ owo, kpa tutu kpukpru ŋkpɔ esu nte asaŋade ye uduak Ete, ke ini ami ndidide ke ubɔŋ mi ye mme odudu heaven.

8 Ndien mbufo idikwe mme ubiak mkpa; edi ke ini ami ndidide ke ubɔŋ mi eyekpuhɔde mbufo ke ediyip enyin kiet ke emi enyenede ndikpa eka uwem emi mkpa miduhe; ndien ke ini oro ke edidiɔŋ mbufo ke obio ubɔŋ Ete mi.

9 Ndien ŋko, mbufo idinyeneke ubiak ke ini mbufo edude ke obukidem, mme ukut ibɔhɔke edi ke ntak mme idiɔk ŋkpɔ ererimbot; ndien kpukpru emi ke ami ndinam ke ntak ŋkpɔ emi mbufo eyomde eto mi, koro mbufo emeyom ete mbufo eda mme ukpɔŋ owo esɔk mi, ke ini ererimbot osuk odude.

10 Ndien ke ntak emi mbufo eyenyene uyɔhɔ idaresit; ndien mbufo eyetie ke obio ubɔŋ Ete mi; iŋ, idaresit mbufo ɔyɔyɔhɔ, kpa nte Ete ɔnɔde mi uyɔhɔ idaresit; ndien mbufo eyetie kpa nte ami ntiede, ndien ami ntie kpa nte Ete; ndien ami ye Ete idi kiet;

11 Ndien Edisana Spirit etie ntiense abaŋa Ete ye ami; ndien Ete ɔnɔ nditɔ owo Edisana Spirit, ke ntak mi.

12 Ndien edikem ete ke ini Jesus amaketiŋ mme ikɔ emi, enye otuk owo mmɔ kiet kiet ye nnuen-ubɔk esie ibɔhɔke owo ita oro emi ekenade nte esuhɔ, ndien enye adaha.

13 Ndien esese, mme heaven ema ekubɔde, ndien ema ekpobi mmɔ eda edɔk eduk heaven, enyuŋ ekut enyuŋ ekop mme ŋkpɔ emi owo mikemeke nditiŋ.

14 Ndien ema ekpan mmɔ ete mmɔ ekutiŋ; ŋko Jehovah ikinɔhɔ mmɔ odudu ete mmɔ etiŋ mme ŋkpɔ emi mmɔ ekekutde enyuŋ ekopde;

15 Ndien mme mmɔ ekedu ke ikpɔkidem mme ema esio ke ikpɔkidem, mmɔ ikifiɔkke; koro eketie mmɔ nte edikpuhɔde mbiet man mmɔ editabi mkpa, ete ke ema ekpuhɔ idem obukidem emi esin ke idaha emi mikemeke ndikpa, man mmɔ ekan ekut mme ŋkpɔ Abasi.

16 Edi edikem ete ke mmɔ ema efiak enam utom ke iso isɔŋ; edi mmɔ ikinamke utom ibaŋa mme ŋkpɔ emi mmɔ ekekopde enyuŋ ekutde, ke ntak ibet emi ekenɔde mmɔ ke heaven.

17 Ndien idahaemi, mme mmɔ ekedi eke mkpa mme emi mikemeke ndikpa, tɔŋɔ ke edikpuhɔde mbiet man editabi mkpa mmɔ, ami mfiɔkke;

18 Edi emi ke ami mfiɔk, nte asaŋade ye ŋwed emi ekewetde—mmɔ ema eka ke iso isɔŋ, enyuŋ enam utom enɔ kpukpru owo, eda kpa nte ediwak owo emi edibuɔtde idem ke ukwɔrɔ ikɔ mmɔ edi ufɔk Abasi; enim mmɔ uduɔkmmɔŋ, ndien kpa nte ediwak emi ekenade uduɔkmmɔŋ ema ebɔ Edisana Spirit.

19 Ndien mmɔ emi mikidukke ufɔk Abasi ema etop mmɔ esin ke ufɔk ŋkpɔkɔbi. Ndien mme ufɔk ŋkpɔkɔbi ikikanke imum mmɔ, koro mmɔ ema esiaha ke mbak iba.

20 Ndien ema etop mmɔ esin ke obube; edi mmɔ ema emia isɔŋ ye ikɔ Abasi, tutu ete ke odudu esie amanam mmɔ ebɔhɔ ewɔrɔ ke esit isɔŋ; ndien ke ntak oro mmɔ ikikanke itibi mme obube etuŋɔde ekem ndimum mmɔ.

21 Ndien ikata ema etop mmɔ esin ke akamba ikaŋ edi idaha unan.

22 Ndien ikaba ke eketop mmɔ esin ke obube mme unam ikɔt; ndien sese mmɔ ema ebre mbre ye mme unam ikɔt nte ekpri eyen ebre ye eyen-erɔŋ, edi idaha unan.

23 Ndien edikem ete ke ntem ke mmɔ ekeka ke otu kpukpru ikɔt Nephi, enyuŋ ekwɔrɔ gospel Christ enɔ kpukpru owo ke iso isɔŋ; ndien mmɔ ema ekabade esit enɔ Jehovah, enyuŋ eduk ufɔk Abasi Christ, ndien ke ntem ema ediɔŋ mbon emana oro, nte asaŋade ye ikɔ Jesus.

24 Ndien idahaemi ami, Moroni, metre nditiŋ ikɔ mbaŋa mme ŋkpɔ emi ke esisit ini.

25 Sese, ami nkoyom ndiwet mme enyiŋ mbon emi mikinaha etabi mkpa, edi Jehovah ama akpan; ke ntak oro ami nwetke mmɔ, koro edipde ererimbot mmɔ.

26 Edi sese, ami mokut mmɔ, ndien mmɔ enam utom enɔ mi.

27 Ndien sese mmɔ eyedu ke otu mme Gentile, ndien mme Gentile idifiɔkke mmɔ.

28 Mmɔ eyedu ŋko ke otu mme Jew, ndien mme Jew idifiɔkke mmɔ.

29 Ndien eyedikem, ke ini Jehovah edikutde ke ifiɔk esie ke ɔfɔn ete mmɔ enam utom enɔ kpukpru mme esien Israel emi ekesuanade, ye kpukpru mme idut, mme iman, mme usem ye mme owo, enyuŋ eda ediwak ukpɔŋ ke otu mmɔ esɔk Jesus, man uduak mmɔ osu, ye ŋko ke ntak odudu Abasi ndinam mme owo ekabade esit emi odude ke mmɔ.

30 Ndien mmɔ ebiet mme angel Abasi, ndien edieke mmɔ edibɔŋde akam inɔ Ete ke enyiŋ Jesus mmɔ eyekan ewut owo ekededi emi ɔfɔnde ye mmɔ idem mmɔ.

31 Ke ntak oro, mmɔ eyenam akamba ye mme utibe utom, mbemiso akwa ye usen emi edidide ke ini kpukpru owo anade nte eda ke iso itie-ikpe Christ;

32 Iŋ kpa ke otu mme Gentile ke mmɔ edinam akamba ye utibe utom, mbemiso usen ubiere ikpe oro.

33 Ndien edieke mbufo ekpenyenede kpukpru mme ŋwed Abasi emi enɔde mbuk kpukpru mme utibe utom Christ, mbufo eye, nte asaŋade ye mme ikɔ Christ, efiɔk ete ke akpanikɔ ke mme ŋkpɔ emi ena etibe.

34 Ndien ɔyɔdɔdiɔk ɔnɔ enye emi midikpaŋke utɔŋ inɔ mme ikɔ Jesus, ye ŋko mmɔ emi enye emekde onyuŋ ɔdɔŋde ke otu mmɔ; koro owo ekededi emi minimke mme ikɔ Jesus ye mme ikɔ mbon oro enye ɔdɔŋde inimke enye; ndien ke ntak oro enye idinimke mmɔ ke akpatre usen;

35 Ndien ɔkpɔfɔn akan ɔnɔ mmɔ edieke mmɔ mikamanake. Koro ndi mbufo ekere ete ke emekeme ndifep nnen nnen ido Abasi emi eyatde esit, emi edighide ke idak ikpat mme owo, man otodo edinyaŋa edi?

36 Ndien idahaemi sese, nte ami nketiŋde kabaŋade mbon emi Jehovah ekemekde, iŋ, kpa ita emi ekekpobide eda edɔk ke esit mme heaven, ete ke ami nkɔfiɔkke mme ema enam mmɔ esana tɔŋɔ ke emi enyenede ndikpa sim uwem emi mkpa miduhe—

37 Edi sese, tɔŋɔ ami nkewet, ami mobup Jehovah, ndien enye ayarade ɔnɔ mi ete ke ana nte enam ukpuhɔde odu ke idem mmɔ, midighe ntre ana nte mmɔ etabi mkpa;

38 Ke ntak oro, man mmɔ ekutabi mkpa ema enam ukpuhɔde odu ke idem mmɔ, man mmɔ ekunyene ubiak mme ukut ibɔhɔke ekedi ke ntak mme idiɔk ŋkpɔ ererimbot.

39 Idahaemi ukpuhɔde emi ikidighe ukem ukem ye enye emi edidade itie ke akpatre usen; edi ema enam ukpuhɔde odu ke idem mmɔ, tutu ete ke Satan ikanke inyene odudu ke idem mmɔ, ete ke enye ikikanke idomo mmɔ; ndien ema enam mmɔ esana ke obukidem, ete ke mmɔ ema esana, ndien ete ke mme odudu ererimbot ikikanke imum mmɔ.

40 Ndien ke idahaemi ke akana nte mmɔ edu tutu ubiereikpe Christ; ndien akana nte mmɔ enyene ukpuhɔde emi okponde akan, ndien ndida mmɔ ke esit obio ubɔŋ Ete man ekufiak uwɔrɔ aba, edi ndiduŋ ye Abasi ke nsinsi ke mme heaven.