1 Idahaemi edikem ete ke ɔyɔhɔ isua anaŋ ye duop ye kiet ama ebe ndien ekedi isua ikie itiokiet tɔŋɔ ke ini emi Lehi ɔkɔ ɔkpɔŋde Jerusalem; ndien ekedi ke isua emi Lachoneus ekedide ada ibuot mme ebiere ikpe ye andikara ke isɔŋ oro.

2 Ndien Nephi, eyen Helaman, ama ɔwɔrɔ ke isɔŋ Zarahemla, ndien ama ɔnɔ eyen esie Nephi uyo, emi ekedide eyen esie emi oko okponde akan, kabaŋa mme usan brass, ye kpukpru mme ŋwed emi ekenimde, ye kpukpru mme ŋkpɔ emi ekenimde edisana tɔŋɔ ke ediwɔrɔ Lehi ke Jerusalem.

3 Ndien enye ɔwɔrɔ ke isɔŋ oro, ndien ebiet emi enye akakade owo ifiɔkke; ndien eyen esie Nephi ama enim mme ŋwed ke ebiet esie, iŋ, ŋwed ikɔt esie.

4 Ndien edikem ke ntɔŋɔ ɔyɔhɔ isua anaŋ ye duop ye iba, sese, mme prophecy mme prophet etɔŋɔ ndisu ɔyɔhɔ ɔyɔhɔ; koro ikpɔ idiɔŋɔ ema etɔŋɔ ndidu ndien enam ikpɔ utibe ŋkpɔ ke ufɔt mme owo.

5 Edi usuk ema edu emi eketɔŋɔde ndidɔhɔ ete ke ini ama ebe ɔnɔ mme ikɔ ndisu, emi Samuel, owo Lamanite, eketiŋde.

6 Ndien mmɔ etɔŋɔ ndidara mbaŋa nditɔ eka mmɔ, ete: Esese ini ebe, ndien mme ikɔ Samuel isuhu; ke ntak oro, idaresit mbufo ye mbuɔtidem mbufo kabaŋade ŋkpɔ emi edi ke ikpikpu.

7 Ndien edikem ete ke mmɔ ema enam ndutime ke ofuri isɔŋ oro; ndien mbon emi ekebuɔtde idem etɔŋɔ ndifuhɔ eti eti, mbak ke ntak ndomo kiet mme ŋkpɔ emi eketiŋde iditibeke.

8 Edi sese, mmɔ ema etiŋ-enyin ebet usen oro ye okoneyo oro ye usen oro emi editiede nte usen kiet nte ke okoneyo iduhe, man mmɔ efiɔk ete ke mbuɔtidem mmɔ iikidighe ke ikpikpu.

9 Idahaemi edikem ete ke ama odu usen emi mbon unana mbuɔtidem ekesiode enim, ete ke kpukpru mbon emi ekebuɔtde idem ke mme ido oro ke ana ewot ibɔhɔke idiɔŋɔ oro etibe, emi prophet Samuel ɔkɔnɔde.

10 Idahaemi edikem ete ke ini Nephi, eyen Nephi, okokutde ibak ikɔt esie, esit esie ama ɔfuhɔ eti eti.

11 Ndien edikem ete enye ama ɔwɔrɔ aka okonyuŋ osuk ibuot esie ke isɔŋ, ndien eseme ke ɔkpɔsɔŋ ɔnɔ Abasi esie ke ibuot ikɔt esie, iŋ, mbon emi akanade nte ewot ke ntak mbuɔtidem mmɔ ke ido mme ete mmɔ.

12 Ndien edikem ete enye eseme ke ata ɔkpɔsɔŋ ɔnɔ Jehovah ke ofuri usen oro; ndien sese, uyo Jehovah edi etiene enye, ete:

13 Menere ibuot fo nyuŋ daraesit; koro sese, ini edikpere, ndien ke okoneyo emi ke edinɔ idiɔŋɔ oro, ndien mkpɔŋ ke ami ndididuk ererimbot, man ŋwut ererimbot nte ke ami nyenam kpukpru se ami nnamde nte etiŋ ke inua ndisana prophet mi.

14 Sese, ami kendi ntiene okimmɔŋ, man nnam kpukpru ŋkpɔ emi ami nkanamde nditɔ owo efiɔk tɔŋɔ ke editɔŋɔ ererimbot, ye ndinam uduak, eke Ete ye eke Eyen mbiba—eke Ete ke ntak mi, ye eke Eyen ke ntak obukidem mi. Ndien sese, ini edikpere, ndien ke okoneyo emi ke edinɔ idiɔŋɔ oro.

15 Ndien edikem ete mme ikɔ emi Nephi ɔkɔbɔde ama osu, nte eketiŋde mmɔ; koro sese, ekim ikiduhe ke usop utin; ndien idem ama ɔtɔŋɔ ndikpa mme owo koro ekim ikiduhe ke ini okoneyo ekedide.

16 Ndien ediwak ema edu, emi mikibuɔtke idem ke mme ikɔ mme prophet, emi ekeduɔde ke isɔŋ enyuŋ etiede nte mmɔ ekpa, koro mmɔ ema efiɔk ke akwa uduak nsobo emi mmɔ ekenimde enɔ mbon emi ekebuɔtde idem ke mme ikɔ mme prophet ama abiara; koro idiɔŋɔ emi ekenɔde ama osu.

17 Ndien mmɔ etɔŋɔ ndifiɔk ete ke Eyen Abasi ɔyɔsɔp edi; iŋ, ke akpatre, kpukpru owo ke iso ofuri isɔŋ tɔŋɔ ke edem usop utin sim edem usiaha utin, ke edem edere ye ke isɔŋ usuk usuk mbiba, ema edu ke mkpa idem eti eti tutu mmɔ eduɔ ke isɔŋ.

18 Koro mmɔ ema efiɔk ete ke mme prophet ema etie ntiense ebaŋa mme ŋkpɔ emi ke ediwak isua, ndien ete ke idiɔŋɔ emi ekenɔde ama etibe; ndien mmɔ etɔŋɔ ndifehe ndik ke ntak ukwaŋ-ŋkpɔ mmɔ ye unana mbuɔtidem mmɔ.

19 Ndien edikem ete ke ekim ikiduhe ke ofuri okoneyo oro, edi akayama nte ekedi uwemeyo. Ndien edikem ete utin ama afiak asiaha ke usenubɔk, nte nnen nnen utɔ esie edide; ndien mmɔ ema efiɔk ete ke ekedi usen emi anade nte Jehovah amana, ke ntak idiɔŋɔ emi ekenɔde.

20 Ndien ama edikem, iŋ, kpukpru ŋkpɔ, ofuri-ofuri, nte mme ikɔ mme prophet edide.

21 Ndien edikem ŋko ete obufa ntanta-ɔfiɔŋ ama ɔwɔrɔ, nte ikɔ ekedide.

22 Ndien edikem ete tɔŋɔ ke ini emi ka iso mme nsu etɔŋɔ ndidu emi, Satan, ɔdɔŋde ke ufɔt mme owo, ndisɔŋ esit mmɔ, man mmɔ ekubuɔt idem ke mme idiɔŋɔ oro ye mme utibe ŋkpɔ emi mmɔ ekekutde; edi ke misehe mme nsu ye mme abiaŋa emi, ubak mme owo emi ekewakde ekan ema ebuɔtidem enyuŋ ekabade esit enɔ Jehovah.

23 Ndien edikem ete ke Nephi ama aka ke ufɔt mme owo, ŋko ye ediwak eken, eduɔk mmɔŋ man ekabade esit, ke ntak emi akwa usio ke mme idiɔk ŋkpɔ ama odu. Ndien ke ntem mme owo ekefiak etɔŋɔ ndinyene emem ke isɔŋ oro.

24 Ndien mme eneni ikiduhe, ibɔhɔke ekedi owo ifaŋ emi eketɔŋɔde ndikwɔrɔ, edomo ndida ŋwed Abasi nwut ete ke ikifɔnke aba ndinim mbet Moses. Idahaemi ke ŋkpɔ emi mmɔ ema edue, ke ntak emi ŋwed Abasi mikiŋwaŋake mmɔ.

25 Edi edikem ete ke mmɔ ema esɔp ekabade esit, ndien ema efiɔk ebaŋa ndudue mmɔ emi mmɔ ekanamde, koro ema enam mmɔ efiɔk ete ke mbet isuhu, ndien ke ana nte osu ofuri-ofuri; iŋ, ikɔ ama esim mmɔ ete ke ana nte osu; iŋ, ete ke ntɔi kiet mme ekpri idibehe ifep tutu kukpuru osu; ke ntak oro kpa ke isua emi ke ekeda mmɔ edi ifiɔk ndudue mmɔ ndien ema eyarade mme ndudue mmɔ.

26 Ndien ke ntem ke ɔyɔhɔ isua anaŋ ye duop ye iba ekebe, ada nti mbuk idara ɔnɔ mme owo ke ntak mme idiɔŋɔ emi eketibede, nte mme ikɔ prophecy eke kpukpru ndisana prophet ekedide.

27 Ndien edikem ete ke ɔyɔhɔ isua anaŋ ye duop ye ita ama ebe ŋko efep ke emem, ibɔhɔke ekedi mme inɔ Gadianton, emi ekeduŋde ke mme obot, emi ekeyɔhɔde isɔŋ oro; koro mme ebiet mmɔ ye mme ndedibe ebiet mmɔ ema esɔŋ tutu mme owo ikikemeke ndikan mmɔ; ke ntak oro mmɔ ema enam ediwak uwot owo, enyuŋ ewot ediwak mme owo ke ufɔt owo.

28 Ndien edikem ete ke ɔyɔhɔ isua anaŋ ye duop ye inaŋ mmɔ ema etɔŋɔ nditɔt akwa akwa, koro ediwak mbon emi ekewɔrɔde ekpɔŋ mme Nephite ema edu emi ekefehede etiene mmɔ, emi akanamde ɔkpɔsɔŋ mfuhɔ odu ɔnɔ mme Nephite emi ekesuhɔde ke isɔŋ oro.

29 Ndien ama oduŋko ntak ɔkpɔsɔŋ mfuhɔ ke ufɔt mme Lamanite; koro sese, mmɔ ema enyene ediwak nditɔ emi ekekɔride ndien etɔŋɔ ndikop odudu ke isua, tutu mmɔ eda ke idem mmɔ, ndien usuk emi ekedide mbon Zorami ema eda mmɔ ewɔrɔ, ke mme nsu mmɔ ye mme nnem inua mmɔ, man ediana ye mme inɔ Gadianton oro.

30 Ndien ke ntem ke mme Lamanite ekekut ukut ŋko, ndien etɔŋɔ ndikpri ke mbuɔtidem mmɔ ye nnen nnen ido, ke ntak ibak emana emi ekɔride edi.