1 Ndien edikem ete enye ɔnɔ otuowo oro uyo ete mmɔ etre ndibɔŋ akam, ye ŋko mme mbet esie. Ndien enye ɔnɔ mmɔ uyo ete yak mmɔ ekutre ndibɔŋ akam ke esit mmɔ.

2 Ndien enye ɔnɔ mmɔ uyo ete mmɔ edaha eda enyuŋ eda ke ikpat mmɔ. Ndien mmɔ ema edaha eda enyuŋ eda ke ikpat mmɔ.

3 Ndien edikem ete ke enye ama obuŋ uyo onyuŋ ɔdiɔŋ enye, onyuŋ ɔnɔ mme mbet esie ete eta.

4 Ndien ke ini mmɔ ema eketa enye ɔnɔ mmɔ uyo ete mmɔ ebuŋ uyo, enyuŋ enɔ otuowo.

5 Ndien ke ini mmɔ ema ekenɔ otuowo enye ŋko ɔnɔ mmɔ wine ete eŋwɔŋ, onyuŋ ɔnɔ mmɔ uyo ete yak mmɔ enɔ otuowo.

6 Idahaemi, uyo ikiduhe, mme wine, emi mme mbet ekedade edi, mme otuowo;

7 Edi ke akpanikɔ enye ama ɔnɔ mmɔ uyo ete eta, ye ŋko wine ete eŋwɔŋ.

8 Ndien enye ɔdɔhɔ mmɔ ete: Enye emi atade uyo emi ata idem mi ɔnɔ ukpɔŋ esie; ndien enye emi ɔŋwɔŋde wine emi ɔŋwɔŋ iyip mi ɔnɔ ukpɔŋ esie; ndien ukpɔŋ esie idikpaha biɔŋ idinyuŋ isatke itɔŋ, edi ɔyɔyuhɔ.

9 Idahaemi, ke ini otuowo ema eketa enyuŋ eŋwɔŋ ema, sese, mmɔ ema eyɔhɔ ye Spirit; ndien mmɔ ema efiori ye uyo kiet, enyuŋ enɔ Jesus ubɔŋ, emi mmɔ ekekutde ekenyuŋ ekopde.

10 Ndien edikem ete ke ini kpukpru mmɔ ema ekenɔ Jesus ubɔŋ, enye ɔdɔhɔ mmɔ ete: Esese idahaemi ami mekure mbet emi Ete ɔkɔnɔde mi uyo kabaŋade mbon emi, emi edide nsuhɔ ufɔk Israel.

11 Mbufo emeti ete ke ami mmantiŋ nnɔ mbufo, nyuŋ ndɔhɔ nte ke ini mme ikɔ Isaiah edisude—esese ewet mmɔ, mbufo emenyene mmɔ ke iso mbufo, ke ntak oro eduŋɔde mmɔ—

12 Ndien ke akpanikɔ, ke akpanikɔ, ami ndɔhɔ mbufo, nte ke ini mmɔ edisude ke ediomi emi Ete akanamde ɔnɔ ikɔt esie osu, O ufɔk Israel.

13 Ndien ke ini oro ke mme nsuhɔ, emi edisuanade ke aŋwa ke iso isɔŋ, ediboho ito ke usiahautin ye ke usop utin, ŋko ke usuk ye ke edere; ndien eyeda mmɔ edi ifiɔk Jehovah Abasi mmɔ, emi akafakde mmɔ.

14 Ndien Ete ama ɔnɔ mi uyo ete yak ami nnɔ mbufo isɔŋ emi, nte inyene mbufo.

15 Ndien ami ndɔhɔ mbufo, nte ke edieke mme Gentile mikabakede esit ke mmɔ ema ekebɔ edidiɔŋ emi, ke ini mmɔ ema ekesuan ikɔt mi—

16 Ke ini oro ke mbufo, emi edide nsuhɔ ufɔk Jacob, edika iso ke otu mmɔ; ndien mbufo eyedu ke otu mmɔ emi ediwakde; ndien mbufo eyedu ke otu mmɔ nte lion odude ke otu unam ikɔt, ye nte eyen lion odude ke otu mme udim erɔŋ, emi, edieke enye asaŋade ebe mbiba edighi onyuŋ awak ke mbai, ndien owo ndomo kiet ikemeke ndinam ɔbɔhɔ.

17 Ubɔk mbufo eyemenede abaŋa mme asua mbufo, ndien eyesibe kpukpru mme asua mbufo esio.

18 Ndien ami nyebok ikɔt mi ɔtɔ kiet nte owo obonde ebek ke ɔtɔ ubek-ibokpot.

19 Koro ami nyanam ikɔt mi emi Ete okodiomide ye mmɔ, iŋ, Ami nyanam nnuk mbufo edi ukwak, nyonyuŋ nnam mbara ukot mbufo edi brass. Ndien mbufo eyemia ke mbai ediwak mme idut; ndien Ami nyosio udori mmɔ nnim nnɔ Jehovah, ye inyene mmɔ nnɔ Jehovah ofuri ererimbot. Ndien esese, ami ndi enye emi anamde enye.

20 Ndien eyedikem, Ete ɔdɔhɔ, ete ke akaŋkaŋ edinen ido mi ɔyɔkɔŋɔ mmɔ ke usen oro; ndien ibɔhɔke mmɔ ekabade esit enye eyedoro mmɔ ke idem, Ete ɔdɔhɔ, iŋ, kpa ke ofuri mme idut mme Gentile.

21 Ndien eyedikem ete ke Ami nyesiak ikɔt mi, O ufɔk Israel.

22 Ndien esese, mbon emi ke ami ndisiak ke isɔŋ emi, man ediomi emi ami nkanamde ye ete mbufo Jacob osu; ndien enye eyedi Obufa Jerusalem. Ndien mme odudu heaven eyedu ke otu mbon emi; iŋ, kpa Ami nyodu ke otu mbufo.

23 Esese, ami ndi enye emi Moses eketiŋde abaŋa, ete: Jehovah Abasi mbufo eyemenede prophet ɔnɔ mbufo ke otu nditɔ eka mbufo, nte ami, enye ke mbufo edikop ke kpukpru ŋkpɔ ekededi emi enye editiŋde inɔ mbufo. Ndien eyedikem ete ke eyesibe kpukpru ukpɔŋ emi midikopke prophet oro esio ke otu mme owo.

24 Ke akpanikɔ ke ami ndɔhɔ mbufo, iŋ, ye kpukpru mme prophet tɔŋɔ ke Samuel ye mbon emi etienede enye ke edem, kpa nte ediwak emi eketiŋde ikɔ, etie ntiense ebaŋa mi.

25 Ndien esese, mbufo edi nditɔ mme prophet oro; ndien mbufo edi eke ufɔk Israel; ndien mbufo edi eke ediomi emi Ete akanamde ye mme ete mbufo, ɔkɔdɔhɔde Abraham ete: Ndien ke ubon mbufo ke edidiɔŋ ofuri iman ererimbot.

26 Ke Ete amakebem iso emenede mi ɔnɔ mbufo, onyuŋ ɔdɔŋ mi ete ndiɔŋ mbufo ke ndikabade owo mbufo kiet kiet ke mme ukwaŋ-ŋkpɔ mbufo mfep; ndien emi koro mbufo edide nditɔ ediomi—

27 Ndien ke oro amakebe ema ediɔŋ mbufo ndien Ete anam ediomi osu emi enye akanamde ye Abraham, ete: Ke ubon fo ke edidiɔŋ ofuri iman ke ererimbot—ke ndinɔ mme Gentile Edisana Spirit nto ke ami, edidiɔŋ mme Gentile emi edinamde mmɔ ekpon ekan kpukpru mme owo, ke ndisuan ikɔt mi, O ufɔk Israel.

28 Ndien mmɔ eyedi mbon mfina enɔ mbio-obio emi. Edi, ke ini mmɔ edibɔde ɔyɔhɔ gospel mi, ndien edieke mmɔ edisɔŋde esit mmɔ ye ami ami nyafiak nyak mme ukwaŋ-ŋkpɔ mmɔ ndori ke ibuot mmɔ, Ete ɔdɔhɔ.

29 Ndien ami nyeti ediomi emi ami nnamde ye ikɔt mi; ndien ami manam ediomi ye mmɔ nte ke ami nyebok mmɔ ɔtɔ kiet ke ekemini mi, nte ke ami nyafiak nnɔ mmɔ isɔŋ mme ete mmɔ nte inyene mmɔ, emi edide isɔŋ Jerusalem, emi edide isɔŋ eŋwɔŋɔ ɔnɔ mmɔ ke nsinsi, Ete ɔdɔhɔ.

30 Ndien eyedikem ete ke ini kedi, emi edikwɔrɔde ɔyɔhɔ gospel mi inɔ mmɔ;

31 Ndien mmɔ eyebuɔtidem ke ami, ete ke ami ndi Jesus Christ, Eyen Abasi, eyenyuŋ ebɔŋ akam enɔ Ete ke enyiŋ mi.

32 Ke ini oro ke mbon ukpeme mmɔ edimenede uyo mmɔ, ndien ye uyo kiet ke mmɔ edikwɔ; koro mmɔ eyekut enyin ke enyin.

33 Ke ini oro ke Ete edifiak ibok mmɔ ɔtɔ kiet, inyuŋ inɔ mmɔ Jerusalem nte isɔŋ inyene mmɔ.

34 Ke ini oro ke mmɔ eyebumede ke idaresit—Ekwɔ ye uyo kiet, mbufo mme ŋwure ebiet Jerusalem; koro Ete amadɔŋ ikɔt esie esit, enye amafak Jerusalem.

35 Ete ama ayarade edisana ubɔk esie ke enyin ofuri idut; ndien ofuri utit ererimbot eyekut erinyaŋa Ete; ndien Ete ye ami idi kiet.

36 Ndien ke ini oro ke edinam etibe se ekewetde ete: Demede, fiak demede, nyuŋ sine odudu fo, O Zion; sine mme ndiye ɔfɔŋ fo, O Jerusalem, edisana obio, koro tɔŋɔ ke emi owo emi minaha mbobi ye emi misanake idifiakke iduk fi ke idem.

37 Keŋ ntan sio ke idem fo; daha ke enyɔŋ, tetie ke isɔŋ; tat mme uruk itɔŋ fo ke idem fo, O eyenaŋwan ŋkpɔkɔbi Zion.

38 Koro ntem ke Jehovah ɔdɔhɔ ete: Mbufo emenyam idem mbufo ke ikpikpu, ndien ididaha okuk ifak mbufo.

39 Ke akpanikɔ, ke akpanikɔ, ke ami ndɔhɔ mbufo, nte ke ikɔt mi eyefiɔk enyiŋ mi; iŋ, ke usen oro mmɔ eyefiɔk ete ke ami ndi etiŋikɔ.

40 Ndien ke ini oro ke mmɔ edidɔhɔ ete: Ikpat owo nti mbuk eye didie ke enyɔŋ ikpɔ obot ɔnɔ mmɔ, emi ekwɔrɔde emem; emi edade nti mbuk eti edi, emi ekwɔrɔde edinyaŋa; emi edɔhɔde Zion ete: Abasi fo ada ukara!

41 Ndien ini oro ke edidɔhɔ ete: Mbufo edaha, mbufo edaŋa, eŋwɔŋɔ do, ekutuk se misanake; eŋwɔŋɔ ke otu esie; mbufo esana emi ebiomde mme ŋkpɔ utom Jehovah.

42 Koro mbufo midiwɔrɔke ke ibumede mme ke itɔk; koro Jehovah eyebem mbufo iso, ndien Abasi Israel eyesaŋa mbufo ke edem.

43 Esese, asaŋautom mi ayanam ɔniɔŋ-ɔniɔŋ; eyenɔ ukpono enyuŋ etoro enye onyuŋ okoŋ eti eti.

44 Kpa nte ediwak owo ekekpade idem ebaŋa fi—iso esie abiara, akan eke owo ndomo kiet, ndien uyai esie abiara akan eke nditɔ owo—

45 Ntre ke enye edisime ediwak mme idut; ndidem eyekibi inua mmɔ enɔ enye, koro se owo mikitiŋke inɔ mmɔ ke mmɔ edikut; ndien se mmɔ mikikopke ke mmɔ edikere.

46 Ke akpanikɔ, ke akpanikɔ, ke ami ndɔhɔ mbufo, kpukpru mme ŋkpɔ emi ke akpanikɔ eyetibe, kpa nte Ete ɔkɔnɔde mi uyo. Ke ini oro ke ediomi emi Ete okodiomide ye ikɔt esie edisu; ndien ke ini oro ke ikɔt mi edifiak iduŋ ke Jerusalem, ndien enye eyedi isɔŋ inyene mmɔ.