1 Ndien edikem ete Jesus ɔnɔ mme mbet esie uyo ete mmɔ eda uyo ye wine esɔk imɔ.

2 Ndien ke ini mmɔ ekekade ndida uyo ye wine ndi, enye ɔnɔ otu owo uyo ete mmɔ etetie ke isɔŋ.

3 Ndien ke ini mme mbet ema ekeda uyo ye wine edi, enye ɔbɔ uyo onyuŋ obuŋ onyuŋ ɔdiɔŋ enye; ndien enye ayak ɔnɔ mme mbet onyuŋ ɔnɔ uyo ete mmɔ eta.

4 Ndien ke ini mmɔ ema eketa enyuŋ eyuhɔ, enye ɔnɔ uyo ete mmɔ enɔ otu owo.

5 Ndien ke ini otu owo ema eketa enyuŋ eyuhɔ, enye ɔdɔhɔ mme mbet ete: Esese eyenim owo kiet ke otu mbufo, ndien enye ke ami ndinɔ odudu nte enye obuŋ uyo onyuŋ ɔdiɔŋ enye onyuŋ ɔnɔ mbon ufɔk Abasi mi, ɔnɔ kpukpru mbon emi edibuɔtde idem enyuŋ eduɔk mmɔŋ ke enyiŋ mi.

6 Ndien emi ke mbufo edikpeme ndinam, kpa nte ami nnamde, kpa nte ami mbuŋde uyo nyuŋ ndiɔŋde enye ndien nnɔ mbufo.

7 Ndien emi ke mbufo edinam ke nditi ikpɔk-idem mi, emi ami ŋwutde mbufo. Ndien enye eyedi ntiense ɔnɔ Ete ete ke mbufo emeti mi kpukpru ini. Ndien edieke mbufo etide mi kpukpru ini, mbufo eyenyene Spirit mi ye mbufo.

8 Ndien edikem ete ke ini enye etiŋde mme ikɔ emi, enye ama ɔnɔ mme mbet esie uyo ete mmɔ emen wine ke cup enyuŋ eŋwɔŋ, ndien ete yak mmɔ ŋko enɔ otu owo man mmɔ eŋwɔŋ.

9 Ndien edikem ete ke mmɔ ema enam ntre, ndien eŋwɔŋ enye, enyuŋ eyuhɔ; ndien mmɔ enɔ otu owo, ndien mmɔ eŋwɔŋ, enyuŋ eyuhɔ.

10 Ndien ke ini mme mbet ema ekenam emi, Jesus ɔdɔhɔ mmɔ ete: Ɔfɔfɔn ɔnɔ mbufo ke ntak ŋkpɔ emi mbufo enamde, koro emi edi ndinam mme ibet mi osu, ndien emi edi ntiense ɔnɔ Ete ete ke mbufo emeyom ndinam se ami nnɔde mbufo uyo.

11 Ndien emi ke mbufo edinam kpukpru ini inɔ mbon emi ekabarede esit enyuŋ eduɔkde mmɔŋ ke enyiŋ mi; ndien mbufo edinam emi ke nditi iyip mi, emi ami nduɔkde mbaŋa mbufo, man mbufo edi ntiense enɔ Ete ete ke mbufo emeti mi kpukpru ini. Ndien edieke mbufo etide mi kpukpru ini, mbufo eyenyene Spirit mi ye mbufo.

12 Ndien ami nnɔ mbufo ibet nte yak mbufo enam mme ŋkpɔ emi. Ndien ɔfɔfɔn ɔnɔ mbufo edieke mbufo edinamde mme ŋkpɔ emi kpukpru ini, koro ebɔp mbufo ke itiat mi.

13 Edi owo ekededi ke otu mbufo emi edinamde se ikpride mme awakde akan emi ibɔpke ke itiat mi, edi ɔbɔp ke enyɔŋ ntan; ndien ke ini edim edepde, ndien mme mmɔŋ-ukwɔ edi, ndien mme ofum ebara, enyuŋ emia mmɔ, mmɔ eyeduɔ, ndien mme inua-otop hell eberede ebeŋe-idem ndibɔ mmɔ.

14 Ke ntak oro ɔfɔfɔn ɔnɔ mbufo edieke mbufo edinimde mme ibet mi, emi Ete ɔnɔde mi uyo ete yak ami nnɔ mbufo.

15 Ke akpanikɔ, ke akpanikɔ, ke ami ndɔhɔ mbufo, ana nte mbufo ekpeme, enyuŋ ebɔŋ akam kpukpru ini, mbak satan ididomo mbufo, inyuŋ ida mbufo iwɔrɔ nte mbon ŋkpɔkɔbi.

16 Ndien nte ami mbɔŋde akam ke otu mbufo kpa ntre ke mbufo edibɔŋ akam ke ufɔk Abasi mi, ke otu ikɔt mi emi ekabarede esit enyuŋ eduɔde mmɔŋ ke enyiŋ mi. Esese ami ndi uŋwana; ami menim uwut-ŋkpɔ nnɔ mbufo.

17 Ndien edikem ete ke ini Jesus ama eketiŋ mme ikɔ emi ɔnɔ mme mbet esie, enye afiak ɔŋwɔŋɔde ese otu owo onyuŋ ɔdɔhɔ mmɔ ete:

18 Esese, ke akpanikɔ, ke akpanikɔ, ke ami ndɔhɔ mbufo, ana nte mbufo ekpeme, enyuŋ ebɔŋ akam kpukpru ini mbak mbufo ididuk ke idomo; koro Satan oyomde ndinyene mbufo, man enye asat mbufo nte wheat.

19 Ke ntak oro ana nte mbufo ebɔŋ akam kpukpru ini enɔ Ete ke enyiŋ mi.

20 Ndien ŋkpɔ ekededi emi mbufo edibeŋede Ete ke enyiŋ mi, emi edide nnen nnen, enimde ete ke mbufo eyebɔ, esese eyenɔ mbufo.

21 Ebɔŋ akam ke ufɔk mbufo enɔ Ete, kpukpru ini ke enyiŋ mi, man ediɔŋ iban mbufo ye nditɔ mbufo.

22 Ndien esese, mbufo eyesobo kiet ke ini ke ini; ndien mbufo idikpanke owo ndomo kiet nditiene mbufo ke ini mbufo edisobode kiet, edi eyak mmɔ etiene mbufo ekunyuŋ ukpan mmɔ;

23 Edi mbufo eyebɔŋ akam enɔ mmɔ, inyuŋ ibinke mmɔ isio; ndien edieke edide ete ke mmɔ edi etiene mbufo ke ini ke ini mbufo eyebɔŋ akam ebaŋa mmɔ enɔ Ete, ke enyiŋ mi.

24 Ke ntak oro, emenede ikaŋ mbufo man enye ayama ɔnɔ ererimbot. Esese ami ndi ikaŋ emi mbufo edimenerede—se mbufo ekutde nte ami nnamde. Esese mbufo emekut ete ke ami mɔbɔŋ akam nnɔ Ete, ndien kpukpru mbufo emetie ntiense.

25 Ndien mbufo emekut ete ke ami mɔnɔ uyo nte mbufo ndomo kiet ekunyɔŋ, edi mɔnɔ uyo nte yak mbufo edi etiene mi, man mbufo ekop enyuŋ ekut; kpa ukem oro ke mbufo edinam inɔ ererimbot; ndien owo ekededi emi edibiatde ibet emi, ayak eda enye esin ke idomo.

26 Ndien idahaemi edikem ete ke ini Jesus ama eketiŋ mme ikɔ emi, enye afiak ɔŋwɔŋɔde enyin esie ese mme mbet emi enye ekemekde, onyuŋ ɔdɔhɔ mmɔ ete:

27 Esese ke akpanikɔ, ke akpanikɔ, ke ami ndɔhɔ mbufo, ke ami mɔnɔ mbufo ibet efen, ndien ana nte ami nka mbine Ete mi man ami nnam mme ibet efen emi enye ɔnɔde mi.

28 Ndien idahaemi esese, emi edi ibet emi ami nnɔde mbufo, ete mbufo ukuyak owo ndomo kiet emi efiokde ete ke idotke, adia obukidem ye iyip mi, ke ini mbufo edinɔde enye;

29 Koro owo ekededi emi adiade onyuŋ ɔŋwɔŋde obukidem ye iyip mi ke midotke, adia onyuŋ ɔŋwɔŋ ubiom ikpe ɔnɔ ukpɔŋ esie; ke ntak oro edieke mbufo efiɔkde ke owo idotke ndidia nyuŋ ŋwɔŋ obukidem ye iyip mi ana nte mbufo ekpan enye.

30 Edi, mbufo idibinke enye isio ke otu mbufo, edi mbufo eyenam utom enɔ enye enyuŋ ebɔŋ akam ebaŋa enye enɔ Ete, ke enyiŋ mi; ndien edieke edide ete ke enye akabade esit onyuŋ ɔduok mmɔŋ ke enyiŋ mi, ke ini oro ke mbufo edibɔ enye, enyuŋ enɔ enye obukidem ye iyip mi.

31 Edi edieke enye mikabakede esit owo idibatke enye isin ke otu ikɔt mi, man enye idisobo ikɔt mi, koro esese ami mɔfiɔk erɔŋ mi, ndien ebat mmɔ.

32 Edi, mbufo idibinke enye isio ke mme synagogue mbufo, mme mme ebiet ukpono mbufo, koro utɔ mmɔ oro ke mbufo edika iso inam utom inɔ; koro mbufo ifiɔkke mme mmɔ eyenyɔŋ edi enyuŋ ekabade esit, enyuŋ etiene mi ye ɔyɔhɔ uduak ke esit, ndien ami nyɔkɔk mmɔ; ndien mbufo eyedi usuŋ ndida edinyaŋa nsɔk mmɔ.

33 Ke ntak oro, enim mme ikɔ emi ami nnɔde mbufo uyo man mbufo ukudu ke idak ubiom ikpe; koro ɔyɔdɔdiɔk ɔnɔ enye emi Ete obiomde ikpe.

34 Ndien ami nnɔ mbufo mme ibet emi ke ntak mme efaŋa emi odude ke otu mbufo. Ndien ɔfɔfɔn ɔnɔ mbufo edieke mbufo minyeneke mme efaŋa ke otu mbufo.

35 Ndien idahaemi ami nyɔŋ ntiene Ete, koro ɔfɔn ete yak ami nyɔŋ ntiene Ete ke ntak mbufo.

36 Ndien edikem ete ke ini Jesus ama eketre mme ikɔ emi, enye otuk ye ubɔk esie mme mbet emi enye ekemekde, kiet kiet, tutu enye otuk kpukpru mmɔ, onyuŋ etiŋ ikɔ ɔnɔ mmɔ nte enye otukde mmɔ.

37 Ndien otu owo ikikopke mme ikɔ emi enye eketiŋde, ke ntak oro mmɔ ikitiehe ntiense; edi mme mbet etie ntiense ete ke enye ama ɔnɔ mmɔ odudu ndinɔ Edisana Spirit. Ndien ami nyewut mbufo ke emi ama ekebe ete ke ikɔ ntiense emi edi akpanikɔ.

38 Ndien edikem ete ke ini Jesus ama okotuk kpukpru mmɔ, ntuhube enyɔŋ edi onyuŋ ofuk otu owo tutu mmɔ ikemeke ikut Jesus.

39 Ndien ke ini ɔkɔfukde mmɔ enye adaha ɔkpɔŋ mmɔ, onyuŋ ɔdɔk ke heaven. Ndien mme mbet ekut enyuŋ etie ntiense ete ke enye ama afiak ɔdɔk ke heaven.