1 Ndien idahaemi edikem ete ke mbon mme Nephite ema efiak ofuri ofuri enyɔŋ eka mme isɔŋ mmɔ ke ɔyɔhɔ isua edip ye itiokiet, kpukpru owo, ye ufɔk esie, ufene esie ye mme enaŋ esie, mme horse esie ye ufene esie, ndien kpukpru ŋkpɔ ekededi emi ekenyene mmɔ.

2 Ndien edikem ete ke mmɔ ikidiaha kpukpru mme ŋkpɔ udia mmɔ ima; ke ntak oro mmɔ ema eda ye mmɔ kpukpru se mmɔ mikidiaha, eke kpukpru mkpasip mmɔ ke utɔ ke utɔ, ye gold mmɔ, ye silver mmɔ, ye kpukpru ŋkpɔ uto mmɔ, ndien mmɔ ema efiak enyɔŋ eka mme isɔŋ mmɔ ye mme inyene mmɔ, ke edem edere ye ke usuk usuk mbiba, ke isɔŋ ke edem edere edere ye ke isɔŋ ke usuk usuk mbiba.

3 Ndien mmɔ ema enɔ mme inɔ oro emi ekedukde ke ediomi ndiduŋ ke emem ke isɔŋ oro, emi ekenyenede udɔŋ ndika iso ndi mme Lamanite, mme isɔŋ, nte ibat mmɔ edide, man mmɔ enyene, ye mme utom mmɔ, ndida ndu uwem; ndien ke ntem mmɔ ema esiak emem ke ofuri isɔŋ oro.

4 Ndien mmɔ efiak etɔŋɔ ndiforo enyuŋ ekɔri kɔkpɔsɔŋ; ndien ɔyɔhɔ isua edip ye itiokiet ye itiaba ama ebe efep, ndien akwa edidiana kiet ama odu ke isɔŋ oro; ndien mmɔ ema enam mme mbet mmɔ nte enende ye nte unen ikpe edide.

5 Ndien idahaemi ŋkpɔ ndomo kiet ikiduhe ndikpan mme owo ndika iso nkɔri, ibɔhɔke mmɔ eduɔ eduk ke ndudue.

6 Ndien idahaemi ekedi Gidgiddoni, ye ebiere ikpe, Lachoneus, ye mbon emi ekemekde nte mme ada usuŋ, edi mbon emi ekesiakde akwa emem emi ke isɔŋ oro.

7 Ndien edikem ete ke ema edu ediwak obio emi ekebɔpde obufa, ndien ediwak nkani obio ema edu emi ekediɔŋde.

8 Ndien ediwak ikpɔ usuŋ edu emi ekesiakde, ye ediwak usuŋ emi ekebɔpde, emi eketode obio kiet aka eken, ye isɔŋ kiet aka eken, ye ebiet kiet aka eken.

9 Ndien ke ntem ke ɔyɔhɔ isua edip ye itiaita ekebe efep, ndien mme owo ema enyene nkaiso emem.

10 Edi edikem ke ɔyɔhɔ isua edip ye usukkiet mme ŋfaŋa etɔŋɔ ndidu ke ufɔt mme owo; ndien usuk ema emenede ke ntaŋidem ye mme unam inua ke ntak ata ediwak inyene mmɔ, iŋ, tutu esim mme akwa ukɔbɔ;

11 Koro ediwak mme anyam urua ema edu ke isɔŋ oro, ŋko ye ediwak mme ɔfiɔk ibet, ye ediwak ikpɔ-owo ukara.

12 Ndien etɔŋɔ ndibahade mme owo ntiene idaha mmɔ, nte inyene mmɔ edide ye ufaŋ mmɔ ndifiɔk ŋkpɔ; iŋ, usuk ema enana ifiɔk ke ntak unana mmɔ, ndien mbon eken ema ebɔ akwa ukpep ŋkpɔ ke ntak inyene mmɔ.

13 Usuk ema emenede ke ntaŋidem, ndien usuk ema esuhɔde-idem ata eti eti; usuk ema ebɔrɔ idiɔk ikɔ ye idiɔk ikɔ, ke ini usuk ekebɔde idiɔk ikɔ ye ukɔbɔ ye utɔ kpukpru ukut, ndien isioho-usiene inyuŋ ifiakke isuŋi, edi esuhɔde-idem enyuŋ etua ŋkpɔfiɔk ke iso Abasi.

14 Ndien ke ntem akwa ubahade ama odu ke ofuri isɔŋ oro, tutu ete ke ufɔk Abasi ɔtɔŋɔ ndibahade; iŋ, tutu ete ke ɔyɔhɔ isua edip ye duop ke ufɔk Abasi ama abahade ke ofuri isɔŋ ibɔhɔke ekedi ke ufɔt mme Lamanite ifaŋ emi ekekabade esit enɔ mbuɔtidem akpanikɔ; ndien mmɔ ikidiaŋakere ikpɔŋ enye, koro mmɔ ema etiŋ enyin, enyuŋ esɔŋɔ eda, enyime ye ofuri ifik ndinim mme ibet Jehovah.

15 Idahaemi ntak ubahade mme owo ekedi emi—Satan ama enyene akwa odudu, ndidemede mme owo ete enam kpukpuru utɔ ukwaŋ-ŋkpɔ, ye ndiwut-idem ye ntaŋidem, edomo mmɔ ete eyom odudu, ye unen, ye mme inyene, ye mme ikpikpu ŋkpɔ ererimbot.

16 Ndien ke ntem Satan ama ada mme esit owo ɔwɔrɔ ete enam kpukpuru utɔ ukwaŋ-ŋkpɔ; ke ntak oro mmɔ ekenyene emem ke ekpri isua ifaŋ.

17 Ndien ke ntem, ke ntɔŋɔ ɔyɔhɔ isua edip ye duop—ke ema ekeyak mme owo enɔ ke ufaŋ anyan ini ete eda mmɔ usuŋ ke idomo satan eka ebiet ekededi emi enye oyomde ndida mmɔ nka, ye ndinam ukwaŋ-ŋkpɔ ekededi emi enye oyomde ete mmɔ enam—ndien ke ntem ke ntɔŋɔ, ɔyɔhɔ isua edip ye duop emi, mmɔ ekedu ke idaha idiɔk ibak.

18 Idahaemi mmɔ ikinamke idiɔk ŋkpɔ ke unana ifiɔk, koro mmɔ ema efiɔk uduak Abasi kabaŋa mmɔ, koro ema ekpep mmɔ; ke ntak oro mmɔ ekefɔfiɔk esɔŋ ibuot ye Abasi.

19 Ndien idahaemi ekedi ke eyo Lachoneus, eyen Lachoneus, koro Lachoneus ama ada itie ete esie ndien ama akara mme owo ke isua oro.

20 Ndien mme owo ema etɔŋɔ ndidu emi ekenyenede ikike eto heaven enyuŋ enɔde edi, emi ekedade ke ufɔt mme owo ke ofuri isɔŋ oro, emi ekwɔrɔde enyuŋ etiede ntiense uko uko ebaŋa mme idiɔk ŋkpɔ ye mme ukwaŋ-ŋkpɔ mme owo, enyuŋ etiede ntiense enɔ mmɔ kabaŋa edifak emi Jehovah edinamde inɔ ikɔt esie, mme ke usuŋ efen, ediset ke mkpa Christ; ndien mmɔ ema etie ntiense uko uko ebaŋa mkpa esie ye mme ukut esie.

21 Idahaemi ediwak mme owo ema edu emi ekeyatde esit ata eti eti ke ntak mbon emi eketiede ntiense ebaŋa mme ŋkpɔ emi; ndien mmɔ oro emi ekeyatde esit ekedi akpan akpan mme ada ibuot mme ebiere ikpe, ye mmɔ emi ekedide mme akwa oku ye mme ɔfiɔk ibet; iŋ, kpukpru mbon emi ekedide mme ɔfiɔk ibet ema eyaresit ye mmɔ emi eketiede ntiense ebaŋa mme ŋkpɔ emi.

22 Idahaemi ɔfiɔk ibet mme ebiere ikpe mme akwa oku ndomo kiet ikiduhe emi ekenyenede odudu ndibiom owo ndomo kiet ikpe nnɔ mkpa ibɔhɔke ekedi andikara isɔŋ oro ɔkɔnɔ idiɔŋɔ ke ubiom ikpe mmɔ.

23 Idahaemi ediwak mbon emi eketiede ntiense ebaŋa mme ŋkpɔ emi abaŋade Christ ema edu emi eketiede ntiense uko uko, emi ekemumde ndien mme ebiere ikpe ewot ke ndibe, emi ifiɔk mkpa mmɔ mikisimke andikara obio oro idem tutu ema ekewot mmɔ.

24 Idaha emi sese, emi ikisaŋake ye mme mbet isɔŋ oro, ete ke ana ewot owo ndomo kiet ibɔhɔke mmɔ enyene odudu eto andikara isɔŋ oro—

25 Ke ntak oro ntɔt ama ɔdɔk edisim isɔŋ Zarahemla, etiene andikara isɔŋ oro, abaŋa mme ebiere ikpe emi ekebiomde mme prophet Jehovah ikpe enɔ mkpa, ke midihe nte mbet edide.

26 Idahaemi edikem ete ke ema emum mmɔ enyuŋ eda edi ke iso ebiere ikpe, man ebiere ikpe ebaŋa mbet emi mmɔ ebiatde, nte mbet edide emi mme owo ekenɔde.

27 Idahaemi edikem ete ke mme ebiere ikpe emi ema enyene ediwak ufan ye mme iman; ndien nsuhɔ, iŋ, ekpri ayak ndidi ofuri mme ɔfiɔk mbet ye mme akwa oku, ema esobo idem mmɔ ɔtɔ kiet, enyuŋ ediana ye mme iman mme ebiere ikpe oro emi akanade nte ekpe ikpe enɔ nte mbet edide.

28 Ndien mmɔ ema eduk ke ediomi ye kiet eken, iŋ, eduk ke kpa ediomi emi mbon eset ekenɔde mmɔ, ediomi emi ekenɔde ye emi satan akanamde, man ediana eŋwana ye kpukpru nnen nnen ido.

29 Ke ntak oro mmɔ ema ediana ndiŋwana ye ikɔt Jehovah, enyuŋ eduk ke ediomi ndiwot mmɔ, ye ndinam mbon emi ekeduede ke uwot owo ebɔhɔ ke ubɔk unen ikpe, emi ekeyomde ndinam nte mbet edide.

30 Ndien mmɔ ema esin mbet ye mme unen obio mmɔ; ndien mmɔ ema ediomi ye kiet eken ndiwot andikara oro, ye ndinim edidem ke isɔŋ oro, man isɔŋ oro okudu ke uwɔrɔ ufin aba edi odu ke idak ndidem.