1 Ndien edikem ete ke mkpere utit ɔyɔhɔ isua efuteta ete ke mbon ekɔŋ mme inɔ oro ema ebeŋe idem ekɔŋ, ndien etɔŋɔ ndisuhɔde ndi ndien efehe ewɔrɔ ke mme obot edi, ye ke mme ŋkoŋ-ŋkoŋ obot, ye wilderness, ye mme ɔkpɔsɔŋ ebiet mmɔ, ye mme ndedibe ebiet mmɔ, enyuŋ etɔŋɔ ndida mme isɔŋ nyene, emi okodude ke isɔŋ ke usuk usuk ye emi ɔkɔdude ke isɔŋ ke edem edere mbiba, enyuŋ etɔŋɔ ndida kpukpru isɔŋ emi mme Nephite ekefehede ekpɔŋ nyene, ye mme obio emi ekeyakde owure.

2 Edi sese, mme unam ikɔt mme mme unam ikiduhe ke mme isɔŋ oro emi mme Nephite eke ewɔrɔde ekpɔŋ, ndien mme unam ikiduhe inɔ mme inɔ ibɔhɔke ekedi ke wilderness.

3 Ndien mme inɔ oro ikikemeke idu uwem ibɔhɔke ekedi ke wilderness, ke ntak unana udia; koro mme Nephite ekekpɔŋ mme isɔŋ mmɔ ke nsobo, ndien ema etaŋ mme ufene mmɔ ye mme enaŋ mmɔ ye ofuri inyene mmɔ, ndien mmɔ ekedu ɔtɔ kiet.

4 Ke ntak oro, ufaŋ ikiduhe inɔ mme inɔ oro ndidia ŋwo nyuŋ nyene udia, ibɔhɔke ekedi ke ndidi eŋwan ye mme Nephite anwa anwa; ndien mme Nephite ke ekedide kiet, ndien ke ekewakde ata eti eti, ndien ke ekenimde mme ŋkpɔ udia enɔ idem mmɔ, mme horse ye mme ufene, ye mme enaŋ ke utɔ ke utɔ, man mmɔ ekeme edu uwem ke ufaŋ isua itiaba, edide ini emi mmɔ ekekerede ndiwot mme inɔ oro nsio ke iso isɔŋ; ndien ntem ɔyɔhɔ isua efuteta ama ebe.

5 Ndien edikem ete ke ɔyɔhɔ isua efutenaŋ Giddianhi ama okut ete ke ɔfɔn ete enye aka ekɔŋ ye mme Nephite, koro usuŋ ikiduhe inɔ mmɔ ndidu uwem ibɔhɔke ekedi ndidia ŋwo nyuŋ nyip inɔ nyuŋ nwot owo.

6 Ndien inaha mmɔ esuan idem mmɔ ke iso isɔŋ man mmɔ ekeme nditɔ mkpasip, mbak mme Nephite ekuduŋwana ye mmɔ enyuŋ ewot mmɔ; ke ntak oro Giddianhi ama ɔnɔ mbon ekɔŋ esie uyo ete ke isua emi yak mmɔ edɔk eka ekɔŋ ye mme Nephite.

7 Ndien edikem ete ke mmɔ ema edɔk edi ekɔŋ; ndien ekedi ke ɔyɔhɔ ɔfiɔŋ itiokiet; ndien sese, akwa ye enyene ndik ke usen oro ekedi emi mmɔ ekedɔkde edi ekɔŋ; ndien mmɔ ekesine ɔfɔŋ nte mme inɔ; ndien mmɔ ekekune ikpa erɔŋ ke isin mmɔ, ndien mmɔ ema efiɔŋɔ iyip, ndien ema efat idet mmɔ, ndien mmɔ ema eyara itam ukwak ke ibuot mmɔ; ndien akwa ye enyene ndik ke mbon ekɔŋ Giddianhi ekedi, ke ntak mbɔbɔ ekɔŋ mmɔ, ye ke ntak emi mmɔ ekefiɔŋɔde iyip.

8 Ndien edikem ete ke mbon ekɔŋ mme Nephite, ke ini mmɔ ekekutde nte mbon ekɔŋ Giddianhi etiede, kpukpru ema eduɔ ke isɔŋ, enyuŋ emenede eseme mmɔ enɔ Jehovah Abasi mmɔ, man enye ɔsuhɔ mmɔ onyuŋ anam mmɔ ebɔhɔ ewɔrɔ ke ubɔk mme asua mmɔ.

9 Ndien edikem ete ke ini mbon ekɔŋ Giddianhi ekekutde emi mmɔ etɔŋɔ ndifiori ke ɔkpɔsɔŋ uyo, ke ntak idaresit mmɔ, koro mmɔ ekekere ke mme Nephite ekeduɔ ye ndik ke ntak ndik mbon ekɔŋ mmɔ.

10 Edi ke ŋkpɔ emi mmɔ ema ekpa mfuhɔ, koro mme Nephite ikifeheke mmɔ; edi mmɔ ema efehe Abasi mmɔ enyuŋ ebeŋe ukpeme eto enye; ke ntak oro, ke ini mbon ekɔŋ Giddianhi ekefehede ebine mmɔ, mmɔ ema ebeŋeidem ndisobo ye mmɔ; iŋ, ke odudu Abasi ke mmɔ ekesobo ye mmɔ.

11 Ndien ekɔŋ ama ɔtɔŋɔ ke ɔyɔhɔ ɔfiɔŋ itiokiet emi; ndien akwa ye enyene ndik ke ekɔŋ oro ekedi, iŋ, akwa ye enyene ndik ke uwot owo ekedi, tutu ete ke utɔ akwa uwot owo oro ikiduhe ke ufɔt kpukpru ikɔt Lehi tɔŋɔ enye ɔkɔkpɔŋ Jerusalem.

12 Ndien ke misehe mme usin ndik ye mme uŋwɔŋɔ emi Giddianhi akanamde, sese, mme Nephite ema ekan mmɔ, tutu ete ke mmɔ ema efiak edem ke iso mmɔ.

13 Ndien edikem ete Gidgiddoni ama ɔnɔ uyo ete mbon ekɔŋ esie ebine mmɔ tutu ke mme adaŋa wilderness, ndien ete mmɔ ukusuhɔ ndomo kiet emi ediduɔde iduk ke ubɔk mmɔ ke usuŋ; ndien ke ntem mmɔ ema ebine mmɔ enyuŋ ewot mmɔ, tutu ke mme adaŋa wilderness, tutu mmɔ ema enam uyo Gidgiddoni.

14 Ndien edikem ete Giddianhi, emi akadade onyuŋ aŋwanade ye uko, ke ema ebine enye nte enye ekefehede; ndien ke ntak emi idem ekememede enye ke ntak ediwak eŋwan esie, ema esimenyuŋ ewot enye. Ndien ntem ekedi utit inɔ Giddianhi.

15 Ndien edikem ete ke mbon ekɔŋ mme Nephite ema efiak enyɔŋ eka ebiet ukpeme mmɔ. Ndien edikem ete ke ɔyɔhɔ isua efutenaŋ emi ama ebe, ndien mme inɔ ikidighe ekɔŋ aba; ŋko mmɔ ikifiakke idi ke ɔyɔhɔ isua edip.

16 Ndien ke ɔyɔhɔ isua edip ye kiet mmɔ ikidghe ekɔŋ, edi mmɔ ema edɔk edi ke kpukpru ŋkaŋ enyuŋ ena ekanade ikɔt Nephi ekuk; koro mmɔ ema ekere ete ke edieke mmɔ esibede ikɔt Nephi esio ke mme isɔŋ mmɔ, enyuŋ enukde mmɔ esin ke kpukpru ŋkaŋ, ndien ke edieke mmɔ edisibede mmɔ isio ikpɔŋ kpukpru ŋkpɔ ke aŋwa, ete ke mmɔ eyenam mmɔ eyak idem mmɔ enɔ nte mme uduak mmɔ edide.

17 Idahaemi mmɔ ema emek enɔ idem mmɔ ada usuŋ efen, emi enyiŋ esie ekedide Zemnarihah; ke ntak oro ekedi Zemnarihah emi akanam ete nna-ukpeme emi ada itie.

18 Edi sese, emi ekedi ke ufɔn mme Nephite; koro mme inɔ emi ikikemeke ndina ukpeme mbihi nkem man afina mme Nephite, ke ntak ediwak ŋkpɔ udia emi mmɔ ekenimde ke ufɔk ubono ŋkpɔ,

19 Ndien ke ntak emi mme ŋkpɔ udia mme inɔ mikiwakke; koro sese, mmɔ ikinyeneke ŋkpɔ ndomo kiet ibɔhɔke unam nte udia mmɔ, unam emi mmɔ ekedade eto wilderness;

20 Ndien edikem ete unam ikɔt ama akabade anana ke wilderness tutu ete ke mme inɔ ema eyom nditak ye biɔŋ.

21 Ndien mme Nephite ema eka iso esaŋa ke uwemeyo ye ke okoneyo, enyuŋ eŋwana ye mbon ekɔŋ mmɔ, enyuŋ ewot mmɔ ke mme tɔsin ye mme duop eke tɔsin.

22 Ndien ke ntem ke akakabade edi udɔŋ ikɔt Zemnarihah ndisana uduak mmɔ nyak, ke ntak akwa nsobo emi ekesimde mmɔ ke okoneyo ye ke uwemeyo.

23 Ndien edikem ete ke Zemnarihah ama ɔnɔ ikɔt esie uyo ete mmɔ esio idem mmɔ efep ke nna-ukpeme oro, enyuŋ esaŋa eka ata esit mme isɔŋ ke edem edere edere.

24 Ndien idahaemi, Gidgiddoni ke ntak emi ɔkɔfiɔkde uduak mmɔ, ndien ke ɔkɔfiɔkde mmem-idem mmɔ ke ntak unana udia, ye akwa uwot owo emi ekenamde ke ufɔt mmɔ, ke ntak oro enye ama ɔdɔŋ mbon ekɔŋ esie ke okoneyo, onyuŋ esibe usuŋ mfiak-edem mmɔ osio, onyuŋ enim mbon ekɔŋ esie ke usuŋ mfiak-edem mmɔ.

25 Ndien emi ke mmɔ ekenam ke okoneyo, ndien esaŋa ebe mme inɔ oro, man usiere, ke ini mme inɔ oro eketɔŋɔde isaŋ mmɔ, mbon ekɔŋ mme Nephite ema esobo ye mmɔ ke iso mmɔ ye ke edem mmɔ.

26 Ndien ema esibe mme inɔ emi ekedude ke usuk usuk ŋko esio ke mme ebiet mfiak-edem mmɔ. Ndien kpukpru mme ŋkpɔ emi ekenam ke uyo Gidgiddoni.

27 Ndien ediwak tɔsin ema edu emi ekeyakde idem mmɔ enɔ mme Nephite nte mbon ŋkpɔkɔbi, ndien ema ewot nyɔhɔ nsuhɔ mmɔ.

28 Ndien ada usuŋ mmɔ, Zemnarihah, ema emum enyuŋ ekɔŋ ke eto, iŋ, kpa ke enyɔŋ esie tutu enye akpa. Ndien ke ini ema ekekɔŋ enye tutu enye akpa mmɔ ema ekpi eto oro eduɔk ke isɔŋ, ndien ema efiori ke ɔkpɔsɔŋ uyo, ete:

29 Yak Jehovah etim ikɔt esie enim ke nnen nnen ye ke edisana esit, man mmɔ enam ete ekpi enim ke isɔŋ kpukpru mbon emi eyomde ndiwot mmɔ ke ntak odudu ye ebuana ŋkari, ke ukem usuŋ emi nte ekpide owo emi enim ke isɔŋ.

30 Ndien mmɔ ema edaresit enyuŋ efiak efiori ke uyo kiet, ete: Yak Abasi Abraham, ye Abasi Isaac, ye Abasi Jacob, ekpeme mbon emi ke nnen nnen ido, kadaŋa nte mmɔ edikotde enyiŋ Abasi mmɔ iyom ukpeme.

31 Ndien edikem ete ke mmɔ ema etɔŋɔ, kukpuru nte kiet, ke ndikwɔ, ye nditoro Abasi mmɔ ke akwa ŋkpɔ emi enye anamde ɔnɔ mmɔ, ke ndikpeme mmɔ man ediduɔ iduk ke ubɔk mme asua mmɔ.

32 Iŋ, mmɔ ema efiori ete: Hosanna enyene Abasi Ibom. Ndien mmɔ ema efiori ete: Ekɔm enyene enyiŋ Jehovah Abasi Ibom,Abasi Ibom.

33 Ndien esit mmɔ ama ɔyɔhɔ ye idaresit, esim ediwɔrɔ ediwak mmɔŋ-eyet, ke ntak akwa ima Abasi ke ndinam mmɔ ebɔhɔ ewɔrɔ ke ubɔk mme asua mmɔ; ndien mmɔ ema efiɔk ke ekedi ke ntak edikabade esit mmɔ ye nsuhɔde-idem mmɔ ke ekenam mmɔ ebɔhɔ ke nsinsi nsobo.