1 Sese, idahaemi edikem ete ke ini Jesus ama eketiŋ mme ikɔ emi enye afiak ɔŋwɔŋɔde enyin ese otu owo, onyuŋ ɔdɔhɔ mmɔ ete: Esese, ini mi ke ekpere.

2 Ami mɔkut nte ke mbufo edi mmem-mmem, ke mbufo ikemeke ifiɔk kpukpru mme ikɔ mi emi Ete ɔnɔde mi uyo ete ntiŋ nnɔ mbufo ke ini emi.

3 Ke ntak oro, mbufo enyɔŋ ufɔk mbufo, enyuŋ ekekere ebaŋa mme ŋkpɔ emi ami ntiŋde, ndien ebup Ete, ke enyiŋ mi, man mbufo efiɔk, enyuŋ ebeŋe esit mbufo enɔ mkpɔŋ, ndien ami mfiak ndi ntiene mbufo.

4 Edi idahaemi ami nyɔŋ ntiene Ete, ŋko nyewut mme ubon Israel emi ekesopde idem mi, koro mmɔ isopke Ete ke enyin, koro enye ɔfiɔk ebiet emi enye adade mmɔ aka.

5 Ndien edikem ete ke ini Jesus ama eketiŋ ntem, enye afiak ɔŋwɔŋɔde enyin esie ese otu owo, onyuŋ okut ete ke mmɔ ekedu ke mmɔŋ-eyet, enyuŋ etiŋ-enyin ese enye nte mmɔ ekpedɔhɔde enye ete yak odu ke esisit ini ye mmɔ.

6 Ndien enye ɔdɔhɔ mmɔ ete: Esese, esit mi ɔyɔhɔ ye mbɔm abaŋa mbufu.

7 Ndi mbufo emenyene owo udɔŋɔ ndomo kiet ke otu mbufo? Eda mmɔ edi mi. Ndi mbufo emenyene owo ndomo kiet emi edide mbuŋɔ, mme nnan, mme enyenede unan, mme emi ebuŋde, mme akpa-mfia, mme emi edide mfimi, mme emi edide inan, mme emi ekutde ukut ke usuŋ ndomo kiet? Eda mmɔ edi mi ndien ami nyɔkɔk mmɔ, koro ami menyene mbɔm mbaŋa mbufo; esit mi ɔyɔhɔ ye mbɔm.

8 Koro ami mekere nte ke mbufo emeyom ete ami nwut mbufo se ami nnamde nnɔ nditɔ eka mbufo ke Jerusalem, koro ami mokut nte ke mbuɔtidem mbufo ekem ete ami nkɔk mbufo.

9 Ndien edikem ete ke ini enye ama eketiŋ ikɔ ntem, kpukpru otu owo, ini kiet, ema eka ye mbon udɔŋɔ mmɔ ye mbon ukut mmɔ, ye mme mbuŋɔ mmɔ, ye mme nnan mmɔ, ye mme imum mmɔ, ye kpukpru mmɔ emi ukut okomumde ke utɔ ke utɔ; ndien enye ama ɔkɔk kpukpru mmɔ nte eke edade mmɔ esɔk enye.

10 Ndien kpukpru mmɔ, mbon emi eke ekɔkde udɔŋɔ ye mbon emi idem ɔkɔsɔŋde mbiba, ema esuk ibuot ke ikpat esie enyuŋ ekpono enye; ndien adaŋa nte ediwak emi eke ekemede edi ke ntak otu owo, ema etim ikpat esie inua, tutu ete ke mmɔ ema eyet ikpat esie ye mmɔŋ-eyet mmɔ.

11 Ndien edikem ete enye ɔnɔ uyo ete eda mkpri nditɔ mmɔ edi.

12 Ke ntak oro mmɔ eda mkpri nditɔ mmɔ edi enyuŋ etem mmɔ ke isɔŋ ekanade enye ekuk, Jesus onyuŋ ada ke ufɔt; ndien otu owo ema enɔ ufaŋ tutu eda kpukpru mmɔ esɔk enye.

13 Ndien edikem ete ke ini ema ekeda kpukpru mmɔ edi, Jesus onyuŋ ada ke ufɔt mmɔ, enye ɔnɔ otu owo uyo ete mmɔ etɔŋɔ-erɔŋ ke isɔŋ.

14 Ndien edikem ete ke ini mmɔ ema eketɔŋɔ-erɔŋ ke isɔŋ, Jesus ama omum mmum ke esit, onyuŋ ɔdɔhɔ ete: Ete, esit mi etimere ke ntak ibak eke mbon ufɔk Israel.

15 Ndien ke ini enye ama eketiŋ mme ikɔ emi, enye ke idem esie ŋko ɔtɔŋɔ-erɔŋ ke isɔŋ; ndien sese enye ɔbɔŋ akam ɔnɔ Ete, ndien owo ikemeke ndiwet mme ŋkpɔ emi enye ɔkɔbɔŋde akam abaŋa, ndien otu owo emi ekekopde enye etie ntiense ebaŋa.

16 Ndien ke utɔ usuŋ emi ke mmɔ eketie ntiense ete: Enyin akanam ikwe, utɔŋ inyuŋ ikopke, akpa, utɔ akwa ye mme utibe ŋkpɔ nte nnyin ikikutde inyuŋ ikopde nte Jesus etiŋde ɔnɔ Ete;

17 Ndien inua ndomo kiet ikemeke nditiŋ, owo ndomo kiet inyuŋ ikemeke ndiwet, ŋko esit mme owo ikemeke ndikere utɔ akwa ye mme utibe ŋkpɔ emi nnyin ikikutde inyuŋ ikopde nte Jesus etiŋde; ndien owo ndomo kiet ikemeke ndikere mbaŋa idara emi ɔkɔyɔhɔde ukpɔŋ nnyin ke ini emi nnyin ikopde nte enye ɔbɔŋde akam abaŋa nnyin ɔnɔ Ete.

18 Ndien edikem ete ke ini Jesus ama eketre ndibɔŋ akam nnɔ Ete, enye ama adaha ada; edi idaraest mme owo ama okpon tutu ete ke mmɔ ikikemeke idahaida.

19 Ndien edikem ete ke Jesus ama etiŋ ikɔ ye mmɔ, onyuŋ ɔdɔhɔ mmɔ ete edaha eda.

20 Ndien mmɔ edaha eda ke isɔŋ, enye onyuŋ ɔdɔhɔ mmɔ ete: Ɔfɔfɔn ɔnɔ mbufo ke ntak mbuɔtidem mbufo. Ndien idahaemi esese, idaresit mi ɔyɔhɔ.

21 Ndien ke ini enye ama eketiŋ mme ikɔ emi, enye atua, otu owo enyuŋ etie ntiense ebaŋa enye, ndien enye emen mkpri nditɔ mmɔ, kiet kiet, onyuŋ ɔdiɔŋ mmɔ, onyuŋ ɔbɔŋ akam ɔnɔ Ete abaŋa mmɔ.

22 Ndien ke ini enye ama akanam emi enye afiak atua;

23 Ndien enye etiŋ ye otu owo, onyuŋ ɔdɔhɔ mmɔ ete: Esese mkpiri nditɔ mbufo.

24 Ndien nte mmɔ esede man ekut, mmɔ ewɔŋɔde enyin mmɔ ese heaven, ndien mmɔ ekut nte mme enyɔŋ ekubɔrede, mme angel esuhɔde ewɔrɔ ke heaven nte ke ufɔt ikaŋ; ndien mmɔ esuhɔde edi enyuŋ ekanade nditɔ oro ekuk, ndien ikaŋ akanade mmɔ okuk; mme angel enyuŋ enam utom enɔ mmɔ.

25 Ndien otu owo ema ekut enyuŋ ekop enyuŋ etie ntiense; ndien mmɔ efiɔk ete ke ntiense mmɔ edi akpanikɔ koro mmɔ kiet kiet ema ekut enyuŋ ekop, kpukpru owo ɔnɔ idem esie; ndien ibat mmɔ ekedi ŋkpɔ nte owo tɔsin iba ye ikie ition: ndien iren, iban, ye nditɔ ema edɔŋɔ esit.