Lesona 9 Anomea mo le Sauniuniga o le Vasega: Olioli i le Soifua Mai Faamamaluina o Iesu Keriso
“Lesona 9 Anomea mo le Sauniuniga o le Vasega: Olioli i le Soifua Mai Faamamaluina o Iesu Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 9 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
Faauta i le Tamai Mamoe a le Atua, saunia e Walter Rane
Lesona 9 Anomea mo Sauniuniga o le Vasega
Olioli i le Soifua Mai Faamamaluina o Iesu Keriso
O le soifua mai faavavega o Iesu Keriso o se mea mamalu na tupu. Sa lagiina e avefeau faalelagi viiga i le Atua (tagai Luka 2:11–14), sa ifo atu leoleo mamoe lotomaualalo ia Iesu i se fale o manu (tagai Luka 2:15–16), ma sa faamamaluina o Ia e le Au Makoi i meaalofa (tagai Mataio 2:11). O lesona i le iunite 3 o le a tuuina atu ia te oe se avanoa e faalolotoina ai lou malamalama i le galuega faaletino a Iesu Keriso. O Lona soifua mai ma Lona soifuaga ua musuia moni ai “tala lelei e olioli tele … i le nuu uma” (Luka 2:10). Mafaufau e matamata le vitio “The Nativity” (2:59) e fesoasoani ai e seti se agaga mo lau suesuega.
Vaega 1
E mafai faapefea e le malamalama i le tulaga o matua o Iesu Keriso ona faateleina lo’u talitonuga i Lona mana e laveai ai a’u?
E pei o uiga tulagaese e te maua mai kenera a ou matua, o Iesu Keriso sa tulagaese i mea na Ia mauaina mai Ona matua. I le Tusi a Mamona, na valoia ai e Alema o le Faaola o le a “fanau mai o ia ia Maria … o ia o se taupou, o se ipu pele ma filifilia … ma [o le a ia] fanau mai se atalii, ioe, o le Alo lava o le Atua” (Alema 7:10). Mafaufau pe faapefea ona fesootai tulaga faamatua o le Faaola i Lona gafatia e faatino ai se togiola mo tagata uma.
Ua amata ona tatou vaaia lenei sootaga i le va o tulaga faamatua o le Faaola ma Lona mana e laveai ai i le taimi na faaali atu ai le agelu o Kaperielu ia Maria ma tau atu ia te ia o le a ia fanauina se atalii o le a igoa ia Iesu (tagai Luka 1:26–31).
Ata
aikona, suesue
Suesue e Sauniuni ai mo le Vasega
Faitau le Luka 1:32–35, ma matau pe na faapefea ona faamatala e Kaperielu le Atalii o le a fanauina e Maria. E mafai foi ona e matamata i le vitio “An Angel Foretells Christ’s Birth to Mary” (4:07). (Manatua: O mau o loo faatatau i le fanauina o Iesu Keriso o loo faamamafa mai ai o Ia o le Alo o le Atua ae e le o faaalia mai ai le ala na tupu ai lenei vavega [tagai Mataio 1:18–20; 1 Nifae 11:15, 18–21; Alema 7:10].)
Ina ua fofoga mai e le agelu le soifua mai o Iesu Keriso i leoleo mamoe lata ane, sa ia faasino i le tamameamea o le “Faaola, o le Alii ia o Keriso” (Luka 2:11; tagai foi Luka 2:9–10). O le gafatia o Iesu Keriso e avea ai ma o tatou Faaola sa mafai ona o Ia na soifua mai i se Matua e faavavau (Tama Faalelagi) ma se matua faaletino (Maria). Ona o Lona tina faaletino, ua mafai ai e Iesu ona oo atoatoa i tiga, faanoanoaga, ma faaosoosoga o le olaga nei (tagai Eperu 4:15). O nei aafiaga faaletino na mafai ai e le Faaola ona “silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga” (Alema 7:12). Ona o Lona Tama tino ola pea, ua mafai ai e Iesu ona onosaia luitau uma o le olaga faaletino.
Ona o Lona tina faaletino, na mafai ai ona maliu Iesu. Ona o Lona Tama tino ola pea, na mafai ai ona Ia faatoilaloina le oti.
Ata
aikona, suesue
Suesue e Sauniuni ai mo le Vasega
Faitau le Ioane 10:17–18, ma mafaufau pe na faapefea ona mafaia le Togiola a Iesu Keriso i le i ai o ni ona matua tulagaese.
Na aoao mai Peresitene Russell M. Nelson:
Ata
Peresitene Russell M. Nelson
O le misiona [a Iesu Keriso] o le Togiola. O lena misiona o Lana lava sa tulaga ese. O le soifua mai i se tina faaletino ma se Tama tino ola pea, sa na o Ia ai lava e mafai ona tuuina atu Lona soifua ina ia toe aumai ai (tagai i le Ioane 10:14–18). O taunuuga mamalu o Lana Togiola e le gata ma e faavavau. Ua Ia aveese mai le tui o le oti ma faia ai ia na o se taimi le tumau le faanoanoa o le tuugamau. (“O Le Misiona ma le Auaunaga a Iesu Keriso,” Liahona, Ape. 2013, 34)
Ata
aikona, mafaufau loloto
Mafaufau Loloto e Sauniuni ai mo le Vasega
O le a se mea ua aoao mai e lenei natura itulua o Iesu Keriso ia te oe e uiga i Lona tomai e fesootai ai ia te oe i le olaga nei ma faaolaina oe i le faavavau?
Vaega 2
E faapefea ona avea le soifua mai ma le soifuaga o Iesu Keriso o se faaaliga o Lona alofa mo au?
Mafaufau mo se minute i le ofoofogia o Ieova Silisili, o le na foafoaina le lalolagi, o le a afio mai i le lalolagi o se pepe e leai se faamoemoe. I se faaaliga vaaia, na vaai ai Nifae i lenei faatinoga o se faailoaga o le alofa.
Ata
aikona, suesue
Suesue e Sauniuni ai mo le Vasega
Faitau le 1 Nifae 11:13–22, ma mafaufau po o le a se mea e mafai ona aoao atu e le soifua mai o le Faaola ia te oe e uiga i Lona alofa ma le alofa o Lona Tama mo oe. (Manatua: O le upu faamaualalo o lona uiga o le alu ifo ma le lotofuatiaifo mai se tulaga maualuga atu i se vaega po o se tulaga e maualalo atu. Mafaufau pe mafai faapefea ona faatatau le faamaualalo o loo faamatalaina i lenei mau i le Tama ma le Alo.)
I le saunoa ai e uiga i le faamaualalo o Iesu Keriso, na aoao mai ai Peresitene Tad R. Callister, o le sa avea muamua ma Peresitene Aoao o le Aoga Sa:
Ata
Peresitene Tad R. Callister
O le Atua le Alo na faafesuiaia lona aiga faalelagi faatasi ma ona teuga uma faaselesitila mo se nofoaga faaletino faatasi ma ona teuga uma faaanamua. … Na Ia fesuiaia le pule o se atua mo se tulaga o se pepe. … O se fefaatauaiga e le mafaatusalia. … O Ieova silisili, le foafoa o lalolagi e le mafaitaulia, e le gata i le mamā ma le mana, na ia afio mai i lenei lalolagi ua aui i ie ma se faatanoa vao. (O le Togiola e le Iu [2000], 64)
Na aoao atili Nifae e uiga i le faamaualalo o Keriso ina ua ia vaaia i se faaaliga vaaia le Faaola o auauna atu i tagata ma faamalolo o latou puapuaga (tagai 1 Nifae 11:26–31).
Na aoao mai Elder D. Todd Christofferson o le Korama a Aposetolo e Toasefululua:
Ata
Elder D. Todd Christofferson
Pe a tatou talanoa e uiga i le soifua mai o Iesu Keriso, tatou te mafaufau ma le talafeagai i mea nei. O lona soifua mai sa matua taua tele ona o mea o le a Ia oo ma mafatia ai ina ia mafai ona Ia fesoasoani atili ia i tatou—ma faaiu uma lava i Lona Faasatauroga ma le Toetu (tagai i le Alema 7:11–12). Ae o Lana misiona foi na aofia ai le matagofie o Lana auaunaga, o vavega o Lana galuega, o le faamalologa na Ia aumaia i e puapuaga, ma le olioli sa Ia ofoina atu—ma ofoina pea—i e faanoanoa. (“Ia Filemu,” Liahona, Tes. 2015, 30)
Mafaufau i le faataitaiga maoae na tuuina mai e le faamaulalo o le Faaola mo i tatou. Sa faamatala e Epikopo Richard C. Edgley, o le sa auauna i le Au Epikopo Pulefaamalumalu:
Ata
Epikopo Richard C. Edgley
“O le a la le uiga o lenei mea mo i tatou? O lo tatou malamalama i le faamaualalo o Keriso e tatau ona sili atu i o tatou lagona o le maofa ma le lotofaafetai loloto. I le avea ai ma tagata o Lana Ekalesia, ua valaauina e fai ma sui o Ia ma molimau atu e uiga ia te Ia, o lo tatou avanoa sili o le taumafai lea e faataitai ia te Ia. …
E faapei o le Faaola, o lo tatou lelei silisili e mafai ona faataunuuina e ala i le auauna atu e oo lava i e “aupito itiiti o o’u uso nei” [Mataio 25:40]. E tatau ona tatou manatua i soo se tulaga o le olaga po o se valaauga patino, o tagata uma o se atalii/afafine faapelepele o le Atua; ma tatou te auauna atu i e ua sili ona lotomaualalo ma auauna ia te i latou e pei ona auauna atu le Matai ia te i latou. (“The Condescension of God,” Liahona, Tes. 2001, 20, 21)
Ata
aikona, faamaumau
Tusi Faamaumau Ou Manatu
Faaalu sina taimi e faitau pe faalogologo ai i upu o se tasi pe sili atu o viiga nei. Ona tusi faamaumau lea o ou manatu ma lagona. Mafaufau faapea o le Faaola “na afio ifo i lalo o mea uma” (Mataupu Faavae ma Feagaiga 88:6) ina ia mafai ona Ia faaolaina oe. Mafaufau foi pe faapefea ona e mulimuli i Lana faataitaiga i lau auaunaga i isi.
