Lesona 13 Anomea a le Faiaoga

Auauna Atu e pei o le Faaola

I Lona soifuaga, sa auauna atu le Faaola i isi a o Ia faamalosia le faatuatua, faamanuia, faamalolo, faamafanafanaina, ma faamagalo atu. I lenei lesona, o le a maua e tagata aoga le avanoa e faamatala ai le uiga o le auauna atu e pei o le Faaola. O le a latou mafaufau foi i auala faaKeriso e mafai ona latou auauna atu ai i e o siomia i latou.

Fautuaga mo le Aoao Atu

O le Faaola o le faataitaiga atoatoa lea o le auala e auauna atu ai ma le alofa.

E mafai ona e amataina le vasega i le faaali atu o se ata o le Faaola o mulumuluina vae o Ana Aposetolo. Pe faaali atu foi le “The Last Supper” mai le taimi 0:00 i le 0:50.

Ua mulumulu e Iesu Vae o Peteru

• O le a se mea e mafai ona tatou aoaoina e uiga i le auauna atu mai ia Iesu i le mulumuluina o vae o Ana Aposetolo? (Mafaufau e iloilo le saunoaga a Elder Jeffrey R. Holland i le vaega 1 o le anomea mo sauniuniga.)

Faamanatu i tagata aoga ina ua uma ona mulumuluina vae o Aposetolo, sa tuu atu e le Faaola ia i latou se poloaiga fou. Mafaufau e faitau faatasi le Ioane 13:34–35 ma faaali atu le upumoni lenei: E mafai ona lauiloa i tatou o ni soo o Keriso pe afai tatou te fealofani e pei ona Ia alofa mai ia i tatou.

A o e valaaulia tagata aoga e faasoa mai po o le a le uiga o lenei upumoni mo lo latou lava avea ai ma soo, e mafai ona e talanoaina se tasi pe sili atu foi o fesili nei:

• E faapefea e le alofa atu i isi e pei ona alofa mai le Faaola ia i tatou ona aafia ai le ala e te auauna atu ai?

• O le a se mea na fesoasoani ia te oe e auauna atu ai ma le alofa faaKeriso sili atu?

• E faapefea ona tatou iloa po o ai e manaomia la tatou fesoasoani ma mea e mafai ona tatou faia? (I le avea o se vaega o la outou talanoaga, e mafai ona outou iloilo ma talanoaina le saunoaga a Peresitene Russell M. Nelson ma Peresitene Henry B. Eyring i le vaega 1 o le anomea mo sauniuniga.)

Mafaufau e valaaulia ni nai tagata aoga e faasoa mai pe na faapefea ona latou lagonaina le alofa o le Faaola i o latou olaga a o latou auauna atu i isi po o isi foi na auauna atu ia i latou.

E mafai ona e faaali atu le faamatalaga le uma lenei i luga o le laupapa: E mafai ona tatou auauna atu ma le alofa faaKeriso a o tatou …

Faamanatu i le vasega o le vaega 1 o anomea mo sauniuniga sa valaaulia ai i latou e suesue ma manatunatu i le faataitaiga a le Faaola o le auaunaga. Faatulaga tagata aoga i ni vaega toalaiti. Valaaulia i latou e iloilo ia faataitaiga o mau sa latou suesueina ma soo se uunaiga sa latou faamaumauina. Faaali atu pe saunia mo vaega taitasi se kopi o fesili nei, ma valaaulia tagata aoga ia talanoaina faatasi.

• O le a se mea e sili ona faagaeetia ai oe e uiga i le ala na auauna atu ai le Faaola i le tala na e suesueina?

• E faapefea ona tatou mulimuli i Lana faataitaiga a o tatou auauna atu i isi? (I le avea ai ma se vaega o la outou talanoaga, e mafai ona outou iloiloina faatasi saunoaga a Peresitene Jean B. Bingham ma Sister Sharon Eubank i le vaega 1 o anomea mo sauniuniga ma faasoa atu mea e te fiafia ai mai na mea.)

• Na faapefea e au taumafaiga e auauna atu e pei o le Faaola ona fesoasoani e te faalatalata atili atu ai ia te Ia?

E mafai ona e valaaulia ni nai tagata aoga e faasoa mai i le vasega ni mea ua faamamafaina mai a latou talanoaga faavaega. E mafai ona e faaopoopoina ni nai faaiuga i le faamatalaga e lei maea i luga o le laupapa a o faasoa mai tagata aoga.

E mafai ona tatou aoao e alolofa ma auauna atu i fanau uma a le Atua.

Mafaufau e iloilo o se vasega le faataoto i le Samaria agalelei i le Luka 10:25–37. E mafai ona e fautuaina tagata aoga e faatusatusa ia uiga ma amioga a le faitaulaga ma le sa Levi i uiga o le Samaria. Valaaulia tagata aoga e faasoa mai mea sa latou aoaoina mai le faataoto e uiga i le auauna atu i isi e pei ona sa faia e le Faaola. Ina ia uunaia mafaufauga loloto ma faasoa atu, e mafai ona e fai atu nisi o fesili nei:

• Aisea e te manatu ai na filifilia e le Faaola se Samaria e fai ma faataitaiga e tatau ona tatou faataitai i ai?

• E faapefea ona faatusa le Samaria i le faataoto ia Iesu Keriso?

• O le a se mea e mafai ona taofia i tatou mai le auauna atu i isi e pei ona faia e le Faaola? E mafai faapefea ona tatou maua le fesoasoani a le Tama Faalelagi ma Iesu Keriso e faatoilalo ai nei maa tu‘ia?

Ina ia fesoasoani i tagata aoga e mafaufau pe faapefea ona latou auauna atu i ni auala faaKeriso, faaali pe tufa atu se pepa o i ai tulaga nei (e mafai foi ona e faia ni a oe lava tulaga). E mafai ona e valaaulia tagata aoga e filifili ni nai vaega ma talanoaina luitau latou te tuuina atu faapea foi ma auala faaKeriso e auauna atu ai i tulaga taitasi. E mafai ona fai i tagata aoga e fai lenei gaoioiga o se vasega pe i ni vaega toalaiti.

• Ua ta‘u atu e lau uo ia te oe e i ai so latou faafitauli i ponokalafi.

• Ua tofia oe e auauna atu i se tasi na fai mai latou te le mananao e te asiasi atu.

• E i ai sau uo e lei leva ona ia faailoa mai o se faafatama/faafateine ma ua le talafeagai o latou lagona i le lotu.

• E te faigaluega ma se tasi e lei leva ona oo i le maliu ai o se e pele.

• Ua e matauina se uo na tautala ma le faatuatua e uiga i le fautuaga a le perofeta ae ua faitio nei.

Faaleleia o Lo Tatou Aoao Atu ma le Aoao Mai

Uunaia tagata aoga e fai faatinoga amiotonu. Tuuina atu avanoa mo tagata aoga e mafaufau loloto i auala e faatino ai i le faatuatua ma faaaoga mea ua latou aoaoina. A o e uunaia i taimi uma tagata aoga ia mafaufau loloto ma faaaoga mea o loo latou aoaoina, e mafai ona e fesoasoani ia i latou ia faateleina o latou gafatia e fai ai faatinoga amiotonu. Tulitatao pe a talafeagai ai.

Valaaulia tagata aoga e mafaufau loloto ma tusi faamaumau o latou manatu e uiga i fesili nei:

• O ai e te lagona le uunaia e siitia, faamalosia, pe faamalosiau?

• O le a se auaunaga faaKeriso e mafai ona e faia mo lenei tagata?

Mafaufau e molimau atu i le taua o le faatinoina o uunaiga faaleagaga e faamanuia ai olaga o isi ma le olioli lea e mafai ona oo mai mai le auauna atu e pei o le Faaola.

Mo Le Isi Taimi

I le aluga o le vaiaso, mafaufau e auina atu i tagata aoga le savali lenei po o sau lava savali: A o e suesue i anomea mo sauniuniga mo le lesona 14, mafaufau po o le a le vavega silisili e mafai ona e oo i ai.