O Loo Faaloaloa Atu Pea Lona Aao, saunia e Elizabeth Thayer

Lesona 7 Anomea mo le Sauniuniga o le Vasega

Fusimauina o le Faamasinoga Tonu, Alofa Mutimutivale, ma le Alofa o le Atua

Na aoao mai Mose o Ieova e “tonu ma sa‘o” (Teuteronome 32:4). Sa ia saunoa foi e “alofa mutimutivale ma alofa fua” le Alii (tagai Esoto 34:6). Pe ua e mafaufau ea pe mafai faapefea ona amiotonu ma alofa mutimutivale le Tama Faalelagi ma Iesu Keriso? O nei uiga paia e le gata ina aoao atu ai le alofa o le Atua mo oe ae ua latou tuuina mai foi se faataitaiga o le auala e mafai ona e faaalia ai le alofa mo isi.

Manatua: I tusitusiga paia, o le faalaniga Atua e mafai ona faasino i le Tama Faalelagi po o Iesu Keriso. E maua atoatoa uma e i laua uiga paia uma. Po o le a lava le mea tatou te aoaoina e uiga i le Tasi e tutusa lava le moni e uiga i le Isi (tagai Ioane 14:9; 17:21).

Vaega 1

O le a se mea e mafai ona aoao mai e le faamasinoga tonu a le Atua ia te au e uiga i Lona alofa?

O nisi tagata e vaai i le “Atua o le Feagaiga Tuai” e ese ona uiga mai i le “Atua o le Feagaiga Fou.” Latou te vaai i le Atua o le Feagaiga Tuai, o Ieova, o se tauimasui, faamalosi, ma saua. Ma ua latou vaai i le Atua o le Feagaiga Fou, o Iesu Keriso, e agalelei, loto faamagalo, ma alofa mutimutivale. Ae e pei ona e aoaoina i se lesona talu ai, “o [Iesu Keriso] o le Ieova Silisili o le Feagaiga Tuai, [ma] o le Mesia o le Feagaigaa Fou” (“O Le Keriso Soifua: O Le Molimau a le Au Aposetolo,” ChurchofJesusChrist.org). E mafai faapefea e le Atua lava e tasi ona faaatoatoaina ma agalelei, ma onosai, amiotonu ma alofa mutimutivale?

E foliga mai o nei uiga feteenai o ni faataitaiga ia o le loloto ma le lautele o uiga o le Atua. O se malamalamaaga i le ala ua Ia faatinoina ai nei uiga uma e mafai ai ona tatou faatuatuaina lelei o Ia. Mafaufau i faafitauli tatou te ono fetaiai i o tatou olaga pe afai tatou te faia se mea a le o le–po o le vaai i uiga paia o le Atua—e faapea o Ia e a le sa’o ma tonu pe agaalofa ma lotofaamagalo. A o e suesue i tusitusiga paia, mafaufau pe faapefea ona fesootai uiga uma o le Atua i Lona alofa atoatoa.

Tatou amata i le uiga o le faamasinoga tonu. O a ni manatu e aumaia e lenei upu i lou mafaufau? O nisi taimi i tusitusiga paia, e mafai ona foliga mai e saua le faamasinotonu a le Atua. O nisi o tala i le Feagaiga Tuai o loo faaaoga ai upu e pei o le toasa ma le ita e faamatala ai le faamasinoga tonu a le Atua i le lē usitai ma le amioleaga (tagai Isaia 1:4; Ieremia 32:30; Topical Guide, “God, Indignation of”). Mo se faataitaiga, ona o le le usiusitai o tagata, sa faaumatia Sotoma ma Komoro i le afi mai le lagi (tagai Kenese 19:15–25), o le aiga o Isaraelu sa faataapeapeina e Asuria (tagai 2 Tupu 15:27–31), ma sa ave faatagataotauaina le malo o Iuta e Papelonia (tagai 2 Tupu 24:10–16). I se faapuupuuga, o e amioleaga e masani ona oo i ai le mamafa o le faamasinoga tonu a le Atua.

Faatafunaga o Ierusalema, saunia e Gary L. Kapp

Pe a tatou faitau e uiga i le toasa o le Atua, e le tatau ona tatou manatu o o tatou lagona ma faailoaga o le ita, o ni tagata ua pa’u’u, e tutusa lava ma le toasa amiotonu o le Atua. E pei ona faamanatu mai le perofeta o Isaia “Aua o o’u manatu e le o outou manatu, o o’u ala e le o outou ala, ua fetalai mai ai Ieova” (Isaia 55:8).

Sa ofo mai e Peresitene Dallin H. Oaks o le Au Peresitene Sili vaaiga nei:

Peresitene Dallin H. Oaks

Tatou te toe faitau pea lava pea i le Tusi Paia ma i tusitusiga paia i ona po nei i le toatamai o le Atua i e amioleaga ma Lona faatinoina i Lona toasa faasaga ia i latou o e solia Ana tulafono. E faapefea e le toatamai ma le toasa ona avea ma faamaoniga o Lona alofa? … E atoatoa naua le alofa o le Atua, o lea ua Ia finagalo ai ma le agaalofa i tatou e usitai i Ana poloaiga aua ua Ia silafia, e na o le usiusitai lava i Ana tulafono e mafai ai ona tatou atoatoa, e faapei o Ia. Mo lenei mafuaaga, o le toasa o le Atua ma Lona toasa e le o se feteenaiga o Lona alofa, ae o se faamaoniga o Lona alofa. (“Alofa ma le Tulafono,” Liahona, Nov. 2009, 27)

O le taimi o le faamasinoga tonu o le Atua o se faailoga foi lea o Lona alofa mo Ana fanau. Faaaoga le tala ia Noa ma le Lolo, mo se faataitaiga. I ona po o Noa o le “lalolagi sa leaga i luma o le Atua” (Mose 8:28). Sa salalau sauaga ma sa faaauau ai pea ona faia e tagata mea leaga. Pe tusa ma le 120 tausaga na lapataia ai e Noa ia tagata afai latou te le salamo, o le a faaumatia i latou i se lolo (tagai Mose 8:17–30). Sa latou le amanaiaina le faatoga alofa a le Atua, ma sa fano tagata uma vagana ai Noa ma lona aiga i le Lolo (tagai Kenese 8:15–21).

vaa i luga o le sami

I le taimi muamua, o le vaaiga i lenei mea na tupu atonu e foliga mai o le faatautaiga o le faamasinoga tonu malosi ma le atoatoa. Ae mai se faaaliga vaaia, na maua ai e le perofeta o Enoka aso o Noa, tatou te maua ai ni malamalamaaga ofoofogia i le sootaga i le va o le faamasinoga tonu o le Atua ma Lona alofa.

aikona, suesue

Suesue e Sauniuni ai mo le Vasega

Faitau le Mose 7:28–29, 32–33, 37, ma vaavaai mo faamaoniga o le alofa loloto o le Atua, e oo lava mo i latou o e le faalogo i Ana poloaiga.

Mai lenei vaaiga faageetia, sa saunoa Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

O lena vaaiga mamana e tasi, ua aoao mai ai ni mea se tele e uiga i le natura moni o le Atua nai lo soo se isi lava tusitusiga faalelotu ua mafai ona faailoa atu ai. …

O se faatusa uigaese lea o le aafia ai o le Atua i o tatou olaga! … E maeu le faigofie ona alofa i se tasi o le e tupito le alofa ia i tatou! (“O Le Silisiliese o le Atua,” Liahona, Nov. 2003, 72)

A o e mafaufau i le uiga o le alofa o le Atua ia te oe, mafaufau i le auala sili e faamatala atu ai i isi. Na aoao mai Elder D. Todd Christofferson o le Korama a Aposetolo e Toasefululua:

Elder D. Todd Christofferson

E tele lava auala e faamatala ai ma talanoa ai e uiga i le alofa paia. O se tasi o faaupuga ua tatou faalogo soo i ai i aso nei e faapea, o le alofa o le Atua e “le faatuaoia.” E ui i se tasi lagona e moni ai, ae o le faamatalaga le faatuaoia e le o maua i tusitusiga paia. Ae, o Lona alofa ua faamatalaina i tusitusiga paia o le “alofa tele ma le ofoofogia” [Mataupu Faavae ma Feagaiga 138:3], “alofa ua atoatoa” [1 Ioane 4:18; Moronae 8:16], “alofa togiola” [Alema 5:26], ma le “alofa tumau-faavavau” [Ieremia 31:3]. O faaupuga sili atu nei ona o le upu le faatuaoia e mafai ona avatu ai ni manatu sese e uiga i le alofa paia, e pei o le, e faatagaina ma tuusaunoa e le Atua soo se mea tatou te faia ona o Lona alofa le faatuaoia; po o le, e le faia e le Atua ni poloaiga faamalosi ia i tatou ona o Lona alofa le faatuaoia; po o le, e faaolaina tagata uma i le malo faalelagi o le Atua ona o Lona alofa le faatuaoia. O le alofa o le Atua e le mafuatiaina ma o le a tumau pea e faavavau, ae o lona uiga mo i tatou taitoatasi e faalagolago lea i le auala tatou te tali atu ai i Lona alofa. (“Tumau i Lo‘u Alofa,” Liahona, Nov. 2016, 48)

aikona, mafaufau loloto

Mafaufau Loloto e Sauniuni ai mo le Vasega

E faapefea ona e faamatalaina le sootaga i le va o le faamasinoga tonu a le Atua ma Lona alofa mo Ana fanau?

Vaega 2

O le a se mea e mafai ona aoao mai e le alofa mutimutivale o le Alii ia te au e uiga i Lona alofa?

E manaia le lagona o le faamanuiaina o i tatou e le Atua pe a tatou usiusitai. Ae e faigata ona aafia i taunuuga mo a tatou lava filifiliga le lelei. Ma a ogaoga ia taunuuga, e mafai ona taufaafefe. I taimi faapena, atonu tatou te aioi atu ai i le Alii mo lona alofa mutimutivale.

Peitai, i le tele o isi tulaga, o i latou o e agasala e le iloaina le manaomia o le alofa mutimutivale o le Atua. Mafaufau i le mea na oo ia Korianetona, le atalii o Alema le Itiiti. Ina ua ia lafoai lana misiona ma faia ni agasala matuia, sa lagona e Korianetona o se “amioletonu” mo se tagata agasala ina ia faasalaina ma oo ai i le faanoanoa (tagai Alema 42:1).

aikona, suesue

Suesue e Sauniuni ai mo le Vasega

Faitau le Alema 42:15, 22, 24–25, ma vaavaai mo mea na aoao atu e Alema e uiga i le faamasinoga tonu, alofa mutimutivale, ma le Togiola a Iesu Keriso. (Manatua: O se tagata salamo o “le ua salamo i le agasala; o se tasi o faanoanoaga ona o ana solitulafono” [Webster‘s Dictionary (1828), “Penitent”].)

Keriso i Ketesemane, saunia e Harry Anderson

O Iesu Keriso, faatasi ai ma lona alofa loloto patino mo oe ma tagata uma, e tu i le va o i tatou ma le faamasinoga tonu o loo faatalitali mai mo i tatou (tagai Mosaea 15:9). Ua Ia totogiina le tau maoae mo a tatou agasala. Ma e finagalo o Ia e faasafua atu le alofa mutimutivale i e ua salamo (tagai i le Mataupu Faavae ma Feagaiga 19:16–18). Na aoao mai Peresitene Dieter F. Uchtdorf, ao avea ma Fesoasoani Lua i le Au Peresitene Sili:

Peresitene Dieter F. Uchtdorf

E le mafai ona tatou mauaina lo tatou ala i le lagi; o manaoga o le faamasinotonu e tu o se papupuni, lea e leai ai so tatou malosi e faatoilalo ai e i tatou lava ia.

Ae e le leiloloa tagata uma. …

E ui e ‘ulaula a tatou agasala, ae mafai ona sinasina e pei o le kiona. Ona “na foaifuaina e [lo tatou Faaola pele] Ia e fai ma togiola mo tagata uma’ [1 Timoteo 2:6], o lea ua saunia ai mo i tatou se faitotoa e ulu atu ai i Lona malo e faavavau. (“O Le Meaalofa o le Alofa Tunoa,” Liahona, Me 2015, 108.)

Toe mafaufau i le faaaliga a Enoka e uiga i le Lolo. Na aoaoina e Enoka e faapea, i le lalolagi o agaga, e oo lava i le au faalogogata o e na maliliu i le Lolo, e iu lava ina mafai ona oo mai ma tu “i le aao taumatau o le Atua” pe afai latou te faaaoga le faatuatua ia Iesu Keriso ma salamo i a latou agasala (Mose 7:57; tagai foi Mose 7:38, 55–56; Mataupu Faavae ma Feagaiga 138:6–8, 28–37).

Na aoao mai e Elder Lynn G. Robbins o le Fitugafulu le ala e tuuina mai ai e le alofa tunoa o le Alii ia i tatou le tele o avanoa e suia ai:

Elder Lynn G. Robbins

Tatou te tutu ma ofo uma i le alofa tunoa o le Faaola i le tuuina mai ia i tatou o avanoa lona lua e faatoilalo ai le agasala, po o toilalo o le loto.

E leai se tasi e sili ona ‘au ma i tatou nai lo le Faaola. …

I le iloaina o le ala sao ma le vaapiapi o le a salalau solo ai tofotofoga ma o le toilalo o se mea e tupu pea i aso uma mo i tatou, na totogi e le Faaola se tau e le mafuatia e aumaia ai ia i tatou le tele o avanoa e faapena ona manaomia e manuia ai le suega o la tatou olaga faataitai. …

Ona tatou te le mananao ina ia uma i tatou seia tatou avea e pei o le Faaola, e tatau ona tatou faaauau pea ona tutu i luga i taimi taitasi tatou te pa’u’u ai, ma se naunauga e tuputupu a’e pea ma agai i luma e ui i o tatou vaivaiga. (“Seia Fitugafulu Ni Fitu,“ Liahona, Me 2018, 22, 23)

aikona, mafaufau loloto

Mafaufau Loloto e Sauniuni ai mo le Vasega

O a ni ou mafaufauga po o lagona mo Iesu Keriso, i le iloaina na Ia faamalieina manaoga o le faamasinoga tonu, ina ia mafai ona e salamo ma maua le alofa mutimutivale? O le a se mea e mafai ona e faia e faaalia ai lou lotofaafetai mo le taulaga togiola na Ia faia mo oe?

E Te Fia Aoao Atili? (Tuu i le faitalia)

O fea e mafai ona ou aoao atili ai e uiga i le faamasinoga tonu ma le alofa mutimutivale o le Atua?

Peresitene Russell M. Nelson

I le lauga “O le Alofa ma le Tulafono a le Atua” (faigalotu a le Iunivesite o Polika Iaga, 17 Sete., 2019, speeches.byu.edu), na aoao mai ai Peresitene Russell M. Nelson e uiga i le sootaga i le va o tulafono a le Atua ma Lona alofa e le iu.

Elder D. Todd Christofferson

Na aoao mai Elder Christofferson i lana saunoaga “O Le Alofa o le Atua” (Liahona, Nov. 2021, 16–19), e faapea “o le alofa o le Atua e le faatagaina se agasala; ae, e aumaia ai le togiola.”

O le ata vitio “O le a le Faamasinoga Tonu ma le Alofa Mutimutivale?” (5:31) ua tuuina mai ai se vaaiga aoao o le sootaga i le va o le tulafono, faamasinoga tonu, ma le alofa mutimutivale.

I le ata vitio “O le Puluvaga” (10:44), sa faaaoga ai e Peresitene Boyd K. Packer o le Korama a Aposetolo e Toasefululua se talafaatusa, e aoao atu ai le ala e faamalie ai e Iesu Keriso ia manaoga o le faamasinoga tonu ma ofoina mai ia i tatou le alofa mutimutivale.