Faatomuaga i le O Iesu Keriso ma Lana Talalelei e Faavavau Anomea a le Faiaoga (Mataupu Faalelotu 250)

Susū Maia i le O Iesu Keriso ma Lana Talalelei e Faavavau! Na tautino mai e Peresitene Russell M. Nelson, “E le’i i ai lava se taimi i le talafaasolopito o le lalolagi [i lo le taimi nei] ua sili atu ona tāua patino le iloa e uiga i lo tatou Faaola ma le fitoitonu i le agaga o tagata soifua uma” (“Upumoni Mamā, Mataupu Faavae Mamā, ma Faaaliga Mamā,” Liahona, Nov. 2021, 6). O lenei kosi o le a tuuina atu ai i au tamaiti aoga se avanoa tulaga ese e faateleina ai lo latou faatuatua ia Iesu Keriso, faalolotoina lo latou malamalama i Lana talalelei e faavavau, ma faateleina ai lo latou mautinoa e maua Lona mana ma le Togiola i o latou olaga taitoatasi.

O a ni sini faamoemoeina o lenei vasega?

O le Faamoemoega o Seminare ma Inisitituti o Mataupu Faalelotu “o le fesoasoani lea i le autalavou laiti ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o ō latou aiga, ma isi mo le ola e faavavau faatasi ma lo latou Tama i le Lagi” (Aoao Atu ma le Aoaoina Mai o le Talalelei: O Se Tusitaulima mo Faiaoga ma Taitai i Seminare ma Inisitituti o Mataupu Faalelotu [2012], x).

O lenei kosi ua mamanuina e fesoasoani ia te oe ma au tamaiti aoga e faataunuu lenei faamoemoega e ala i le

• auai i aafiaga e aoao ai lea e faateleina ai le faatuatua ia Iesu Keriso ma Lona mana e faamalosia, faamamā, ma faaatoatoa ai oe e ala i Lana Togiola;

• faateleina lou agavaa e maua ai faaaliga;

• faailoaina, faamalamalamaina, ma molimau atu i matafaioi paia ua faataunuuina e Iesu Keriso i le fuafuaga o le faaolataga a le Tama Faalelagi;

• faamalosia o le tuuto e avea ma soo faamaoni o Iesu Keriso e ala i le tausia o Ana poloaiga ma faamamaluina lau sootaga faalefeagaiga ma Ia; ma

• faalolotoina lou alofa mo le Faaola ma vaavaai mo ni auala e faaali atu ai le lotofaafetai mo Ia ma lou Tama Faalelagi.

O faapefea ona faatulagaina lenei kosi?

Ua vaevaeina lenei kosi i ni iunite se ono, ma lesona e 28. O iunite taitasi e aofia ai se vaega tāua o le misiona a le Alii i le muai olaga, olaga faitino, po o le olaga pe a mavae le oti.

Ua fuafuaina lesona taitasi mo le periota e 50 minute o le vasega. Mo vasega e faatasi i le vaiaso ona feiloai mo le 90 minute, e mafai e faiaoga ona tuufaatasi ni lesona se lua, auā o lesona i totonu o iunite taitasi e fesootai vavalalata lava i autu.

O lesona taitasi ua i ai anomea mo le sauniuniga o le vasega ma anomea a le faiaoga. Ua mamanuina nei lesona e valaaulia ai tapenaga māgafagafa, faamalosi’au ai tamaiti aoga e punouai i se aoaoga loloto, ma aumaia ai faatinoga e fesoasoani ia i latou ia avea atili e pei o le Tama Faalelagi ma Iesu Keriso.

A o e suesue i le mataupu aoaoina, tatalo mo le fesoasoani a le Alii ia e iloa le auala e faamalieina ai manaoga o tagata aoga. Na aoao mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Ia gauai atu— ae maise lava, ia gauai atu i le Agaga,. Tuu sina avanoa i le fuafuaga o lau lesona. Afai e te manao e faapuupuu se lesona ina ia mafai ona tuuina atu lau molimau ma faamalosia ai se talanoaga i se mataupu faaonapo nei, faamolemole ia faia pe a musuia e le Agaga ma pe a faatonuina e talafeagai. …

… Manatua o se tamaititi aoao e lē o se koneteina e faatumuina; o se tagata aoga o se afi e faamumūina. (“Angels and Astonishment” [lauga na tuuina atu i le faasalalauga faaleaoaoga a Seminare ma Inisitituti o Mataupu Faalelotu, Iuni 12, 2019], broadcasts.ChurchofJesusChrist.org)

Anomea mo Sauniuniga o le Vasega

O anomea mo sauniuniga o le vasega ua faamoemoeina ia suesue e oe ma au tamaiti aoga e sauniuni ai mo le vasega. O loo aofia ai aoaoga mai tusitusiga paia ma taitai o le Ekalesia, vitiō, ma le vaega o le “E te Fia Aoao Atili?” lea e maua ai punaoa faaopoopo e fesootai i le autu o le lesona.

O anomea mo sauniuniga o le vasega o loo i ai foi fesili ma gaoioiga e faamalosi’au ai tamaiti aoga e faaloloto lo latou aoaoina ma saunia e faasoa mai i le talanoaga a le vasega. Mo se faataitaiga, i le anomea mo sauniuniga o le vasega mo le lesona 4, “Mauaina o le Faamoemoega ma le Olioli i Foafoaga a le Alii,” ua valaaulia tagata aoga e fai le gaoioiga lenei:

lesona 4 gaoioiga faatino

O le faaaogaina o le anomea mo sauniuniga o le a fesoasoani ai i tagata aoga e “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). Na aoao mai Elder David A. Bednar o le Korama a Aposetolo e Toasefululua e faapea:

Elder David A. Bednar

O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae lē tau lava ina talia. .…

… E tatau i se tagata aoga ona faaaoga le faatuatua ma galue ai ina ia maua le malamalama mo ia lava. (“Saili e Aoao e Ala i le Faatuatua,” Liahona, Set. 2007,64)

E mafai ona e vaavaai mo avanoa e faamalosia ai tagata aoga i le folafolaga a le Alii e faapea o i latou o e saili ma le naunau i le aoaoina faaleagaga o le a mauaina (tagai Mataio 7:7; Mataupu Faavae ma Feagaiga 42:61; 88:63).

Anomea a le Faiaoga

I le folasaga o anomea a le faiaoga mo lesona taitasi, o le a e maua ai se faamatalaga o taunuuga faamoemoeina a le tagata aoao. O lenei faatomuaga e sosoo ma manatu fautuaina faafaiaoga e tuuina atu ai le faatulagaga o lesona, aoaoina mai tusitusiga paia ma taitai o le Ekalesia, o upumoni e faamamafa ai, fesoasoani mo talanoaga, ma manatu mo le faaaogaina.

A o e suesue i anomea a le faiaoga, ia ua’i atu i auala e mafai ona utuvai mai ai i sauniuniga a tagata aoga. O le faalagolago pea lava pea i sauniuniga a tagata aoga o le a fesoasoani latou te lagonaina ai le tāua o le saunia mo vasega uma. (Manatua: Ia manatua afai e te folasia atu ni anotusi faaopoopo i le taimi o le vasega, o le taimi e faaaluina e mafai ona taofia ai tamaiti aoga mai le faasoaina o mea sa latou aoaoina ma lagonaina a o latou suesue i anomea mo sauniuniga.)

O le fesili muamua i le pito i lalo, mai le lesona 4, o se faataitaiga i auala e mafai ai e anomea a le faiaoga ona utuvai mai tapenaga a tagata aoga:

atatipi o le fesili o le lesona 4

aikona, mafaufau loloto

Mafaufau loloto i Sauniuniga e Aoao Atu Lenei Vasega

E talitutusa ma mea o le a faia e au tagata aoga a o le’i amataina le vasega, faaaoga se minute e mafaufau loloto ai a o e sauni e aoao atu lenei kosi. Muamua, vaai muamua i se lesona se tasi pe lua e faamasani ai i sauniuniga a le vasega ma anomea a le faiaoga. Mātau le auala ua mamanuina ai nei anomea ina ia faaaoga faatasi a o e sauni e aoao atu. Ona mafaufau lea i fesili nei:

• O a ni uiga po o ni auala e mafai ona e faaaogaina ia aogā ai nei anomea i au tamaiti aoga?

• O a nisi o auala e te ono uunaia tagata aoga ia saunia ina ia mafai ona latou maua se aafiaga faatamaoaigaina i le vasega?

• O a ni mea e mafai ona e faia e faaaofia ai tamaiti aoga o ē atonu e le’i suesue i anomea mo sauniuniga?

E faapefea ona ou saunia lelei e aoao atu?

O le a fesoasoani le Alii ia te oe ao e saunia ma aoao Ana fanau. O au taumafaiga e suesue ma le filiga i tusitusiga paia ma ola ai i le talalelei o le a fesoasoani e te agavaa ai mo le taitaiga a le Agaga (see Mataupu Faavae ma Feagaiga 11:21).

Atonu e aogā le fai atu o se tasi pe sili atu o fesili nei a o e sauni e aoao faatasi ma aoao atu au tagata aoga:

• Pe na ou tatalo ina ia ou maua le taitaiga a le Agaga Paia ma ia malamalama i manaoga o a’u tagata aoga? E faapefea ona ou iloatino mea e sili ona talafeagai mo i latou?

• Pe o o’u lagona le mausali o le malamalama i tusitusiga paia, i anomea mo sauniuniga o le vasega, ma anomea a le faiaoga? O i ai se isi mea e tatau ona ou fetuuna’ia e taulima ai manaoga o a’u tagata aoga?

• E faapefea ona ou fesoasoani i a’u tagata aoga ia taula’i atu i le Faaola ma aoao mai le Agaga Paia i lenei lesona?

• E faapefea ona ou fesoasoani i a’u tamaiti aoga taitoatasi ia auai atoatoa? E faapefea ona ou mautinoa ua lava le taimi latou te manaomia i le taimi o le vasega e fai ai ni fuafuaga patino e faaaoga ai mea ua latou aoaoina?

• E faapefea ona ou fatuina se siosiomaga o aoaoga e lagona ai e tagata aoga lo latou tāua, taliaina, ma le saogalemu e faasoa ma aoao mai le tasi i le isi? (Tagai Mataupu Faavae ma Feagaiga 88:78, 122.)

E faapefea ona ou fetuuna’ia lesona mo i latou e i ai manaoga faapitoa?

A o e sauni e aoao atu, ia nofouta i tagata aoga e i ai manaoga faapitoa. Fetuuna’i gaoioiga ma faamoemoega ia aofia ai tamaiti aoga nei ma fesoasoani ia i latou ia faamanuiaina. Mo nisi faamatalaga, tagai i punaoa i luga o le itulau mo Manaoga Faapitoa i le disabilities.ChurchofJesusChrist.org.

O le a se mea ua faamoemoeina mai i tagata aoga ia maua ai ni togi?

Ina ia maua ni togi mo le faauuga o le inisitituti, e manaomia e tagata aoga ona

1. suesue i anomea mo sauniuniga ia lē itiiti ifo ma le 75 pasene o lesona,

2. ia 75 pasene le auai i vasega, ma

3. faamae’a se tasi o aafiaga e aoao ai: tausia se api talaaga o suesuega; tusi tali i fesili tusitusi e tolu, mamanu ma faamae’a sa latou lava galuega faatino e aoao ai (faatasi ai ma le faamaoniga a le faiaoga) e fesootai ma le anotusi o le kosi; pe faamaumau tali i fesili ma gaoioiga uma i le anomea mo sauniuniga. (Manatua: E lē manaomia e tagata aoga ona auina atu a latou tali ia te oe; i le faaiuga o le semesa; e manaomia lava ona latou faaali atu ia te oe mea na latou faamae’aina.) Sue nisi auiliiliga i le itulau Institute Elevate Learning Experiences .

aikona, tusi faamaumau

Tusi Faamaumau Ou Manatu

Mafaufau i le ituaiga o aafiaga faaleaoaoga e te faamoemoe o le a maua e au tagata aoga i lenei kosi. Lisi ni nai ou manatu e uiga i le ala ua e fuafua e fesoasoani ai ia i latou ia maua se aafiaga anoa o le aoaoina.

E Te Fia Aoao Atili? (Tuu i le faitalia)

O a isi punaoa e mafai ona fesoasoani ai ia te a’u ia avea ma faiaoga e finagalo le Alii ia ou avea ai?

E faaopoopo atu i le auai i fonotaga faaleaoaoga a faiaoga faatasi ma lau taitai faamaopoopo po o le aufaigaluega i le lotoifale, mafaufau e iloilo punaoa nei:

• O le tusitaulima o Punaoa mo le Aoaoina o Faiaoga Fou e mafai ona fesoasoani e te malamalama ai i le faamoemoega ma le filosofia faafaiaoga o Seminare ma Inisitituti faapea foi ma le fesoasoani e te faata’ita’ia ai tomai faafaiaoga.

• O le punaoa Aoao Atu i le Ala a le Faaola o loo faasoa mai ai ni mataupu faavae e fesoasoani i faiaoga o le talalelei ia aoao atu atili e pei o le Faaola.