Ata o Keriso, saunia e Heinrich Hofmann

Lesona 2 Anomea mo le Sauniuniga o le Vasega

Faamalosia o a Tatou Molimau i le Keriso Soifua

Vaai faalemafaufau i le faavauvau ma le lototiga atonu na lagonaina e soo o Iesu Keriso a o latou vaavaai atu ia te Ia o mafatia ma maliu i luga o le satauro. Ona o le le malamalama atoatoa i Lana misiona, atonu na latou lagonaina ai le le mautonu ma le tuuatoatasi a o latou tuuina Lona tino i se tuugamau. E mafai ona e vaai faalemafaufau i lo latou olioli ma le maofa i le mavae ai o ni nai aso mulimuli ane na latou vaai ai ia te Ia o soifua. Ua mafai nei ona latou molimau atu o Ia o le Keriso soifua! A o e suesue i lenei anomea, mafaufau i lau lava molimau e uiga i le Keriso soifua ma lona uiga ia te oe.

Vaega 1

O le a le taua o le fai atu “O Iesu o le Keriso”?

I le amataga o Lana galuega i le olaga nei, sa faalogo ai ni soo se toalua o Ioane le Papatiso o fai mai Ioane e uiga ia Iesu, “Faauta i le Tamai Mamoe a le Atua!” (Ioane 1:36). Ina ua la faalogo i lenei mea, sa laua mulimuli loa ia Iesu. O se tasi o i la‘ua, o Aneterea, na maua lona uso o Simona Peteru ma faasilasila atu, “Ua ma maua … le Keriso” (Ioane 1:41).

O le tautinoga a Anetelea o Iesu o le Keriso e taua. O le upu Eleni mo Keriso o lona uiga “o le na faauuina” ma e tutusa ma le upu Eperu mo le Mesia. “Ua faaaogaina o se faalupega o se tofi o le [Keriso po o le Mesia] e faasino i le Tupu ma le Laveai o le sa faatalitalia ma le naunautai e Iutaia lona afio mai” (Bible Dictionary, “Messiah”).

Mulimuli ane i Lana galuega, sa fesili atu Iesu i Ona soo pe manatu tagata o ai o Ia. Sa latou tali atu i igoa o nisi o perofeta. Ona fetalai atu lea o Iesu, “Pe se a la outou upu ia te a’u po o ai?” (Mataio 16:15).

O Iesu o loo talanoa atu ia Peteru

aikona, suesue

Suesue e Sauniuni ai mo le Vasega

Faitau le Mataio 16:16–17 pe matamata le “O Oe o le Keriso” mai le amataga e oo i le taimi 0:52 e aoao ai le tali a Peteru i le fesili a le Alii.

I le avea ai ma Keriso, sa “faauuina Iesu e le Tama e avea ma Ona sui patino i mea uma e faatatau i le faaolataga o tagata” (Bible Dictionary, “Anointed One”). Ona o Iesu o le Keriso, ua na o Ia lava le ala ma ua na o Ia lava le suafa e mafai ai ona laveaiina i tatou mai taunuuga o le agasala ma le oti (tagai Galuega 4:12; Mosaea 3:17).

aikona, tusi faamaumau

Tusi faamaumau Ou Manatu

Faaalu ni nai minute e faitau ai i le ulutala “Iesu Keriso” i le Taiala mo Autu po o le Taiala i Tusitusiga Paia (o loo maua i le ChurchofJesusChrist.org) ma vaavaai mo suafa, faalaniga, ma matafaioi eseese na tuuina atu ia Iesu Keriso. Tusi faamaumau ou manatu, ma ia saunia e faasoa atu i lau vasega.

E mafai foi ona e faitau pe faalogologo i le “This is the Christ,” o se pese na tusia e Peresitene James E. Faust, o le sa auauna atu i le Au Peresitene Sili. Mafaufau po o le a se mea e mafai ona e faasoa atu i le vasega e uiga i ou mafaufauga ma lagona e uiga i le pese.

“This is the Christ,” na saunia e James E. Faust, Jan Pinborough, ma Michael Finlinson Moody; usuina e le Aufaipese a le Tapeneko i le Lotoa o le Malumalu i le taimi o le konafesi aoao ia Oketopa 2018

Vaega 2

E mafai faapefea e Aposetolo a le Alii ona uunaia la‘u molimau o Iesu o le Keriso?

I le tele o vaega o le lalolagi, o le talitonu i le paia o Iesu Keriso ua faaitiitia (tagai Neil L. Andersen, “Ua Matou Tautalatala e uiga ia Keriso,” Liahona, Nov. 2020, 88). Atonu ua e molimauina se vaivaiga o le faatuatua i le mea o loo e nofo ai, ua e vaaia se tasi e te alofa i ai o savali ese mai le Faaola ma Lana Ekalesia, pe ua oo foi i lau lava taua ma le le talitonu.

O le leai o se talitonuga ia Iesu Keriso e le tulaga ese i o tatou aso. Mo se faataitaiga, e ui lava ina ua uma ona vaai sa Lamana ma sa Nifae i “faailoga ma mea ofoofogia” o le soifua mai o le Faaola, sa lei pine ae “faaitiitia ifo lava i lalo lo latou ofo … ma amata ona le talitonu i mea uma sa latou faalogo ma vaai i ai” (3 Nifae 2:1).

Ina ia fesoasoani ia i tatou taitoatasi i lo tatou talitonuga ia te Ia, ua valaauina ai e le Alii ia Aposetolo e avea ma molimau faapitoa o Ia i tagata uma (tagai Mataio 28:19–20; 3 Nifae 12:1; Mataupu Faavae ma Feagaiga 107:23).

O Keriso o loo Faauuina le Au Aposetolo, saunia e Harry Anderson

Na aoao mai Peresitene Gordon B. Hinckley:

Peresitene Gordon B. Hinckley

E tulaga ese lo latou valaauga; o i latou o Aposetolo a le Alii o Iesu Keriso, ua filifilia ma tofia e Ia. Ua poloaiina i latou e molimau atu i Lona soifua moni e ala i le mana ma le pule o le avea ma aposetolo paia. (“Special Witnesses of Christ,” Ensign, Apr. 2001, 4)

aikona, mafaufau loloto

Mafaufau Loloto e Sauniuni ai mo le Vasega

Toe mafaufau i taimi na e faalogo ai i Aposetolo a le Alii o faasoa mai a latou molimau e uiga i le Faaola. Na faapefea ona aafia e a latou molimau lau lava molimau e uiga ia te Ia? E mafai ona e matamata i se tasi pe sili atu foi o molimau a Aposetolo soifua a le Alii mai le faasologa o ata vitio “Special Witnesses of Christ” (o loo maua i le ChurchofJesusChrist.org).

Vaega 3

E mafai faapefea ona suia lo‘u olaga e ala i le suesueina “O Le Keriso Soifua”?

I le aso 1 Ianuari, 2000, sa lolomi ai e le Au Peresitene Sili ma le Korama a Aposetolo e Toasefululua a latou molimau i le Faaola i se pepa o faamatalaga ua ta‘ua “O Le Keriso Soifua: O Le Molimau a le Au Aposetolo” (o loo maua i le ChurchofJesusChrist.org).

Sa saunoa mai Elder Robert D. Hales o le Korama a Aposetolo e Toasefululua e uiga i lenei pepa faamatalaga lauiloa:

Elder Robert D. Hales

“O Le Keriso Soifua: O Le Molimau a le Au Aposetolo” ua leva ona tapena mo le taimi o le a sili ona tatou manaomia ai. (“Konafesi Aoao: Faamalosia o le Faatuatua ma le Molimau,” Liahona, Nov. 2013, 7)

Na saunoa foi Peresitene Russell M. Nelson:

Peresitene Russell M. Nelson

E toatele tagata o le ekalesia ua taulotoina ona upumoni. O isi e tau le iloaina o loo i ai. A o e saili e aoao atili e uiga ia Iesu Keriso, ou te uunaia oe e suesue i le “O Le Keriso Soifua.” (“Mauaina o le Mana o Iesu Keriso i o Tatou Olaga,” Liahona, Me 2017, 40)

aikona, suesue

Suesue e Sauniuni ai mo le Vasega

Faitau ma le faaeteete le “O Le Keriso Soifua” ma mafaufau e faailoga vaega e tulaga ese ia te oe. Mafaufau e tatalo ae e te lei amata ina ia mafai e le Agaga ona fesoasoani ia te oe ia lagona le moni ma le taua o mea o loo e suesueina.

aikona, faatino

Faatino

O le taulotoina o le “O Le Keriso Soifua” e mafai ona faamalie ai le tulaga manaomia o le Siitia le Aoaoina mo lenei kosi. Mafaufau e faatu se sini e tauloto uma po o vaega o lenei pepa o faamatalaga a o e taumafai e faamalosia lau molimau i le Keriso soifua.

E Te Fia Aoao Atili? (Tuu i le faitalia)

O fea e mafai ona ou aoao atili ai e uiga i le uiga o suafa ma faalaniga eseese o Iesu Keriso?

I le ata vitio “Names of the Savior” (8:27), o loo talanoaina ai e Peresitene Nelson le tele o suafa eseese o Iesu Keriso ma le ala latou te faaalia ai le taua o Lana misiona paia.

O le a le fetalaiga a le Alii e uiga i Lona lava paia?

Mo nisi o faataitaiga o le tautino atu e Iesu Keriso o Lona paia, faitau le Mareko 14:53–65, Ioane 10:22–39, 3 Nifae 11:10–11, ma le Mataupu Faavae ma Feagaiga 35:1–2. E mafai foi ona e matamata i le “Jesus Declares: I Am the Light of the World; the Truth Shall Make You Free” (4:26).