Ua faamafanafana e Iesu se tamaitai ma’i

Lesona 13 Anomea mo le Sauniuniga o le Vasega

Auauna Atu e pei o le Faaola

Ua tatou matauina uma—ma o nisi taimi tatou te le iloaina ai—o loo manaomia e tagata le fesoasoani. O nisi atonu o loo feagai ma se aso faigata. O isi atonu o loo aafia i le tuuatoatasi, le mautonu, fiaaai, le fiafia, po o le ma’i. Atonu tatou te taumanatunatu, o le a se mea e mafai ona ou faia? A tatou vaai i le soifuaga o le Faaola, tatou te vaaia le tele o faataitaiga o le ala na Ia “femaliuai ma agalelei” (Galuega 10:38). A o e vaai atu i Lana faataitaiga, mafaufau i mea ua e aoaoina e uiga i le auauna atu i manaoga o isi.

Vaega 1

O le a se mea e mafai ona ou aoao mai e uiga i auaunaga mai le faataitaiga a le Faaola?

Mafaufau pe mata o a ni lagona o le Faaola i le taimi o le Tausamaaga Mulimuli, o loo tulimatai atu i puapuaga matautia o loo faatalitali mai ia te Ia i Ketesemane ma luga o le satauro. Na saunoa mai Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

I tulaga o le loloto ma le malosi o lagona … sa tulai filemu Keriso, ma fusi ia te ia i le ie soloi faapei o se pologa po o se auauna, ma tootuli e mulumulu vae o le Au Aposetolo. (Tagai Ioane 13:3–17.) O lenei vaega itiiti o tagata talitonu i lenei malo tau le faavaeina o le a oo atu o lo latou tofotofoga matuia, o le a na tatau ai ona ia faataatia ese lona tiga ua faateleina ina ia mafai ai ona toe auauna tasi ai ma faamalosia i latou. (“Sa Alofa o Ia ia te i Latou e oo i le Iuga,” Liahona, Ian. 1989, 25)

Ua mulumulu e Iesu vae o Peteru

Ina ua uma ona mulumulu vae o Aposetolo, sa tuu atu e le Faaola ia i latou se poloaiga fou, lea o le a taua ia i latou uma o e o le a saili e auauna atu i Lona suafa.

aikona, suesue

Suesue e Sauniuni ai mo le Vasega

Faitau le Ioane 13:34–35, ma mafaufau pe aisea e totonugalemu ai lenei poloaiga i le auaunaga.

A o tatou mafaufau i le soifuaga o Iesu Keriso, e mafai ona tatou iloa ai na Ia faaali mai ia i tatou le ala e auauna atu ai i le alofa.

aikona, suesue

Suesue e Sauniuni ai mo le Vasega

Faitau pe matamata i se tasi pe sili atu o aafiaga nei mai le soifuaga o le Faaola ma mafaufau i mea e mafai ona e aoaoina e uiga i le auauna atu mai Lana faataitaiga ma aoaoga. Mafaufau e tusi faamaumau ou manatu, lagona ma uunaiga.

• Faitau le Mareko 5:25–34 pe matamata i le “Jesus Heals a Woman of Faith” (1:38).

• Faitau le Mareko 10:13–16 pe matamata i le “Suffer the Little Children to Come unto Me“ (2:40).

• Faitau le Luka 15:11–32 pe matamata i le “The Prodigal Son” (5:34).

• Faitau le Ioane 4:5–26 pe matamata i le “Jesus Teaches a Samaritan Woman” (3:55).

• Faitau le Ioane 8:2–11 pe matamata i le “Go and Sin No More” (3:21).

O le toatele o i tatou e mananao e auauna atu i isi i le alofa faaKeriso. Ae atonu tatou te le iloa pe faapefea po o le a foi le taimi e fesoasoani atu ai. Na aoao mai Peresitene Russell M. Nelson e faapea “o le auauna atu o lona uiga o le mulimuli i ou lagona e fesoasoani ai i se isi tagata ia lagona le alofa o le Faaola i lona olaga” (i le Sheri L. Dew, Insights from a Prophet’s Life: Russell M. Nelson [2019], 349).

Na ofoina mai e Peresitene Henry B. Eyring le fautuaga lenei:

Peresitene Henry B. Eyring

O [le faamoemoega o le Alii] ia tausia e Lana Au Paia le tasi ma le isi i le ala Na te tausi ai i latou. … Latou te manuia pe a taialaina e le Agaga Paia le e tuuina atua le tausiga ia iloa po o a mea e finagalo le Alii e aupito silisili ona lelei mo le tagata o loo ia taumafai e fosoasoani i ai. (“Auaunaga Musuia,” Liahona, Me 2018, 62)

O le a tele ina uunaia i tatou e le Agaga Paia e auauna atu i ni auala laiti ma faatauvaa. Sa aoao mai Peresitene Jean B. Bingham, Peresitene Aoao o le Aualofa:

Peresitene Jean B. Bingham

O nisi taimi tatou te manatu ai e ao ona tatou faia se mea silisili ma toa e “faitaulia” ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia. O le a le mea na faia e le Faaola? … Sa Ia ataata foi i [isi], talanoa i [isi], savavali ma [isi], faalogo atu i [isi], faaavanoa se taimi mo [isi], faamalosiau atu, aoao atu, fafaga, ma faamagalo atu. Sa Ia auauna atu i aiga ma uo, tuaoi ma tagata ese foi, ma sa Ia valaaulia ē masani ma ē pele ia olioli i faamanuiaga silisili o Lana talalelei. O na faatinoga “faigofie” o auaunaga ma le alofa ua maua ai se mamanu mo a tatou auaunaga i aso nei. (“Auauna Atu e pei ona Faia e le Faaola,” Liahona, Me 2018, 104)

O Iesu o loo auauna atu i se tina

Faitau le saunoaga lenei a Sharon Eubank, Fesoasoani Muamua i le Au Peresitene Aoao o le Aualofa, ma mafaufau po o le a se mea e mafai ona e faia ia avea ai le auaunaga o se aafiaga e sili atu ona anoa ma patino. Pe matamata i le “You Are the Gift” (0:54) e sui i le faitauina o le saunoaga a Sister Eubank.

Sister Sharon Eubank

Afai tatou te suia la tatou vaaiga ina ia faaitiitia le tausiga o e matitiva ma e le tagolima e uiga i le foai atu o mea, ae ia sili atu i le faamalieina o manaoga autu o le fiaai mo fesootaiga faaletagata, faia o talanoaga anoa, ma le fatuina o sootaga mauoa ma lelei, ona mafai lea e le Alii ona auina atu i tatou i se nofoaga. … E finagalo le Atua e faaaoga oe. O loo i ai se galuega mo oe e faia, ma e patino lava ia te oe ma ou gafatia. E leai se tasi e tutusa ona gafatia ma oe. … Manatua, i le ala lava e tasi e pei o le Faaola, o oe lava o se tasi o meaalofa silisili e mafai ona e tuuina atu i isi tagata o manaomia le fesoasoani. (“Turning Enemies into Friends” [lauga i le faatasiga a le Iusnivesite o Polika Iaga, 23 Ian. , 2018], speeches.byu.edu)

o tamaitai o loo feopoopoa’i

aikona, talanoa

Talanoa e Sauniuni ai mo le Vasega

Fesili i se tagata o le aiga, uo, po o se tasi o le vasega pe faapefea ona latou auauna atu i isi. Atonu foi e te manao e talanoaina po o a mea e taofia ai i tatou i nisi taimi mai le auauna atu ia i latou e manaomia le alofa faaKeriso.

Vaega 2

O le a se mea e mafai ona ou aoao mai le faataoto a le Faaola i le Samaria agalelei e uiga i le auaunaga?

I ona po o Iesu Keriso, sa matua tele le feitagai i le va o tagata Iutaia ma tagata Samaria. Sa vaai tagata Iutaia i tagata Samaria ma le ita aua o i latou “o se vaega o tagata Isaraelu ma Nuuese” ma o la latou “tapuaiga o se suifefiloi o talitonuga ma faiga faapaganā” (O le Taiala i Tusitusiga Paia, “Samaria,” scriptures.ChurchofJesusChrist.org).

Ina ua taumafai se loia (loia o lea taimi o ni tagata atamamai i le tulafono a Mose) e tauamiotonuina ana faatinoga e faatatau i le poloaiga ia “alofa i lou tuaoi,” sa ia fesili atu ai i le Alii, “O ai lo’u tuaoi?” (Tagai Luka 10:25–29.) Na tali le Alii i le faataoto o le Samaria agalelei.

O Le Samaria Agalelei, saunia e Walter Rane

aikona, suesue

Suesue e Sauniuni ai mo le Vasega

Faitau le Luka 10:30–37, ma mafaufau po o le a se mea e mafai ona e aoaoina e uiga i le auauna atu i isi. E mafai foi ona e matamata i le “Parable of the Good Samaritan” (5:11).

Na aoao mai Elder Gerrit W. Gong o le Korama o Aposetolo e Toasefululua e faapea:

Elder Gerrit W. Gong

I luga o o tatou auala pefupefua i Ieriko, e faasalaveia i tatou e puapuaga o le olaga, faamanu’alia, ma tuua ai ma le tiga.

E ui e ao ina tatou fesoasoani le tasi i le isi, ae tele taimi tatou te ui ese atu ai i le isi ituala, po o le a lava le mafuaaga.

Ae peitai, faatasi ai ma le agaalofa, e tu le Samaria agalelei ma fusifusi o tatou manu’anu’a . … Na te aumaia i tatou i le faletalimalo, lea e mafai ona faatusa i Lana Ekalesia. …

… I lenei vaitau o le Eseta, o loo valaaulia i tatou e Iesu Keriso ia avea, e faapei o Ia, o se Samaria agalelei, ia fai Lona Faletalimalo (Lana Ekalesia) o se lafitaga mai uno’oa uma ma afa o le olaga. (“Avanoa i le Faletalimalo” Liahona, Me 2021, 24–25)

tamaloloa e toalua o loo talanoa

aikona, faatino

Faatino

O ai e te lagona le uunaia e siitia, faamalosia, pe faamalosiau? O le a se auaunaga faaKeriso e mafai ona e faia mo lenei tagata? Mafaufau e fai se fuafuaga e auauna atu.

E Te Fia Aoao Atili? (Tuu i le faitalia)

O le a se mea e mafai ona ou aoao mai le Tusi a Mamona e uiga i le auauna atu e pei o le Faaola?

E mafai ona e suesue le 3 Nifae 11:9–15; 17:5–15, 19–24 e aoao atili ai e uiga i le auauna atu i isi. Pe mafai ona e matamata i le “My Joy Is Full” (4:04). Mafaufau i le ala na auauna atu ai le Faaola ia sa Nifae.

O fea e mafai ona ou aoao atili ai e uiga i le auauna atu e pei o le Faaola?

O le punaoa a le Ekalesia “This Is Ministering” ua tuuina mai ai faataitaiga ma mataupu faavae o le uiga o le auauna atu.

I le vitio “Ministering as the Savior Does” (6:08), ua faasoa mai ai e taitai ma tagata o le Ekalesia ni auala e auauna atu ai e pei o le Faaola.

Matamata le vitio “Doing Something for Someone Else Changed Me” (3:14) e aoao ai i le mea na tupu ina ua filifili se tamaitai talavou matua e auauna atu nai lo le taulai atu i lona faavauvau.

Elder Erich W. Kopischke

I le lauga “Talanoaina o le Soifua Maloloina Faalemafaufau” (Liahona, Nov. 2021, 36–38), o loo talanoa mai ai Elder Erich W. Kopischke o le Fitugafulu e uiga i le auala e auauna atu ai ia i latou o loo tauivi ma luitau o le soifua maloloina faalemafaufau.