Lesona 22 Anomea a le Faiaoga: Auai faatasi ma Iesu Keriso i le Toefuataiga Faifai Pea
“Lesona 22 Anomea a le Faiaoga: Auai faatasi ma Iesu Keriso i le Toefuataiga Faifai Pea,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 22 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 22 Anomea a le Faiaoga
Auai faatasi ma Iesu Keriso i le Toefuataiga Faifai Pea
Na molimau Peresitene Russell M. Nelson: ”O i tatou o molimau i se faagasologa o le toefuataiga. Afai e te manatu ua toefuatai mai atoatoa le Ekalesia, ua na o le amataga ua e vaaia. E tele mea o le a oo mai” (“Latter-day Saint Prophet, Wife and Apostle Share Insights of Global Ministry,” Oct. 30, 2018, newsroom.ChurchofJesusChrist.org). I lenei lesona, o le a iloa ai e tamaiti aoga mea latou te faia pe mafai ona fai e auai ai i le Toefuataiga faifai pea. O le a latou mafaufau foi i le fesoasoani e mafai ona latou maua mai le Faaola a o latou faia Lana galuega.
Fautuaga mo le Aoao Atu
E taitaiina e Iesu Keriso le galuega o le Toefuataiga faifai pea.
Po o fea lava o outou alala ai po o a foi o outou tulaga o i ai, o le Alii o Iesu Keriso o lo outou Faaola, ma o le perofeta a le Atua, o Iosefa Samita o lo outou perofeta. Sa muai faauuina o ia a o le’i faavaeina le lalolagi e avea ma perofeta o lenei tisipenisione mulimuli, le taimi o le a “leai se mea o le a taofia” mai le Au Paia. E faaauau pea ona tafe mai faaaliga mai le Alii i lenei faagasologa faifai pea o le toefuataiga.
O le a le uiga ia te oe o le toefuataiina mai o le talalelei a Iesu Keriso i le lalolagi? (“Faalogo ia te Ia,” Liahona, Me 2020, 88; ua faaopoopo le faamamafa)
Valaaulia nisi o tamaiti aoga e tali mai i le fesili a Peresitene Nelson ma faasoa mai po o le a le uiga o le Toefuataiga ia i latou. Ona mafai ai lea ona e fesili atu:
O le a le uiga ia te oe o le Toefuataiga o se faagasologa faifai pea?
Faaleleia o Lo Tatou Aoao Atu ma le Aoaoina
Fai atu fesili tulitatao e musuia ai le aoaoina loloto. Pe a tali mai tamaiti aoga i fesili, faasoa mai ni lagona, pe ofo atu ni malamalamaaga, faalogo toto’a i mea latou te fai atu ai ma pe faapefea ona latou fai atua. Ia iloatino pe mafai ona fesoasoani se fesili tulitatao i tamaiti aoga e mafaufau loloto atili ai, utuvai mai o latou aafiaga faaletagata lava ia, pe vailiili lagona o o latou loto. O fesili tulitatao e tatau ona avea ma fesili masani, ae lē faamalosia. E tatau ona faatupu manatu, ae lē o le malosi tele.
Valaaulia tamaiti aoga e faasoa mai ni faataitaiga o le Toefuataiga faifai pea. (Atonu e fesoasoani le toe faamanatu o le saunoaga a Elder LeGrand R. Curtis Jr. i le vaega 1 o anomea mo sauniuniga ma faasoa mai se faataitaiga se tasi pe lua ua e faailoaina.) A o faasoa mai tamaiti aoga, e mafai ona e taofi ma fai atu fesili tulitatao, e pei o fesili nei:
Na faapefea ona fesoasoani le [faataitaiga a le tamaitiiti aoga] ia te oe po o se tasi e te iloa e latalata atili atu ai ia Iesu Keriso?
O le a sou manatu e mafai faapefea ona fesoasoani le [faataitaiga a le tamaitiiti aoga] e saunia ai i tatou mo le Afio Mai Faalua?
Na faapefea e le [faataitaiga a le tamaititi aoga] ona faamalosia lau molimau o le galuega lenei a le Alii?
Ina ia fesoasoani i tamaiti aoga ia talisapaia atoatoa le tāua o le faapotopotoina o Isaraelu i le Toefuataiga faifai pea, mafaufau e faaali atu le saunoaga lenei a Peresitene Nelson: “[O le] faapotopotoina [o Isaraelu] o le mea aupito sili lea ona taua o loo tupu i le lalolagi i aso nei” (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Liahona, 8, ChurchofJesusChrist.org).
Valaaulia tamaiti aoga e faaaoga ni nai minute e toe faamanatu ai le vaega 2 o anomea mo sauniuniga ma vaavaai mo mafuaaga e tāua tele ai le faapotopotoina o Isaraelu. Ona mafai lea ona e tuu atu ia i latou e faatino faatasi ma se paga po o se vasega pe faapefea ona latou tali atu i se tasi pe sili atu foi o tulaga faataitai nei:
Faamalamalama atu i se vasega seminare i le aoga maualuga le tāua o le faapotopotoina o Isaraelu.
Faasoa atu i se tasi e lē auai i lo tatou faatuatuaga le auala e mafai ai e le faapotopotoina o Isaraelu ona faamanuiaina tagata uma.
Faamatala auala e mafai ona tatou fesoasoani ai i le Alii i le faapotopotoina o Isaraelu i se tagata o le Ekalesia e lagona e lē o mautinoa pe mafai faapefea ona latou fesoasoani.
A maea tala faatino e mafai ona e valaaulia se tamaititi aoga e faitau leotele le saunoaga a Peresitene Dieter F. Uchtdorf i le vaega 1 o anomea mo sauniuniga. E mafai ona e tuuina atu se taimi mo tamaiti aoga e tusifaamaumau ai o latou manatu e uiga i fesili nei:
E faapefea ona e faamatalaina au taumafaiga e faalautele le galuega a le Alii i le Toefuataiga faifai pea?
O le a se saofaga e mafai ona e faia i le taimi nei e faalautele ai Lana galuega? (Mafaufau e toe faamanatu le saunoaga a Peresitene Bonnie H. Cordon i le vaega 2 o anomea mo sauniuniga.)
E galue faatasi le Faaola ma i tatou a o tatou faia Lana galuega.
Mafaufau e faasoa atu le tulaga faataitai lenei:
Ua maua e Maria se valaauga fou i lana uarota ma ua lagona le lofituina. A o ia tuua le ofisa o le epikopo, sa ia fai ifo ia te ia lava: “E mafai faapefea ea ona ou faia lenei valaauga? E lē lava lo’u lelei. O loo i ai isi e sili atu ona agavaa. Atonu e tatau ona ou talosaga atu i le epikopo e su’e se isi tagata.”
O le a se fautuaga e te avatua ia Maria?
Valaaulia tamaiti aoga e toe faamanatu le Iakopo 5:70–72, Mataupu Faavae ma Feagaiga 38:7, ma le Mataupu Faavae ma Feagaiga 49:27 ma saili mo se mataupu faavae e mafai ona fesoasoani ia Maria. Atonu e faailoa mai e tamaiti aoga se mataupu faavae e pei o lenei: A o tatou faia le galuega a le Alii, o loo i ai o Ia i lo tatou lotolotoi ma galue faatasi ma i tatou.
E mafai faapefea e le malamalama faapea o loo galue le Faaola faatasi ma i tatou ona fesoasoani ia Maria? E mafai faapefea e lenei malamalama ona fesoasoani ia te oe?
Aisea e tāua ai le iloa sa faatasi le Tama i le Faaola i le taimi o Lana galuega i le olaga nei? (E mafai ona e toe faamanatuina le saunoaga a Elder Kim B. Clark i le vaega 3 o anomea mo sauniuniga e fesoasoani ai i tamaiti aoga e tali lenei fesili.)
O anafea na e lagonaina ai se faamautinoaga sa faatasi le Tama Faalelagi ma Iesu Keriso ma oe a o e faia le La galuega?
E mafai e tamaiti aoga ona tomanatu i le naunau o le Faaola e galulue faatasi ma i latou a o latou faia Lana galuega. A o latou tomanatu, e mafai ona e faaali atu le lisi ua faailogaina lenei ma valaaulia tamaiti aoga e faitau le fuaiupu ua filifilia mo viiga taitasi. Fautuaina le vasega e tusifaamaumau o latou manatu ma lagona e uiga i mea sa latou faitauina.
Ina ia faaiu le vasega, e mafai ona e fai atu i se tasi pe toalua foi o tamaiti aoga e faasoa mai o latou aafiaga e faatatau i le upumoni lenei: A o tatou faia le galuega a le Alii, o loo i ai o Ia i lo tatou lotolotoi ma galue faatasi ma i tatou.
Mo Le Isi Taimi
Mafaufau e uunaia tamaiti aoga i ni nai aso a o lei amataina le vasega e sosoo ai e suesue anomea mo sauniuniga mo le lesona 23. E mafai ona e auina atu le savali lenei: Matamata “Saunia mo le Afio Mai Faalua” (1:00), ma mafaufau pe mafai faapefea e anomea i le lesona 23 ona fesoasoani ia te oe e saunia ai mo le toe afio mai o Iesu Keriso.
