alii talavou o loo papatiso

Lesona 5 Anomea mo le Sauniuniga o le Vasega

Avea ma Tagata o le Feagaiga a le Alii

E manaomia se tulaga maualuga o le faatuatuaina ma le alofa e fusia ai oe lava i se tasi i se sootaga faalefeagaiga. Ma e atiina ae lena faatuatuaina pe a iloa e le tasi le isi. I le tulaga o le osia o feagaiga ma le Atua lea e fusia ai oe ia te Ia, ua Ia silafia lelei oe ma naunau e tuuina atu ia te oe mea uma o loo ia te Ia—mea uma e uiga ia te Ia. Ua Ia valaaulia oe e talitonu ia te Ia ma ulu atu i Lana ala o feagaiga. O le a matua faamanuiaina oe pe afai e te faia, ona, “O Lana ala o le ala lea e tau atu i le fiafia i lenei olaga ma le ola e faavavau i le lalolagi a sau” (“O Le Keriso Soifua: O Le Molimau a le Au Aposetolo5,” ChurchofJesusChrist.org).

Vaega 1

O ai Ieova, ma aisea e mafai ai ona ou faatuatuaina o Ia?

“O Le Keriso Soifua” o loo aoao mai ai “[O Iesu Keriso] o le Ieova Silisili o le Feagaiga Tuai.” O fea na sau ai le suafa o Ieova , ma o le a se mea e mafai ona aoao ai oe e uiga i le Faaola?

Ina ua mavae le nofopologa o le fanauga a Isaraelu i Aikupito mo le tele o tausaga, sa valaauina e le Alii ia Mose e “aumai [i latou] mai Aikupito” (Esoto 3:10; tagai foi i fuaiupu 1–9). Sa lagona e Mose le le agavaa e faataunuu ai lenei galuega. Sa ia ole atu i le Alii i Lona suafa ina ia mafai ona ia ta‘u atu ia Isaraelu le na auina atu o ia (tagai Esoto 3:11–13).

aikona, suesue

Suesue e Sauniuni ai mo le Vasega

Faitau le Esoto 3:13–14, ma mafaufau e faailoga le igoa na faaali atu e le Alii ia Mose.

Ua Vaai Mose ia Ieova, saunia e Joseph Brickey

O le igoa o O A‘u o lona uiga “O Loo Soifua o Ia” po o le “O loo i ai o Ia” ma e fesootai tonu lava i le igoa Eperu o Yahweh, po o Ieova. OIeova ua tau mai ai le “Le Masuia” (Bible Dictionary, “Jehovah”). O le migao sa latou lagonaina mo le suafa o Ieova o le mafuaaga lea na matua saua ai tagata Iutaia o loo taʻua i le tala a Iutaia i le Feagaiga Fou ina ua ta’u atu e Iesu Keriso ia i latou, “sa a’u i ai, a o lei leai se Aperaamo” (Ioane 8:58). O le faaaogaina e Keriso o le faaupuga “O A‘u” e tutusa lava ma le Esoto 3:14 ina ua Ia fetalai, “O A’u o lē ola.”

Ua lu‘iina Iesu

Na aoao mai e Elder Bruce R. McConkie o le Korama a Aposetolo e Toasefululua, le folafolaga a le Faaola:

Elder Bruce R. McConkie

O se faamautinoaga sili lenei ona manino ma tuusao o le faale-Atua ua faia e soo se tagata pe mafaia foi ona faia. “Sa a’u i ai, a o lei leai se Aperaamo.” O lea, “O au le Atua e ou le malosi uma lava, le O AʼU Silisili. O au o le ola, le Faavavau e Toatasi. O au o le Atua o o outou tama. O lo‘u igoa o: O A’U O LĒ OLA.” (Doctrinal New Testament Commentary [1965], 1:464)

aikona, mafaufau loloto

Mafaufau Loloto e Sauniuni ai mo le Vasega

E mafai faapefea e le iloaina o Iesu Keriso o le Ieova Silisili—o le Atua o le Feagaiga Tuai, o Le o loo soifua ma e le masuia—ona aafia ai lou faatuatuaina o Ia? O a ni mea ua aoao mai e nei faalaniga ia te oe e uiga i Lona tomai e faia ma tausia folafolaga faatasi ma oe?

Vaega 2

O a ni auala e mafai ai ona faamanuiaina lo‘u olaga e ala i le osia ma le tausia o feagaiga ma Ieova?

E ui lava o le Alii, o Ieova, e malosi ma e le masuia, ae ua valaaulia e Ia ma Lona Tama i tatou taitoatasi i se sootaga faale-feagaiga ma i Laua. O lenei sootaga faale-feagaiga e aofia ai faamanuiaga faamoemoeina e le mafai ona maua i soo se isi lava auala.

E te ono manatua, o le feagaiga “o se maliliega paia lea i le va o le Atua ma se tagata po o se faapotopotoga o tagata. Ua faatulaga e le Atua ni tuutuuga fitoitonu, ma ua Ia folafola mai e faamanuia i tatou pe a tatou usitai i nei tuutuuga. A tatou filifili e le tausia ia feagaiga, e le mafai ona tatou maua faamanuiaga, ma i nisi taimi tatou te mafatia ai i se faasalaga o se taunuuga o lo tatou le usiusitai” (Autu o le Talalelei, “Feagaiga,” topics.ChurchofJesusChrist.org).

O Aperaamo o se faataitaiga sili o se tasi na osia ma tausia feagaiga ma le Alii. E ui i le ifo i tupua ma faataitaiga le lelei o le toatele o tagata na siomia o ia, sa manao Aperaamo ia avea “o se soo sili atu o le amiotonu” (Aperaamo 1:2). Sa tauia manaoga o Aperaamo ina ua ulu atu Ieova i se feagaiga ma ia.

aikona, suesue

Suesue e Sauniuni ai mo le Vasega

O le mea e masani ona ta‘ua o le “feagaiga faa-Aperaamo” e aofia ai folafolaga ua ofoina mai e le Atua ia i tatou uma. Suesue le Aperaamo 2:8–11 ina ia faamasani atili ai i se vaega o le feagaiga faa-Aperaamo, ma vaai faalemafaufau i le fetalai mai o le Alii i nei folafolaga ia te oe faapea foi ia Aperaamo. E mafai ona e faailogaina faamanuiaga e te maua.

Ua Faaali Atu le Alii ia Aperaamo, saunia e Keith Larson

O le feagaiga faa-Aperaamo e aofia ai faamanuiaga uma e faavavau e maua mai le talalelei a le Alii, sauniga o le perisitua, ma le faaipoipoga faaselesitila. O lenei ala e amata i se feagaiga na osia i le papatisoga ma faaauau atu ai i talaatu o le malumalu pe a tatou usiusitai i feagaiga ua tatou osia.

Na saunoa Russell M. Nelson e uiga i le feagaiga faa-Aperaamo:

Peresitene Russell M. Nelson

O faamanuiaga tupito o le feagaiga faa-Aperaamo e faaee i totonu o malumalu paia. … O le faataunuuina o le feagaiga anamua faa-Aperaamo e mafai ona o le Alii o Iesu Keriso. O Ia ua mafai ai ona tatou mau faatasi ma le Atua, ma Ia, ma o tatou aiga e faavavau. (I le “O Molimau Faapitoa o Keriso”,” Liahona, Apr. 2001, 7)

ulugalii o loo vaavaai atu i le malumalu

Faitau le saunoaga lenei a Elder D. Todd Christofferson o le Korama a Aposetolo e Toasefululua, ma mafaufau e faailoga ia faamanuiaga e oo mai i le savalia lea o le ala o feagaiga a le Faaola:

Elder D. Todd Christofferson

O le a le ala o le feagaiga? O le ala lea e tasi e taitai atu i le malo selesitila o le Atua. … I le aluga o le ala o feagaiga (lea e oo i talaatu o le olaga nei), tatou te maua ai sauniga ma feagaiga e faatatau i le faaolataga ma le faaeaga.

O lo tatou tuuto atoa i feagaiga o le faia lea o le finagalo o le Atua “ma usiusitai i ana poloaiga i mea uma e poloaiina ai i tatou” [Mosaea 5:5]. …

… O feagaiga ua ofo mai e le Atua i Ana fanau, e tele atu mea e faia ai nai lo le na ona taiala ai o i tatou. E fusia ai i tatou ia te Ia, ma, fusia ai ia te Ia, e mafai ai ona tatou manumalo i mea uma. …

… Ua saunia e le Atua se meaalofa e toetoe ina a le malamalama ai, e fesoasoani i e osia feagaiga ia avea ma ni e e tausia feagaiga: o le meaalofa o le Agaga Paia. O lenei meaalofa o le aia tatau lea i le mafutaga faifaipea, puipuiga, ma le taitaiga a le Agaga Paia. …

I luga o le ala o feagaiga tatou te maua ai foi ia faamanuiaga e tatau ai o le faamagaloga ma le faamamaina mai agasala. …

O i latou e tulimatai atu i le ala o feagaiga e mauaina faamanuiaga e sili ona faapitoa i faapotopotoga paia eseese e atofaina. … O se faapotopotoina totino o ituaiga ua loa ona faataapeapeina o Isaraelu … ua amataina nei i le faapotopotoina o tagata o le feagaiga i totonu o le Ekalesia. … O loo i ai foi se faapotopotoina i vaiaso taitasi o tagata o le feagaiga e … aai ai ma feinu i le areto o le faamanatuga ma le loto e manatua ai le Togiola a Iesu Keriso. …

E faapotopoto foi tagata o le feagaiga i le malumalu, le maota o le Alii, ia maua ai sauniga, faamanuiaga, ma faaaliga e faapitoa ona maua ai iina. …

O le mea mulimuli, e na o le tulimata’ia lava o le ala o feagaiga tatou te maua ai faamanuiaga o Aperaamo, Isaako, ma Iakopo, o faamanuiaga tupito o le faaolataga ma le faaeaga lea e na o le Atua e mafai ona aumaia. (“Aisea i le Ala o Feagaiga,” Liahona, Me 2021, 116, 118)

aikona, faatino

Faatino

Na saunoa Peresitene Nelson, “O le faamalo silisili e mafai ona ausia iinei i lenei olaga, o le ia ta’ua o se tagata tausi feagaiga” (“Feagaiga,” Liahona, Nov. 2011, 88). Faailoa mai se faatinoga se tasi o le a e amataina i lenei vaiaso e taitai ai oe lava i luma i luga o le ala o feagaiga. Mafaufau loloto pe mafai faapefea e Iesu Keriso—Ieova, le Tasi e Le Masuia—ona fesoasoani ia te oe ia ausia au sini. Ona mafaufau lea pe faapefea ona e fesoasoani i isi i o latou ala.

E Te Fia Aoao Atili? (Tuu i le faitalia)

O fea e mafai ona ou aoao atili ai e uiga i faamanuiaga folafolaina i tagata o le feagaiga i Isaraelu?

Sue le “Isaraelu, Faamanuiaga o” i le Taiala i Tusitusiga Paia, faitau nisi o fuaitau, ma fai se lisi o faamanuiaga ua ofoina mai e le Alii i Lona nuu o le feagaiga.

O le a se mea e mafai ona ou faia e faaleleia atili ai lo‘u tomai e avea ai ma se tausi feagaiga?

Elder Dale G. Renlund

Ua faamatala mai e Elder Dale G. Renlund o le Korama a Aposetolo e Toasefululua le tala i ni tagata se toatolu mai Zaire, o e na faia ni osigataulaga maoae e tausia ai a latou feagaiga i le “Tautinoga Mausali ia Iesu Keriso” (Liahona, Nov. 2019, 24–25; pe matamata mai le taimi 7:10 i le 11:57).

Peresitene Linda K. Burton

I le lauga “O Le Mana, Olioli, ma le Alofa e Maua i le Tausiga o Feagaiga” (Liahona, Nov. 2013, 111–14), na faasoa mai ai e Peresitene Linda K. Burton, sa avea muamua ma Peresitene Aoao o le Aualofa, le olioli o le tausia o feagaiga.

O fea e mafai ona ou aoao atili ai e uiga i feagaiga i le malumalu?

O le tusiga “E Uiga i le Faaeega Paia o le Malumalu” (temples.ChurchofJesusChrist.org) ua faailoa mai ai feagaiga na ulu atu i ai i le taimi o le sauniga o le faaeega paia o le malumalu. E mafai foi ona e matamata i le “O Le A le Faaeega Paia o le Malumalu?” (1:58).

“E uiga i se Faamauga i le Malumalu” (temples.ChurchofJesusChrist.org) o loo talanoaina ai feagaiga tatou te osia ma faamanuiaga folafolaina e mafai ona tatou maua i se faaipoipoga i le malumalu. E mafai foi ona e matamata i le “E Faape’i le Faaipoipoga i le Malumalu?” (1:22).