O Iesu o loo Faatuina Mai le Afafine o Iairo, saunia e Dan Burr

Lesona 14 Anomea mo le Sauniuniga o le Vasega

Iloaina o Vavega a le Faaola

Pe a tatou talanoa e uiga i vavega a Iesu Keriso, e matele ina tatou taulai atu i tala musuia tatou te maua i le Feagaiga Fou. E ui e tele mea tatou te mafaia ma e tatau ona aoao mai i nei tala faatusi paia, ua e mafaufau ea i vavega e faia e le Alii i o tatou aso—ma i lou olaga? A o e suesue, saili e faaloloto lou faatuatua i le mana o le Alii ma le naunautai e faia vavega mo oe ma isi.

Vaega 1

O a ni mea e mafai ona ou aoao e uiga i le Faaola mai Ana vavega?

I le taimi o Lana galuega i le olaga nei, o Iesu Keriso “na femaliuai i auala o Palesitina, e faamalolo i e mama’i, faapupula i e tauaso, ma faatutu mai e na oti.” (“O Le Keriso Soifua: O Le Molimau a le Au Aposetolo,” ChurchofJesusChrist.org). O nei vavega o ni “mea ofoofogia na tutupu ona o le mana o le Atua” ma “o se vaega o le talalelei a Iesu Keriso” (Taiala i Tusitusiga Paia, “Vavega,“ scriptures.ChurchofJesusChrist.org). O se tasi o faamaoniga i tagata Iutaia o Iesu o le Mesia folafolaina (tagai Mataio 11:4–5; Ioane 20:30–31).

Na matauina e Elder Ronald A. Rasband o le Korama a Aposetolo e Toasefululua, “O le [Iesu Keriso] Togiola, na taualuga i Lona Toetu i le mavae ai o aso e tolu i se tuugamau nono, o loo tulai o le vavega aupito silisili i le talafaasolopito o le tagata” (“Faauta! O Au o se Atua o Vavega,” Liahona, Me 2021, 109).

Keriso toetu

Sa faamalamalama mai foi e Elder Rasband e faapea, e ui ina molimau mai vavega a Iesu i Lona paia, ae latou te “faamanatu mai ai Lona mana, Lona alofa mo i tatou, Lona aapa mai le lagi i o tatou aafiaga i le olaga nei, ma Lona finagalo e aoao atu mea e sili ona taua” (“Faauta! O Au o se Atua o Vavega,” 111).

Mafaufau po o le a se mea e mafai ona tatou aoao e uiga i le Faaola mai Lona faamaloloina o se tagata supa. Na fataina atu lenei tagata e isi tagata e toafa i le fale sa aoao ai Iesu. Ina ua latou iloa ua tumu le fale sa le mafai ona latou ulu atu i ai, sa latou tatala le ufi o le fale ma tuutuu ifo i lalo le tagata supa i le Faaola (tagai Mareko 2:1–4).

Ua faamaloloina e Iesu se alii

aikona, suesue

Suesue e Sauniuni ai mo le Vasega

Faitau le Mareko 2:5–12, ma mafaufau po o a mea ua e aoaoina e uiga i le Faaola ma Lona mana faamalolo mai lenei aafiaga.

Matau o le vavega a le Faaola na taulimaina ai manaoga faaletino ma faaleagaga. E tusa ai ma le tomai o le Faaola e faamalolo ai le tino ma le agaga, na aoao mai ai Peresitene Dallin H. Oaks o le Au Peresitene Sili:

Peresitene Dallin H. Oaks

O le vavega silisili e le o mea e pei o le toe faapupulaina o e tauaso, faamaloloina o se ma’i, po o le faatuina mai o e ua oti. …

… O se vavega e sili atu o se suiga tele lea o le loto e se atalii po o se afafine o le Atua (tagai Mosaea 5:2). O se suiga o le loto, e aofia ai uiga faaalia fou, mea e faamuamua, ma manaoga, e sili atu ona taua nai lo soo se vavega e aofia ai le tino. (“Vavega,” Ensign, Iun 2001, 17)

faatusa o se suiga o le loto

aikona, tusi faamaumau

Tusi Faamaumau Ou Manatu

Faitau pe matamata i se tasi pe sili atu o vavega nei na faia e le Faaola i le taimi o Lana galuega i le olaga nei, pe filifili se tasi o a oe lava vavega e faitau pe matamata ai. A o e suesue, mafaufau loloto ma tusi faamaumau ou manatu e tali atu ai i fesili nei:

1. O a ni mea e mafai ona e aoao e uiga i le Faaola mai lenei vavega?

2. O le a le uiga e mafai ona e maua mai lenei vavega mo lou olaga?

Vavega a Iesu Keriso

• Faitau le Ioane 2:1–11 pe matamata “Jesus Turns Water into Wine” (2:26).

• Faitau le Mareko 4:35–41 pe matamata i le “Calming the Tempest” (2:17).

• Faitau le Luka 7:11–16 pe matamata i le “The Widow of Nain” (2:22).

• Faitau le Mataio 14:13–21 pe matamata i le “The Feeding of the 5,000” (2:52).

• Faitau le Ioane 9:1–7 pe matamata i le “Jesus Heals a Man Born Blind” (7:47).

Vaega 2

E faapefea e lo’u faatuatua ma le finagalo o le Alii ona tosina ai vavega?

I popofou o le galuega a le Faaola i le olaga nei, sa alu atu ai se tagata na mafatia i le lepela ia Iesu ina ia faamaloloina. E pei ona faaaogaina i le Tusi Paia, e mafai ona faasino le lepela i se vaega tele o faama’i o le pa’u lea e mafai ona aafia ai le pa’u, neura, mata, ma ponaivi. A aunoa ma togafitiga faafomai, e mafai ona taitai atu ai i le faaleagaina o neura, tauaso, le atoatoa, ma se oti tiga. I le taimi o le Faaola, o le tagata na alu atu i le Faaola semanu e manatu i ai “ua leaga” ma semanu e vavaeese mai lona aiga ma le nuu (tagai Levitiko 13:45–46).

[Ia E Mamā], saunia e Kyle Vincent

aikona, suesue

Suesue e Sauniuni ai mo le Vasega

Faitau le Mareko 1:40–42, ma vaavaai pe na faapefea ona faaalia e lenei tagata le faatuatua i le Alii ao sailia se vavega.

Sa mataituina e Jorge F. Zeballos o le Fitugafulu:

Elder Jorge F. Zeballos

Sa le’i tuu faapoloaiina e le lepela se mea, e ui atonu o lona manao na amiotonu; sa na ona ia naunau e talia le finagalo o le Alii. (“Afai O Le A E Tali Atu,” Liahona, Me 2015, 125)

Pe a tatou mananao moni e talia le finagalo o le Alii, e manaomia foi ona tatou maua le faatuatua ina ia le faamaloloina ai. Na aoao mai Elder David A. Bednar o le Korama a Aposetolo e Toasefululua e faapea:

Elder David A. Bednar

O le amiotonu ma le faatuatua e mautinoa lava e aoga i le faamaloloina o e mamai, tutuli, pe pipili—pe afai o faamalologa faapena e ausia ai faamoemoega o le Atua ma ua tusa ai ma Lona finagalo. O lea, e tusa lava pe i ai so tatou faatuatua malosi … e le o tagata mama’i uma ma vaivai o le a faamaloloina. Afai e faaititia mea faafeagai uma, afai e aveesea uma ia ma’i, o lona uiga o le a faaletonu faamoemoega autu o le fuafuaga a le Tama. (David A. Bednar, “Taliaina o le Finagalo ma le Taimi a le Alii,” Liahona,, Aok. 2016, 34)

A o e tomanatu i vavega atonu e te manao i ai mo lou olaga, mafaufau i le fautuaga lenei mai ia Elder Ronald A. Rasband o le Korama a Aposetolo e Toasefululua:

Elder Ronald A. Rasband

E mafai ona oo mai vavega o ni tali i tatalo. E le o ni mea ia tatou te ole atu ai pea po o mea foi tatou te faamoemoeina, ae pe a tatou faalagolago i le Alii, o le i ai o Ia iina, ma o le a sa’o lava o Ia. O le a Ia fetuunaia le vavega ma le taimi tatou te manaomiaina ai. …

… E i ai taimi tatou te faamoemoe ai mo se vavega e faamalolo se e pele, e toe mimilo se taga e le amiotonu, pe faamalulu le loto o se agaga ua italili pe faaseseina. O le tilotilo atu i mea e ala i mata faaleolaga nei, tatou te mananao ai i le Alii ia faasalaveia, e toe fau le mea ua nuti. E ala i le faatuatua, o le a oo mai le vavega, e ui atonu e le o la tatou taimi faatulagaina po o le faaiuga sa tatou mananao ai. Pe o le uiga o lena mea ua itiiti lo tatou faatuatua pe ua tatou le agavaa mo Lana faasalavei? Leai. O pele i tatou a le Alii. (“Faauta! O Au o se Atua o Vavega,” Liahona, Me 2021, 111)

o se fafine o loo tatalo faatasi ma isi

aikona, mafaufau loloto

Mafaufau Loloto e Sauniuni ai mo le Vasega

E faapefea ona ou atiina ae le faatuatua e faalagolago ai i le finagalo ma le taimi a le Alii pe a sailia se vavega?

Vaega 3

E faapefea ona ou iloa atili vavega a le Alii i lo’u olaga?

Na matauina e Peresitene Oaks, “E tele vavega e tutupu i aso uma i le galuega a la tatou Ekalesia ma i olaga o o tatou tagata” (“Miracles,” Ensign, June 2001, 17). O nisi taimi e mafai ona tatou vaai i vavega i olaga o isi ae atonu e le vaaia i o tatou lava olaga.

Na faapena foi ona aoao mai Elder Rasband:

Elder Ronald A. Rasband

E toatele outou ua molimauina vavega, e sili atu nai lo mea ua outou silafia. Atonu e foliga mai e laiti pe a faatusatusa ia Iesu o faatutuina e ua oti. Ae o le telē e le tulagaese ai se vavega, vagana na oo mai le Atua. (“Faauta! O Au o se Atua o Vavega,” Liahona, Me 2021, 110)

aikona, tusi faamaumau

Tusi Faamaumau Ou Manatu

Faaalu ni nai minute e tusi faamaumau ai vavega ua e molimauina pe o loo e aafia ai nei. Mafaufau e amata i le tatalo ma ole atu i le Alii mo ni mata e vaai i nei vavega na tutupu.

E Te Fia Aoao Atili? (Tuu i le faitalia)

O a nisi nai faataitaiga o vavega a le Faaola?

• Faamaloloina o le auauna a le alii o le toaselau (suesue le Luka 7:1–10)

• O le tulieseina o temoni na ulutinoina ai le lafu puaa (suesue le Mareko 5:1–19)

• Faatuina o Lasalo mai le oti (suesue le Ioane 11:1–44 pe matamata le vitio “Lazarus Is Raised from the Dead” [7:51])

• Faamaloloina o le taliga o le auauna a le faitaulaga sili (suesue le Luka 22:47–51)

E faapefea ona ou atiina ae le faatuatua e faalagolago ai i le finagalo o le Alii pe a sailia se vavega?

I le saunoaga a Peresitene Oaks “Faamaloloina o e Mama’i” (Liahona, Me 2010, 47–50) ma le saunoaga a Elder Bednar “Taliaina o le Finagalo ma le Taimi a le Alii” (Liahona, Aok. 2016, 29–35), e mafai ona e aoao mai faataitaiga a isi a o e faitau i tala o tagata o e sa faatinoina le faatuatua pe a sailia vavega.

O fea e mafai ona ou aoao atili ai e uiga i vavega e tutupu i o tatou aso?

Elder Donald L. Hallstrom

Na faasoa mai e Elder Donald L. Hallstrom o le Fitugafulu se tala o se faamalologa faavavega i le “Pe Ua Uma Ea le Aso o Vavega?” (Liahona,, Nov. 2017, 88–90).

Sister Sydney S. Reynolds

I le lauga “O Se Atua o Vavega” (Liahona, Me 2001, 12–13), na faasoa mai ai e Sister Sydney S. Reynolds, o le sa avea muamua ma fesoasoani i le Au Peresitene Aoao o le Peraimeri, ni faataitaiga o vavega “laiti” i o tatou olaga.

I le vitio “A Wartime Miracle” (3:21), na faasoa mai ai e Peresitene Thomas S. Monson le ala na faatino ai se vavega e ala i le mana o le perisitua.