Lesona 26 Anomea a le Faiaoga

Avea Atili e Pei o Iesu Keriso

Ua fetalai mai Iesu Keriso ia i tatou, i le avea ai ma Ona soo, ia avea faapei o Ia (tagai i le 3 Nifae 27:27). I lenei lesona, o le a mafaufau ai tagata aoga pe faapefea ona avea atili i latou e faapei o le Faaola e ala i le atiina a’e atili o uiga faa-Keriso. O le a latou maua foi le avanoa e filifili ai se uiga patino faa-Keriso ma fuafua po o le a se mea e mafai ona latou faia e atiina a’e atoatoa ai. 

Fautuaga mo le Aoao Atu

Ua faatonuina e Iesu Keriso Ona soo ia avea faapei o Ia.

Ina ia amata le vasega, faaali pe valaaulia se tagata aoga e faitau leotele le saunoaga a Peresitene Dallin H. Oaks i le vaega 1 o anomea mo sauniuniga. Ona fesili atu lea:

• O le a le eseesega i le va o le iloaina o se mea, faia o se mea, ma le avea ma se tasi?

Aotele le tulaga o le 3 Nifae 27, ona faitau faatasi lea o le 3 Nifae 27:27 . Pe e mafai foi ona e maimoa i le kilipi talafeagai mai Vitiō o le Tusi a Mamona (ChurchofJesusChrist.org). Mafaufau e faaali atu le upumoni lenei: Ua talosagaina e Iesu Keriso Ona soo ia avea e pei o Ia.

E mafai ona e faaali atu ni ata e faaalia ai uiga o Keriso. Ona valaaulia lea o tagata aoga e filifili se tasi pe lua o fuaitau nei e faitau i ai, ma vaavaai mo uiga faa-Keriso:

• Mataio 5:3-11

• 2 Peteru 1:4–7

• Alema 13:28

• Mataupu Faavae ma Feagaiga 4:5-7

• O a nisi o uiga o Iesu Keriso e te manao e atiina ae atili? (Mafaufau e lisi i luga o le laupapa uiga e faailoa mai e tagata aoga.)

• Na faapefea ona faamanuiaina oe pe na faapefea ona faamanuiaina se tasi e te iloa e ala i le taumafai ia avea atili e faapei o le Faaola? (E mafai ona e toe iloilo le saunoaga a Peresitene Ezra Taft Benson i le vaega 1 o anomea mo sauniuniga.)

Mafaufau e faasoa atu se mea e pei o le tulaga faataitai lenei:

Ina ua vaai atu i se lisi o uiga faa-Keriso, sa lagona e Eliza le lofituina. Sa mafaufau o ia pe faapefea ona ia faaaogaina na uiga uma i lona olaga. Sa foliga mai o se mea faigata.

• Pe na e lagona ea e pei o Eliza? O le a se fautuaga o le a e tuuina atu ia te ia?

• O a isi luitau e mafai ona tatou feagai pe a saili e atiina a’e uiga faa-Keriso?

• O a mataupu faavae o le talalelei e mafai ona fesoasoani ia i tatou e lagona atili ai le faamoemoe a o tatou taumafai e atiina a’e uiga faa-Keriso? (Afai e manaomia, e mafai e tagata aoga ona mafaufau i le saunoaga a Peresitene Dieter F. Uchtdorf i le vaega 2 o anomea mo sauniuniga po o mau e pei o nei: Mosaea 4:27; Eteru 12:27; po o le Mataupu Faavae ma Feagaiga 78:17–18; 93:13.)

Faaleleia o Lo Tatou Aoao Atu ma le Aoaoina Mai

Faaaoga tala. O tala e mafai ona fatuina ai le fiafia, malamalama loloto, ma faapupula ai le faaaogaina. Faatasi ai ma tala i tusitusiga paia, o tala faatupu faatuatua mai taitai o le Ekalesia e mafai ona faaalia ai le auala e faaaoga ai mataupu faavae i se matalalaga faaonapo nei. E mafai foi e faiaoga ma tagata aoga ona faasoa mai ni tala musuia mai o latou olaga.

Ina ia faapupula le manatu o le avea e faapei o le Alii i sina mea itiiti i lea taimi ma lea taimi, e mafai ona e faaali atu se ata o le Mauga o Fuji ma faitau le aafiaga lenei a Elder Scott D. ma Sister Whiting. (Pe e mafai foi ona e maimoa pe faalogologo ia Elder Whiting o faasoa mai lenei aafiaga i le konafesi aoao [mai le taimi 2:35 i le 3:09].)

Mauga Fuji

Elder Scott D. Whiting

O ni nai tausaga ua mavae, sa ma tutū ai ma lo’u toalua i le amataga o se alasopo o le mauga aupito maualuga o Iapani, o Mauga Fuji. A o amata ona ma a’ea’e atu i luga, sa ma tilotilo atu i le mamao o le tumutumu ma tomanatu pe mafai ona ma oo i ai.

A o ma agai pea i luga, sa oo mai lagona o le vaivai, tiga o musele, ma aafiaga o le maualuga. I le mafaufau, na amata ona tāua mo i ma’ua le tau na ona taulai atu i le la’a e sosoo ai. Sa ma faapea, “Atonu e lē vave ona ou oo i le tumutumu, ae e mafai ona ou faia le isi la’a i le taimi nei lava.” I le āluga o le taimi sa i’u lava ina mafai ona ausia le galuega taufaamata’u—i lea la’a ma lea la’a. (Scott D. Whiting, “Avea Faapei o Ia,” Liahona, Nov. 2020, 12)

• E faapefea e le aafiaga o le au Whitings ona fesootai i le avea atili e faapei o Iesu Keriso?

A uma ona faasoa mai manatu o tagata aoga, faaali atu le saunoaga lenei a Elder Whiting:

Elder Scott D. Whiting

O le avea e faapei o Iesu Keriso, o le a manaomia ai le suia o ō tatou loto ma mafaufau, o le mea moni, o tatou lava uiga faaletagata, ma o le faia o lena mea e na o le alofa tunoa lavea’i o Iesu Keriso e mafai ai. …

Ina ia mafai ona vaaia le alualu i luma moni, o le a manaomia ona e tuuina i se taumafaiga tumau. E faapei lava o le a’ea o se mauga e manaomia ai foi tapenaga a o le’i faia, ma le onosai ma le faapalepale i le taimi e a’ea’e ai, e faapena foi i lenei faigamalaga e manaomia ai foi taumafaiga moni ma le ositaulaga. O le Faa-Kerisiano moni, lea tatou te tauivi ia avea ai faapei o lo tatou Matai, e manaomia ai lava e lē aunoa a tatou taumafaiga aupito sili. (Scott D. Whiting, “Avea Faapei o Ia,” Liahona, Nov. 2020, 13, 14)

Valaaulia tagata aoga e vaai i le gaoioiga o le “Tusifaamaumau Ou Manatu” i le vaega 3 o anomea mo sauniuniga. Ona filifili lea po o fea o gaoioiga nei e sili ona fetaui ma manaoga o au tagata aoga:

1. Valaaulia tagata aoga e faaalu se taimi e faauma ai le “Gaoioiga o Uiga” o loo maua i le Tala’i La’u Talalelei po o le mafaufau loloto i mea na latou aoaoina pe mafai foi ona aoao mai le aafiaga.

2. Tuu atu i tagata aoga se taimi e filifili ai ma faitau (pe amata ona faitau) se tasi o lauga i le vaega o le “E Te Fia Aoao Atili?” o le anomea mo sauniuniga. E mafai foi ona latou maua a latou lava punaoa e suesue ai e ala i le sailia o se uiga faa-Keriso i le Potutusi o le Talalelei.

3. Valaaulia ni nai tagata aoga e faasoa mai tusitusiga paia pe na faapefea ona faataitaia e le Faaola le uiga ua latou filifili e galulue ai. (Tagai i le laasaga 2 o le gaoioiga o le “Faamaumau Ou Manatu” o loo i le vaega 3 o anomea mo sauniuniga.)

4. Valaaulia tagata aoga e faasoa mai mea na latou aoaoina e ala i le talanoa i se tasi latou te iloa e uiga i le avea atili e faapei o le Faaola. (Tagai i le gaoioigao le “Talanoaga i Sauniuniga mo le Vasega” i le vaega 1 po o le laasaga lona tolu o le gaoioiga “Faamaumau Ou Manatu” i le vaega 3 o anomea mo sauniuniga mo manatu.)

Ina ia faaiu le vasega, e mafai ona e faaali atu fesili nei ma valaaulia tagata aoga e mafaufau loloto ma faamaumau o latou lagona:

• E faapefea e le atiina a’e po o le faamalosia o le uiga faa-Keriso na e filifilia ona tosina ai lou olaga ma sootaga?

• O a ni laasaga laiti ma faatauvaa e mafai ona e faia i lenei vaiaso e atiina a’e ai lenei uiga?

• O le a faapefea ona e sailia le fesoasoani a le Alii e atiina a’e pe faamalosia ai lenei uiga?

Mafaufau e valaaulia ni nai tagata aoga e faasoa mai se mea na latou lagonaina, aoaoina, pe na tusia i le taimi o le talanoaga i le asō. E mafai foi ona faasoa atu lau molimau.

Mo Le Isi Taimi

Ina ia uuna’ia tagata aoga e suesue i anomea mo sauniuniga mo le vasega e sosoo ai, mafaufau e auina atu le sāvali lenei po o sau lava sāvali: A o e suesue i le lesona 27, mafaufau i le sootaga o upu faamoemoe, malamalama, ma le ola.