“Lesona 6 Anomea a le Faiaoga: Faaaogaina o Faatusa ia Malamalama Atili ai i le Mana Togiola o Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 6 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 6 Anomea a le Faiaoga
Faaaogaina o Faatusa e Malamalama Atili ai i le Mana Togiola o Keriso
Ua tumu tusitusiga paia i faatusa o Iesu Keriso ma Lana talalelei. E oo lava a o lei soifua mai o Ia, sa fesoasoani le Faaola i Lona nuu ia malamalama po o ai o Ia ma pe aisea latou te manaomia ai o Ia. O lenei lesona o le a vailiili ai faatusa faatusi paia e mafai ona faamalosia ai lo tatou faatuatua ia Iesu Keriso ma Lana matafaioi o lo tatou Togiola.
Fautuaga mo le Aoao Atu
Faaleleia o Lo Tatou Aoao Atu ma le Aoaoina
Uunaia o talanoaga anoa. E mafai e faiaoga ona uunaia se talanoaga anoa pe a latou fausiaina se siosiomaga e aoao ai le alofa ma le faatuatuaina ina ia lagona ai e tamaiti aoga le saogalemu e fai ai a latou fesili, talanoa e uiga i o latou le mautonu ma popolega, faasoa atu aafiaga patino, ma faailoa atu a latou molimau. Ina ia aoao atili, mafaufau e matamata i le “Meaningful Class Discussions” (1:52) saunia e Elder Neil L. Andersen o le Korama a Aposetolo e Toasefululua.
Ua faia e le Alii taulaga i manu e molimau atu ai i Lona mana togiola.
Tusi pe faaali se ata o se fatu (po o se isi faatusa masani) i luga o le laupapa. Fai i le vasega e faailoa mai ni mea e mafai ona faatusa i ai se fatu. Faailoa atu o loo faaaoga e tusitusiga paia ia faatusa e molimau atu ai ia Iesu Keriso (tagai i le 2 Nifae 11:4). E mafai foi ona e fai i le vasega e faailoa mai ni nai faataitaiga o faatusa o loo aoao mai e uiga ia Keriso.
Toe faamanatu puupuu pe fai i se tamaititi aoga e aotele mai le talaaga mo le ata o Atamu ma Eva o loo avatu faatasi ai. Valaaulia tamaiti aoga e toe faamanatu le Mose 5:4–8 ma faailoa mai faatusa o i le ata lenei.
Ina ia faalolotoina le malamalama o tamaiti aoga i faatusa i lenei ata, mafaufau e fai atu fesili nei:
-
O a upumoni taua na aoaoina e uiga ia Iesu Keriso e ala i faatusa o se tamai mamoe, se fata faitaulaga, ma le faamaligiina o le toto? (E mafai ona e toe faamanatuina le saunoaga a Elder Jeffrey R. Holland i le vaega 1 o anomea mo sauniuniga. Fesoasoani i tamaiti aoga ia iloa se upumoni e talitutusa ma lenei: O le taulagaina o se tamai mamoe ulumatua e faatusa i le taulaga togiola a Iesu Keriso.)
-
O a faailoga ua tatou faaaogaina i aso nei e faamanatu mai ai ia i tatou le Togiola a le Faaola?
Manatua: Afai e faaalia e au tamaiti aoga ni lagona le nofolelei i le faiga o taulaga e osi i manu, faamanatu atu ia i latou o le toatele o tagata o le Feagaiga Tuai sa nonofo i nuu faafailele, lea sa masani ai ona tausia ni manu sa faalaloina mo meaai. Ta‘u atu sa taulai atu le Alii i aafiaga o tagata o aso uma e aoao atu ai ni lesona mamana e uiga i Lana taulaga togiola.
O loo i ai i tusitusiga paia le tele o faatusa o loo molimau mai i le misiona paia a Iesu Keriso.
Manatua: O lenei vaega o loo aofia ai ni filifiliga faafaiaoga se lua. Filifili po o le fea filifiliga o le a sili ona lelei mo au tamaiti aoga. O le filifiliga 1 e tuuina atu ni taiala se tele mo aafiaga o aoaoga.
Filifiliga 1: O Le Faatusa o le Paseka
E faalagolago i le malamalama o au tamaiti aoga, atonu e taua le faia o se iloiloga puupuu o mea na tutupu na taitai atu ai i le Paseka ona faitau faatasi lea o le Esoto 12:3–13. Pe e mafai foi ona e matamata i le “O Le Paseka” (3:08).
Ina ia tuuina atu i tagata aoga se avanoa e talanoaina ai le uiga o faatusa o le Paseka, e mafai ona e tuu atu ia i latou e galulue i ni vaega toalaiti ma faamaea pe talanoaina “Uiga e Ono I Ai” o le vaega o le siata o le “O Le Faatusa o le Paseka” o loo maua i le vaega 2 o anomea mo sauniuniga. Pe e mafai foi ona e atofa atu se faatusa i vaega taitasi ma fai atu ia i latou e faitau ia mau lagolago, tusi se uiga talafeagai mo a latou faatusa, ona faasoa atu lea i le vasega mea na latou aoaoina.
A o faasoa mai e tamaiti aoga o latou manatu e uiga i faatusa o le Paseka, mafaufau e fai atu fesili tulitatao e mafai ona fesoasoani ia i latou e faaaoga ai le uiga o faatusa i o latou olaga. O nei fesili tulitatao e mafai ona amata faapenei:
-
O le a se mea ua aoao mai e lenei faatusa ia i tatou e uiga i le …
-
E mafai faapefea ona faaaoga le uiga o lenei faatusa …
-
O anafea na e vaai ai …
A uma le tou talanoaga, mafaufau e valaaulia tamaiti aoga e tusi faamaumau mea sa latou aoaoina pe lagonaina e uiga i le Faaola, po o la latou sootaga ma Ia, mai faatusa o le Paseka. E mafai foi ona e valaaulia tamaiti aoga o e naunau e faasoa mai mea sa latou tusia.
Mo Le Faasinomaga a le Faiaoga
Faatusa o le Paseka
|
Fuaiupu |
Faailoga |
Uiga e Ono I Ai |
Mau Lagolago* |
|---|---|---|---|
Fuaiupu | Faailoga Sa ositaulagaina e fale taitasi se tamai mamoe | Uiga e Ono I Ai O le mana togiola o Iesu Keriso e mo tagata uma. | Mau Lagolago* |
Fuaiupu | Faailoga O le tamai mamoe e aunoa ma se pona | Uiga e Ono I Ai O le Faaola o le Tamai Mamoe a le Atua, e atoatoa ma e aunoa ma se agasala. | Mau Lagolago* |
Fuaiupu | Faailoga Sa faaaoga le toto i luga o pou o faitotoa o fale taitasi | Uiga e Ono I Ai O feagaiga e mafai ai ona tatou faaaogaina le toto o Keriso e faatoilalo ai le oti faaleagaga. O le toto o Keriso e togiolaina ma puipuia i tatou. | Mau Lagolago* |
Fuaiupu | Faailoga Falaoa e le faafefeteina (falaoa e faia e aunoa ma le mea faafefete, lea e mafua ai ona faaleagaina le falaoa ma legalegā) | Uiga e Ono I Ai O Iesu Keriso o le Areto o le Ola. E leai sona pona. | Mau Lagolago* |
Fuaiupu | Faailoga Laau Oona | Uiga e Ono I Ai Ua tatou ola i se lalolagi pa‘ū ma ua noatia i le oona o le agasala. | Mau Lagolago* |
Fuaiupu | Faailoga Fusia sulugatiti, faia seevae, tootoo i lima, aai faataalise | Uiga e Ono I Ai E tatau ona faaaoga le mana togiola a Keriso e aunoa ma le faatuai. | Mau Lagolago* |
Filifiliga 2: Faatusa o Keriso i le Feagaiga Tuai
Valaaulia se tamaititi aoga e faitau leotele le saunoaga a Elder Bruce R. McConkie i le vaega 3 o anomea mo sauniuniga. Ona fesili atu lea:
-
Ua mafai faapefea e le vaavaai mo faatusa o Iesu Keriso ona faamalosia, pe e faapefea ona faamalosia, lou faatuatua ia te Ia?
Molimau atu e mafai ona tatou aoao atili ia Iesu Keriso a o tatou iloaina le ata faatusa, o ituaiga, ma faailoga e molimau ia te Ia.
Toe faamanatu fuaitau e fa o le Feagaiga Tuai o loo lisi atu i le vaega 3 o anomea mo sauniuniga. Valaaulia tamaiti aoga e fai ni vaega toalaiti ma isi tamaiti aoga o e mananao e talanoaina le fuaitau lava e tasi e sili ona latou mananao e talanoaina. Ona valaaulia lea o vaega taitasi e faitau faatasi a latou fuaitau filifilia ma talanoaina fesili suesue o loo maua i le vaega 3.
A uma ona tuuina atu ia lava se taimi mo se talanoaga anoa, valaaulia ni nai tamaiti aoga e faasoa mai mea na latou aoaoina pe lagonaina e uiga ia Iesu Keriso o se taunuuga o la latou talanoaga faavaega toalaiti.
Mo Le Isi Taimi
A o lei oo i le isi vasega, e mafai ona avatu se feau tusitusia i tamaiti aoga ma fesili atu: Pe na e mafaufau ea pe faapefea ona faaleleia le faamasinotonu a le Atua ma Lona alofa ma le alofa mutimutivale? A o e faitau i le anomea o sauniuniga mo le lesona 7, mafaufau i le sootaga i le va o uiga paia o le faamasinotonu, alofa mutimutivale, ma le alofa.