Lesona 11 Anomea mo le Sauniuniga o le Vasega: Olioli i Faamanuiaga o le Ekalesia a le Alii
“Lesona 11 Anomea mo le Sauniuniga o le Vasega: Olioli i Faamanuiaga o le Ekalesia a le Alii,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 11 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
talavou matua foliga ataata i le lotu
Lesona 11 Anomea mo le Sauniuniga o le Vasega
Olioli i Faamanuiaga o le Ekalesia a le Alii
I se taimi ua faaitiitia ai le auai i le lotu i aulotu eseese i le tele o nofoaga i le salafa o le lalolagi, atonu e faapitoa lava le taua o le sailia o le pogai na faatuina ai e Iesu Keriso se ekalesia i le taimi o Lana galuega i le olaga nei ona toe fuatai mai lea i aso e gata ai. A o e suesue, mafaufau i le ala na aumaia ai pe e mafai foi ona aumaia e le Ekalesia toefuataiina a le Alii i lou olaga faamoemoega faaopoopo, malosi, ma le olioli.
Vaega 1
O a faamanuiaga tulaga ese e na o le auai i le Ekalesia a le Alii e mafai ona maua ai?
Na aoao mai le Aposetolo o Paulo o le Ekalesia a Iesu Keriso o loo “atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20). I le taimi o Lana galuega i le olaga nei, sa filifilia ai e Iesu Keriso ni alii se toasefululua ma faauuina i latou e avea ma Ana Aposetolo. Na Ia tuuina atu ia i latou le pule ma ki o le perisitua ina ia mafai ona latou taitaia Lana Ekalesia, aoao atu Lana talalelei, molimau atu i Lona moni, ma galue i Lona suafa (tagai Mataio 10:1, 7–8; 16:19; Galuega 1:21–22; Mataupu Faavae ma Feagaiga 107:23). E mafai ona e matamata i le “Jesus Calls Twelve Apostles to Preach and Bless Others” (1:30) e aoao atili ai.
Ina ua mavae le toetu o Iesu Keriso, sa faaauau pea ona Ia taitaia Lana Ekalesia e ala i Ana Aposetolo, o e sa umia ki o le perisitua e taitai ai le galuega o le faaolataga. Peitai, e toatele na tetee i Ana auauna valaauina, ma sa amata ona pauu atu tagata o le Ekalesia i le faia o mea sese. Ina ua mavae le maliliu o Aposetolo, “na faaleagaina e tagata ia mataupu faavae o le talalelei ma faia ni suiga e le‘i faatagaina i le faatulagaga a o le Ekalesia ma sauniga o le perisitua. Ona o le salalau tele o lenei liliuese, o lea sa aveesea ai e le Alii le pule o le perisitua mai le lalolagi” (Autu o le Talalelei, “Liliuese,” topics.ChurchofJesusChrist.org). Ua lauiloa lenei mea o le Liliuese Tele.
O le taimi nei ua umia e le Au Peresitene Sili ma le Korama a Aposetolo e Toasefululua le pule ma ki uma o le perisitua e manaomia e taitai ai le Ekalesia a le Alii. E faapitoa le taua o lenei mea ia i tatou taitoatasi o e mananao ia lelei atili ma faalatalata atili atu ia Keriso.
I le saunoa ai e uiga i le taua o le auai i le lotu mo “tagata uma e mafaufau i tapuaiga,” sa matauina ai e Peresitene Dallin H. Oaks o le Au Peresitene Sili, “O le auai ma le toaaga i se lotu e fesoasoani lea ia i tatou ia avea ma ni tagata lelei atu ma tosinaga lelei atu i olaga o isi” (“O Le Manaomia o se Ekalesia,” Liahona, Nov. 2021, 24). Ona ia saunoa lea:
Ata
Peresitene Dallin H. Oaks
Ioe, tatou te faamautu atu ua aoao manino mai e tusitusiga paia, anamua ma aso nei, le tupu’aga ma le manaomia o se Ekalesia e taitaia e le pule ma i le pule a lo tatou Alii, o Iesu Keriso. Tatou te molimau atu foi ua toe faavaeina le Ekalesia toefuataiina a Iesu Keriso e a’oa’o ai le atoaga o Lana aoaoga faavae ma ia faatautaia ai i Lana pule o le perisitua e faatino ai sauniga e tatau ai e ulufale atu ai i le malo o le Atua [tagai Ioane 3:5]. O tagata o le Ekalesia latou te lafoa’ia le auai i le Lotu ae na o le faaleagaga o le tagata lava ia e faalagolago i ai, ua latou vavaeeseina i latou lava mai nei vaega autu o le talalelei: o le mana ma faamanuiaga o le perisitua, le atoaga o le a’oa’oga faavae toefuataiina, ma uunaiga ma avanoa e faaaoga ai lena a’oa’oga faavae. Latou te faalēaogaina lo latou avanoa e agavaa ai mo se olaga e faavavau ma o latou aiga. (“O Le Manaomia o se Ekalesia,” Liahona, Nov. 2021, 25)
Sa aoao mai foi Elder Robert D. Hales o le Korama a Aposetolo e Toasefululua:
Ata
Elder Robert D. Hales
Pe ana faapea ua le i ai le mana o le perisitua i luga o le fogaeleele, semanū o le a saoloto le fili e fealuai ma nofotupu e le mataofia. O le a leai se meaalofa o le Agaga Paia e taitai ma faamalamalamaina ai i tatou; leai ni perofeta e saunoa mai i le suafa o le Alii; leai ni malumalu e mafai ona tatou osia ai feagaiga paia faavavau; leai se pule e faamanuia pe papatiso ai, e faamalolo pe faamafanafana ai. (“O Faamanuiaga o le Perisitua,” Liahona, Nov. 1995, 32)
Ata
aikona, mafaufau loloto
Mafaufau Loloto e Sauniuni ai mo le Vasega
E faapefea ona e faamalamalama atu i se tasi e le auai i lo tatou faatuatuaga ia faamanuiaga tulaga ese o loo avanoa mo tagata O Le Ekalesia a Iesu Keriso o le Au Paia o Aso e Gata Ai?
Vaega 2
E mafai faapefea e le auai atoatoa i le Ekalesia ona faamanuiaina ai a’u ma isi?
Na aoao mai e Elder D.Todd Christofferson o le Korama a Aposetolo e Toasefululua mea nei e uiga i faamanuiaga o le auai i le Ekalesia:
Ata
Elder D. Todd Christofferson
E taua le iloa o le faamoemoega autu lava o le Atua o lo tatou alualu i luma. … E manaomia ai mea e sili atu nai lo le na o na fia lelei pe lagona faaleagaga. E manaomia ai le faatuatua ia Iesu Keriso, salamo, papatisoga i le vai ma le Agaga, ma tumau i le faatuatua e oo i le iuga. E le mafai e se tasi ona ausia lenei mea na o ia lava, o lea, o se mafuaaga tele ua fai ai e le Alii se ekalesia, o le fatuina lea o se nuu o le Au Paia o le a lagolago ai e le tasi le isi i le “ala sa’o ma le vaapiapi lea e tau atu i le ola e faavavau” [2 Nifae 31:18]. (“E Manaomia i Se A Le Ekalesia,” Liahona, Nov. 2015, 108)
Na aoao mai e le Aposetolo o Paulo le ala e faamalosia ai i tatou e le avea ma se vaega o se nuu o le Au Paia ma mafai ona tatou latalata atili atu ai ia Iesu Keriso.
Ata
aikona, suesue
Suesue e Sauniuni ai mo le Vasega
Faitau le Efeso 4:11–14, ma mafaufau e faailoga auala eseese e mafai ai e le auai i le Ekalesia a le Alii ona faamanuiaina lou olaga.
Sa faamalamalama mai foi e Elder Christofferson o aafiaga ma isi tagata o le Ekalesia ua tatou maua ai avanoa talafeagai e faaaoga ai le talalelei a le Alii:
Ata
Elder D. Todd Christofferson
I le avea ai ma tino o Keriso, e feauauna ā’i tagata o le Ekalesia i le tulaga moni o le olaga i aso faisoo. O i tatou uma lava e le atoatoa; tatou te faatausuai atu ma tatou te tiga foi. E tele lava ina tatou tofotofoina le tasi ma le isi i o tatou lava uiga faaletagata tulaga ese. I le tino o Keriso, e tatau ona tatou faia isi mau mea nai lo le na o le aoao o manatu faavae ma upu faaeaea ma ia i ai ni aafiaga tatou te ‘aofia patino’ ai a o tatou aoao e “nonofo faatasi i le alofa” [Mataupu Faavae ma Feagaiga 42:45]. (“E Manaomia i Se A Le Ekalesia,” Liahona, Nov. 2015, 108)
Ata
aikona, tusi faamaumau
Tusi Faamaumau Ou Manatu
E mafai ona tatou maua le aafiaga o le “aafia patino” i le fausiaina o le malo o le Alii e ala i valaauga o le Ekalesia, tofiga faaleauaunaga, auauna atu i isi, po o le aoao ia galulue faatasi ma i latou e ese mai ia i tatou. Mafaufau i aafiaga o le “aafia patino” na e maua pe o loo i ai i lau uarota po o le paranesi. Filifili se aafiaga se tasi ma tusi pe na faapefea ona fesoasoani ia te oe e faaaoga aoaoga o le talalelei ma avea atili e faapei o Iesu Keriso. Afai e te le o auai i le lotu, mafaufau e faamaumau pe faapefea ona faamanuiaina oe ma i latou o loo i lau uarota po o le paranesi pe afai e amata ona e auai i le lotu.
Vaega 3
O le a se mea e mafai ona ou faia e fesoasoani ai i la’u uarota po o le paranesi ia avea ma se nofoaga sili ona faafeiloai mo tagata uma?
Mafaufau i lagona o le taulimaina ma le agalelei ma le faamaoni pe a auai i le lotu. O anafea na e fesoasoani ai i se tasi i lau uarota po o le paranesi ia lagona faapena?
Na aoao mai e Moronae le taua o le faaaumea i le Ekalesia. Faitau le Moronae 6:4–5, ma mafaufau pe faapefea ona e fesoasoani e fatu se lagona o le auai i lau uarota po o le paranesi.
Mafaufau i le faataitaiga lenei o le faaaumea na faasoa mai e Sister Carole M. Stephens, o le sa avea muamua ma fesoasoani i le Au Peresitene Aoao o le Aualofa:
Ata
Sister Carole M. Stephens
E tele ana [Maria] uo e le toaaga mai pe e lei faalogo i le savali o le talalelei toefuataiina a Iesu Keriso. Na te faaaogaina lona faatuatua i aso taitasi ma tatalo ai ia iloa po o ai o manaomia lana fesoasoani, ona ia galue lea i le musumusuga na te maua. Na te faia ni valaau i le telefoni, faaalia lona alofa, ma tau atu i ana uo, “Matou te manaomia oe.” Na te faia afiafi faaleaiga i lona fale mautotogi i vaiaso taitasi ma valaaulia ai tuaoi, tagata o le ekalesia, ma faifeautalai e o mai—ma e na te fafagaina i latou. Na te valaauliaina i latou e o mai i le lotu, faatalitali mo lo latou taunuu atu, ma saofafai faatasi ma i latou pe a latou taunuu. (“E I Ai se Mafuaaga Sili mo i Tatou e Olioli Ai,” Liahona, Nov. 2013, 116)
Ata
aikona, faatino
Mafaufau Loloto e Sauniuni ai mo le Vasega
O ai i lau uarota po o le paranesi e mafai ona e faamanuiaina e ala i le aapa atu? O le a se mea o le a e faia e fesoasoani ai ia latou lagonaina le alofa o le Faaola pe a latou auai i le lotu? Mafaufau e matamata i le “Inviting Others to ‘Come and Stay [Valaauliaina o Isi e ‘O Mai ma Nonofo’]” (1:39) mo faataitaiga o le auala e faaaumea ai.
