Lesona 18 Anomea a le Faiaoga

Mauaina o le Meaalofa Paia o le Alofa Tunoa o le Faaola

Ua aoao mai tusitusiga paia ua na o “galuega, alofa mutimutivale, ma le alofa tunoa o le Mesia Paia” e mafai ai ona tatou maua le ola e faavavau (2 Nifae 2:8). I le taimi o lenei lesona, o le a faamatala ai e le vasega lo latou manaomia o le alofa tunoa o le Faaola, faasoa mai ni auala na latou maua ai Lona alofa tunoa, ma fuafua po o a mea e mafai ona latou faia e faalagolago atili ai ia te Ia.

Fautuaga mo le Aoao Atu

Ua aoao mai e le Alii ma Ana auauna le manaomia o le alofa tunoa.

Valaaulia tagata aoga e lisi faalilolilo nisi o o latou manaoga sili ma manaoga mo le fesoasoani a le Atua. Mo se faataitaiga, atonu latou te lisiina faaosoosoga po o agasala latou te mananao e faatoilalo, vaivaiga o loo latou tauivi ai, o se luitau po o se faaiuga latou te feagai, o se galuega tele latou te manaomia le fesoasoani e faamae’a, po o uiga faaKeriso latou te mananao e atiina ae. Fautuaina tamaiti aoga e mafaufau i nei manaoga a o latou talanoaina le alofa tunoa o Iesu Keriso i le taimi o le lesona.

Ina ia iloilo le malamalama o tamaiti aoga i le alofa tunoa, e mafai ona e valaaulia i latou e faamatala mai mea ua latou malamalama i ai i le alofa tunoa o Iesu Keriso ma iloa ai pe i ai ni a latou fesili. Afai e mafai, faaali atu le ata lenei:

O le alofa tunoa o le fesoasoani lea po o le malosiaga e tuuina mai e ala mai i le Togiola a le Alii o Iesu Keriso. O le upu alofa tunoa, e pei ona faaaogaina i tusitusiga paia, o loo mua’i faatatau i le mana malosi ma le faamalologa faaleagaga na ofo mai e ala i le alofa mutimutivale ma le alofa o Iesu Keriso. (Gospel Topics, “Grace,” topics.ChurchofJesusChrist.org)

Mafaufau e faaali atu le ata lenei o se vine. Faamalamalama atu na aoao atu e Iesu Keriso le faataoto i le vine moni a o le’i alu i le Faatoaga o Ketesemane e faataunuu Lana Togiola.

vine

Valaaulia tamaiti aoga e iloilo le Ioane 15:1–8, ma vaavaai po o a mea e mafai e faatusa o le vine, lālā, ma fua ona aoao ai i tatou e uiga i le meaalofa a le Faaola o le alofa tunoa paia.

Mafaufau e fai atu fesili nei e fesoasoani ai i tagata aoga ia iloa sootaga i le va o le faataoto i le vine moni ma le alofa tunoa:

• O a mea e ono suitulaga i faatusa o le vine, lālā, ma fua? O le a se mea latou te ono aoao mai ia i tatou e uiga i lo tatou manaomia o le alofa tunoa o le Faaola? (E mafai ona e fesoasoani i tagata aoga e faailoa mai se mataupu faavae e pei o lenei: A o tatou tumau ia Iesu Keriso, e mafai ona tatou maua Lona alofa tunoa e fesoasoani ai ia i tatou e aumai galuega lelei.)

• Faamata o le a se foliga o le tumau pe mausali ia Keriso? (Atonu e te manao e toe faamanatu le saunoaga a Elder Jeffrey R. Holland i le vaega 1 o le anomea mo sauniuniga. O a ni mea na fesoasoani ia te oe e talia ma mulimuli i le Faaola? O le a se mea e mafai e se tasi ona faia e lagona ai le vavaeese mai ia Iesu Keriso ma Lana meaalofa o le alofa tunoa?

E mafai ona e valaaulia se tamaitiiti aoga se toatasi pe toalua e faasoa mai o latou lagona e uiga i le meaalofa o le alofa tunoa o le Faaola. Mafaufau e faasoa atu lau lava molimau.

E mafai ona tatou lagonaina le puipuiga a le Alii i o tatou olaga.

Mafaufau e faaali atu ata o se meaalofa ma se tupe totogi o loo maua i le vaega 2 o anomea mo sauniuniga. Valaaulia tamaiti aoga e faamatala mai mea ua latou iloa e uiga i le alofa tunoa o Keriso a le o se meaalofa po o se totogi na maua. (E mafai ona faaalu e tamaiti aoga ni nai minute e iloilo ai le vaega 2 po o nisi o anomea o le “Manao i Nisi Mea?” pe a manaomia. Afai latou te faamalamalamaina nei manatu ua uma ona i ai i le amataga o le lesona, e mafai ona e faaauau pea i tulaga faataitai nei.)

Faaali atu ma faitau leotele faataitaiga nei:

Ua lagona e Sakura o loo ia toilalo i taimi uma ma e lē lava lona lelei e manaomia ai le fesoasoani a le Alii.

E talitonu Tobias a o lei mafai ona ia maua le fesoasoani a le Alii e faatoilalo ai lona vaisu o ponokalafi, e tatau ona ia faia muamua mea uma e mafai ona ia faia e faatoilalo ai.

E talitonu Elena o ana lava taumafaiga e le tāua ma e matua’i lē afaina lava pe a faatusatusa i le alofa tunoa togiola o Iesu Keriso.

Valaaulia tagata aoga e faasoa mai pe faapefea ona latou tali atu ia Sakura, Tobias, ma Elena. Mafaufau po o fea o fesili nei e mafai ona e fai atu e fesoasoani ai i tamaiti aoga ia faalolotoina lo latou aoaoina:

• O le a se manatu sese e ono i ai i lenei tagata e uiga i le meaalofa o le alofa tunoa o le Faaola?

• E mafai faapefea e sea manatu sese ona faalavelaveina o ia po o lona mafai ona maua pe faalagolago i le alofa tunoa o le Faaola?

• O le a se aoaoga po o se mataupu faavae e faatatau i le alofa tunoa o le Faaola e mafai ona e faasoa atu i lenei tagata?

Mafaufau e lisi upumoni e faailoa mai e tamaiti aoga i luga o le laupapa. Atonu e faailoa mai e tamaiti aoga ia upumoni e pei o nei: O le alofa tunoa o se meaalofa tatou te lē totogia ae tatou te maua a o tatou faatinoina le faatuatua ia Iesu Keriso ma taumafai e ola i le talalelei. E mafai ona tatou maua le alofa tunoa o le Alii a o le’i faia, i le taimi, ma pe a uma ona tatou tuuina atu la tatou taumafaiga sili.

Faamanatu i tagata aoga sa valaaulia i latou i le vaega 3 o anomea mo sauniuniga e suesue se tala faatusipaia o loo faapupula mai ai le ala e mafai ai ona galue le alofa tunoa o le Alii i o tatou olaga. (E mafai ona e tuuina atu i tamaiti aoga se taimi e toe faamanatu ai le tala o le mau sa latou filifilia.) Faatulaga tagata aoga i ni vaega toalaiti. Valaaulia tamaiti aoga e faamatala mai a latou fuaitau ma faasoa mai a latou tali i fesili e tolu i le vaega 3 o anomea mo sauniuniga.

Faaleleia o Lo Tatou Aoao Atu ma le Aoao Mai

Tuu atu i tagata aoga se taimi e mafaufau loloto ai. O se tasi o auala e mafai ona tatou fesoasoani ai i tamaiti aoga ia faaaoga lelei o latou loto e malamalama ai o le tuu atu lea ia i latou o se taimi i le vasega e mafaufau loloto ai pe tusi e uiga i mea sa latou malamalama ma lagonaina. Ona mafai lea ona tatou valaaulia i latou e mafaufau po o a faatinoga patino e tatau ona latou faia e faaaoga ai mea sa latou aoaoina i o latou olaga.

E mafai ona e faaiuina le vasega i le valaaulia o tagata aoga e toe faamanatu manaoga patino ma manaoga na latou lisiina i le amataga o le vasega. Tuu atu ia i latou se taimi e mafaufau ai ma le agaga tatalo ma tusifaamaumau mea e mafai ona latou faia e valaaulia atili ai le alofa tunoa o le Alii i o latou olaga, agai i luma ma le faatuatua, ma faalagolago atoatoa atili i Lona mana paia.

Mo Le Isi Taimi

Mafaufau e auina atu le sāvali lenei, po o se tasi o au lava sāvali, i lau vasega a o lei oo i le isi vasega: A o e suesue i anomea mo sauniuniga mo le lesona 19, mafaufau i se tasi e te iloa o le a faamanuiaina lona olaga e ala i le mauaina o se malamalama sili atu i le galuega a Iesu Keriso ia i latou i le lalolagi o agaga.