Lesona 23 Anomea a le Faiaoga: Ola Ma le Faamoemoe a o Tatou Saunia mo le Afio Mai Faalua o Iesu Keriso
“Lesona 23 Anomea a le Faiaoga: Ola ma le Faamoemoe a o Tatou Saunia mo le Afio Mai Faalua o Iesu Keriso,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 23 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 23 Anomea a le Faiaoga
Ola ma le Faamoemoe a o Tatou Saunia mo le Afio Mai Faalua o Iesu Keriso
O Iesu Keriso o le a “i ai se aso e toe afio mai ai o Ia i le lalolagi … [ma] pule o le Tupu o Tupu ma nofotupu foi o le Alii o Alii” (“O Le Keriso Soifua: O Le Molimau a le Au Aposetolo,” ChurchofJesusChrist.org). I lenei lesona, o le a faamatala mai ai e tagata aoga pe aisea e mafai ai ona latou tulimatai atu ma le faamoemoe i le Afio Mai Faalua o Iesu Keriso. O le a latou mafaufau foi i auala e mafai ai ona latou saunia i latou lava ma isi mo le toe afio mai o le Faaola ma nofotupu i le meleniuma.
Fautuaga mo le Aoao Atu
O le Afio Mai Faalua o le Faaola o le a aumaia ai le Meleniuma.
A o le’i taunuu mai tagata aoga mo le vasega, e mafai ona e tusia mea nei i luga o le laupapa: O nisi o faailoga o le Afio Mai Faalua o le Alii : o Keriso pepelo, o perofeta pepelo, taua, tala o taua, oge, faama’i, mafuie, amioletonu, faama’i faatafunaina, sauaga, ma faailoga i le lagi (tagai Iosefa Samita—Mataio 1:22–23, 28–30, 33; Mataupu Faavae ma Feagaiga 45:26–27, 30–33, 40–42).
Ina ia amata le vasega mafaufau e faasoa atu le ata faataitai lenei:
I le taimi o se lesona e uiga i aso e gata ai, sa faia ai e le vasega o le Aoga Sa a Evan se lisi o faailoga ma tulaga faigata uma o le a muamua mai i le Afio Mai Faalua. E toatele tagata na manatu i le leaga o mea ma o le a na ona atili ai ona leaga. Sa lagona e Evan le popole tele ma le lotovaivai a o ia tuua le falelotu.
Pe na e oo i nei lagona e pei o Evan?
Faamata o le a se mea na misi mai lenei talanoaga a le vasega?
Valaaulia tagata o le vasega e iloilo le Mataupu Faavae ma Feagaiga 45:34–35, 38–39, ma vaavaai mo le fautuaga a le Alii ia i latou o e ua atuatuvale i faailoga o Lona afio mai. Ona mafaufau lea po o fea o fesili nei e mafai ona e fai atu e fesoasoani ai i tagata aoga ia faalolotoina lo latou aoaoina:
O le a le sāvali a le Faaola i soo o e ua atuatuvale e uiga i faailoga o Lona afio mai? (E mafai ona faailoa mai e tagata aoga se upumoni e pei o lenei: O faailoga o le afio mai o le Alii e ta’u mai ai i e faamaoni ua lata Lona Afio Mai Faalua.) E faapefea ona avea lenei upumoni ma se sāvali o le faamoemoe?
O a mea na tutupu i le Toefuataiga o faailoga ua lata le Afio Mai Faalua? (E mafai ona e iloiloina faataitaiga o loo maua i le vaega 1 o anomea mo sauniuniga. E mafai ona e faaopoopo atu i le lisi o faailoga o i luga o le laupapa.) E faapefea e nei faailoga ma mea na tutupu ona aafia ai le ala e te vaai ai i aso e gata ai?
Aisea e tāua ai le taulai atu ia Iesu Keriso pe a tatou talanoa e uiga i faailoga e sili ona faigata e fesootai ma le Afio Mai Faalua? (Mafaufau e faitau le saunoaga a Elder Ronald A. Rasband i le vaega 1 o le anomea mo sauniuniga.) E faapefea e le taulai atu ia Iesu Keriso ona faatosinaina, pe e faapefea ona aafia ai, le ala e te vaai ai i luitau o aso e gata ai?
Faamanatu i tagata aoga o le Afio Mai Faalua o le a aumaia ai le nofotupu o le filemu ma le amiotonu i le meleniuma a le Faaola. Valaaulia tagata aoga e iloilo le Mataupu Faavae ma Feagaiga 101:26–32, 35 ma vaavaai mo tulaga o le a i ai i le taimi o le Meleniuma. E mafai ona e lisi i luga o le laupapa mea latou te maua.
O fea o nei tulaga e sili ona e tulimatai atu i ai? Aisea?
E mafai ona e faaali atu le saunoaga lenei a Elder Neil L. Andersen:
Ata
Elder Neil L. Andersen
E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai. … O lenei aafiaga ofoofogia o le a faailoga ai o tatou agaga e faavavau. (Neil L. Andersen, “Ua Matou Tautalatala e uiga ia Keriso,” Liahona, Nov. 2020, 91)
Valaaulia tagata aoga e vaai faalemafaufau i le Afio Mai Faalua o le Faaola ma le Meleniuma. A o latou vaai faalemafaufau, valaaulia i latou e faamaumau o latou manatu ma lagona e tali atu ai i le fesili lenei:
E faapefea e le mafaufau i le Afio Mai Faalua o le Faaola ma le Meleniuma ona fesoasoani ia te oe e ola ai ma le faamoemoe ma le filemu sili atu?
Atonu e te manao e fesili atu i se tagata aoga e toatasi pe toalua e faasoa mai mea na la tusia.
Ua aoao i tatou e le Alii i le auala e saunia ai mo Lona Afio Mai Faalua.
Valaaulia tagata aoga e toe iloilo le faataoto i taupou e toasefulu i le Mataio 25:1–13 pe maimoa le vitiō “They That Are Wise” (mai le taimi 0:00 i le 5:46). Afai e manaomia, fesoasoani i tagata aoga ia malamalama o taupou e faatusa i tagata o le Ekalesia (tagai Dallin H. Oaks, “Sauniuniga mo le Afio Mai Faalua,” Liahona, Me 2004, 8).
Faaleleia o Lo Tatou Aoao Atu ma le Aoaoina mai
Faatuatuaina au tagata aoga. A o galulue tagata aoga i ni vaega toalaiti, ia talitonu e mafai ona latou faia ni talanoaga musuia e aunoa ma lau vaavaaiga. A uma ni talanoaga faavaega toalaiti, ia iloatino po o le a le maualuga o le tulitatao e manaomia e tagata aoga. Mo se faataitaiga, nai lo le tuu atu i tagata aoga e tau lava o le toe fai mai o mea sa latou talanoaina, vaavaai mo ni auala e fausia ai i luga o a latou talanoaga i vaega toalaiti.
Ina ia fesoasoani i tagata aoga e mafaufau loloto e uiga i le tāua o le faataoto, e mafai ona e tuu atu ia i latou e fai ni vaega toalaiti o talanoaga (lua i le toatolu tagata). Tuu atu i vaega taitasi a le o le pepa e tufa atu “O Taupou Valea” po o le “O Taupou Popoto.” Faailoa atu i tagata aoga a uma la latou talanoaga, o le a latou galulue faatasi ma se vaega na talanoaina le isi autu ma faasoa mai mea na latou aoaoina i le tasi ma le isi.
O Taupou Valea
O Iesu Keriso ma Lana Talalelei e Faavavau Anomea a le Faiaoga—Lesona 23
O le a se mea e ono tāua e uiga i fasifuaitau “ua tuai mai le faatoafaiava” (Mataio 25:5) ma le “ua oo i le tulua o po ona sau ai lea o le alaga” (fuaiupu 6)?
Aisea na faamatalaina ai taupou e toalima e valea? (E mafai ona outou talanoaina po o a mea o loo aoao mai e fasifuatau “Ou te le iloa outou” [fuaiupu 12] ma le “Tou te le iloa au” (Faaliliuga a Iosefa Samita, Mataio 25:11 [i le Mataio 25:12, vaefaamatalaga a]) e uiga i sauniuniga a nei taupou.)
Faailoa mai se faataitaiga masani se tasi pe lua o le auala e mafai ai e i tatou o tagata o le Ekalesia ona filifili ia avea e faapei o taupou valea. Ia saunia e faasoa atu au faataitaiga i se vaega na talanoaina ia taupou popoto.
Aisea na faamatalaina ai taupou e toalima e popoto?
Aisea na lē faasoaina ai e taupou popoto a latou suauu i taupou valea?
Faailoa mai se faataitaiga se tasi pe lua o le auala e mafai ai e i tatou o tagata o le Ekalesia ona filifili ia avea e faapei o taupou popoto a o tatou sauniuni mo le Afio Mai Faalua. Ia saunia e faasoa atu au faataitaiga i se vaega na talanoaina taupou valea.
A lava loa le taimi na talanoaina ai e tagata aoga a latou autu, valaaulia vaega taitasi e tuufaatasi ma se vaega o e na talanoaina le isi autu e faasoa mai ai faataitaiga na latou faailoaina.
A uma ua lava se taimi mo tagata aoga e faauma ai talanoaga a le vaega lona lua, e mafai ona e valaaulia se tagata aoga se toatasi pe toalua e faasoa mai mea sa latou aoaoina. E mafai ona e tusia pe faaali atu se upumoni latou te faailoa mai, e pei o lenei: E mafai ona ou saunia mo le Afio Mai Faalua o le Alii e ala i le faamalosia o la’u molimau ma avea le Agaga Paia ma o’u taiala.
Ina ia faaiu le vasega, tuu atu i tagata aoga sina taimi e faamaumau ai o latou manatu ma lagona e uiga i le ala e sili ona latou saunia ai i latou lava ma isi mo le Afio Mai Faalua o Iesu Keriso.
Mo Le Isi Taimi
I le āluga o le vaiaso, mafaufau e auina atu i tagata aoga le sāvali lenei po o sau lava sāvali: A o e suesueina le lesona 24 e uiga i le Faamasinoga Mulimuli, mafaufau po o le a se mea e mafai ona e faia e avea ai lenei mea o se taimi mamalu.
