Lesona 21 Anomea a le Faiaoga: Faalogoina o le Siufofoga o le Alii i Aso e Gata Ai
“Lesona 21 Anomea a le Faiaoga: Faalogoina o le Siufofoga o le Alii i Aso e Gata Ai,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 21 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 21 Anomea a le Faiaoga
Faalogoina o le Siufofoga o le Alii i Aso e Gata Ai
“I le lalolagi i ona po nei, sa faaali atu [Iesu Keriso] ma Lona Tama i le taulealea o Iosefa Samita, ma amataina le ‘tisipenisione ua loa ona folafolaina o le atoaga o taimi’” (“O Le Keriso Soifua: O Le Molimau a le Au Aposetolo,” ChurchofJesusChrist.org). I lenei lesona, o le a valaaulia ai tamaiti aoga e mafaufau pe mafai faapefea e le molimau a Iosefa Samita ia Iesu Keriso ona faamalosia lo latou faatuatua ia te Ia. O le a valaaulia foi tamaiti aoga e fuafua pe mafai faapefea ona faateleina lo latou gafatia e faalogo ai i le siufofoga o le Faaola.
Fautuaga mo le Aoao Atu
O Iosefa Samita o le molimau vaaia o le Atua le Tama ma Iesu Keriso.
Faaali atu le saunoaga lea a Peresitene Gordon B. Hinckley:
Ata
Peresitene Gordon B. Hinckley
O le Perofeta o Iosefa Samita o se molimau silisili o le Keriso soifua. (Gordon B. Hinckley, “O Le Mea Ua Faia e le Atua e ala i Lana Auauna o Iosefa!,” Liahona, Ian. 1997, 2)
O le a le mea ua avea ai Iosefa Samita ma “molimau silisili o le Keriso soifua”? (Afai e manaomia, faamanatu i le vasega o le silisili o lona uiga e sili atu i lo isi uma.)
Tusi i luga o le laupapa le faamatalaga lenei: E ala mai i aafiaga patino, na aoao ai Iosefa Samita faapea …
Valaaulia tagata aoga taitasi e filifili ma iloilo a le o le Iosefa Samita—Talafaasolopito 1:16–17, Mataupu Faavae ma Feagaiga 76:22–24, po o le Mataupu Faavae ma Feagaiga 110:2–4, ma vaavaai mo se auala e faauma ai le faamatalaga o i le laupapa. Ona valaaulia lea o tamaiti aoga e faasoa mai a latou faamatalaga ua maea, lea e mafai ona aofia ai upumoni nei: O loo i ai le Tama Faalelagi ma Iesu Keriso; O Iesu Keriso ma le Tama Faalelagi o ni tagata mavaevae; Ua i ai ia Iesu Keriso se tino faamamaluina, ma toetu; E silafia e Iesu Keriso i tatou i o tatou igoa; O Iesu Keriso o le Toatasi na Fanaua e le Tamā; O Iesu Keriso o le Foafoa; O Iesu Keriso o lo tatou Fautua i le Tama.
A o faasoa mai le vasega, mafaufau e fai atu fesili e mafai ona fesoasoani ia i latou e faalolotoina ai lo latou malamalama i upumoni latou te faailoa mai. Mo se faataitaiga:
Aisea e tāua ai ona iloa lenei upumoni e uiga ia Iesu Keriso?
E faapefea e lenei tala ona faamalosia lau molimau e uiga i le Faaola?
E mafai faapefea e le iloaina o lenei upumoni ona faateleina lou manao e mulimuli ia te Ia?
A uma se taimi mo talanoaga, valaaulia se toatasi pe toalua foi o tagata aoga e faasoa mai a latou molimau ia Iosefa Samita o se molimau vaaitino i le Faaola.
E mafai ona tatou faalogo i le siufofoga o le Alii.
Faaleleia o Lo Tatou Aoao Atu ma le Aoaoina
Uunaia ni aafiaga talafeagai e aoao ai. Ina ia fesoasoani i tamaiti aoga ia maua ni aafiaga e sili atu ona anoa e aoao ai, vaavaai mo ni auala e faafesootai ai mea o loo latou aoaoina i o latou tulaga, mea e fiafia i ai, ma fesili. Faaaoga punaoa mai anomea mo sauniuniga ma aafiaga patino o tagata aoga e suesue ai pe na faapefea ona aafia o latou olaga i upumoni o le talalelei.
Fuafua e faasoa le tala faataitai lea po o sau lava tala:
Sa ta’u atu e faifeautalai i lau uo afai e liliu atu o ia i le Alii, e mafai ona ia maua faaaliga ma faalogo i Lona siufofoga. E ui ina manao o ia e talitonu i lenei folafolaga, ae sa ia lagona le popole o le a ia faaseseina ona lava manatu mo Lona siufofoga. Ua ia fesili mai, “E faapefea ona e iloa pe a e faalogo i le siufofoga o le Alii?”
Valaaulia ni nai tamaiti aoga e faamalamalama mai pe faapefea ona latou tali atu. E mafai foi ona e fai i le vasega e faasoa mai isi luitau po o atugaluga latou te feagai i le faalogoina o le siufofoga o le Faaola.
Faamanatu i le vasega sa aoaoina Oliva Kaotui e uiga i le faalogo i le siufofoga o le Faaola ina ua i ai ni ana fesili e uiga i le valaauga faaperofeta o Iosefa Samita. Valaaulia tagata o le vasega e toe faamanatu le Mataupu Faavae ma Feagaiga 6:14–15, 22–23, ma vaavaai mo mea na aoao atu e le Alii ia Oliva Kaotui e uiga i le faalogo i Lona siufofoga.
O le a se mea e mafai ona tatou aoaoina e uiga i le faalogo i le siufofoga o le Alii mai le aafiaga o Oliva? (Atonu e faailoa mai e tagata aoga se upumoni e pei o lenei: E mafai ona tatou faalogo i le siufofoga o le Alii e ala i le Agaga Paia. O le siufofoga o le Faaola e faamalamalamaina o tatou mafaufau ma aumaia ia i tatou le filemu.)
Aisea e tāua ai mo i tatou le saili e lē aunoa e faalogo i le siufofoga o le Faaola—aemaise lava i o tatou aso?
Ua faapefea ona faamanuiaina lou olaga i le faalogo atu i le siufofoga o le Alii?
A tatou taumafai e faalogo—faalogo moni lava—i Lona Alo, o le a taialaina i tatou ia iloa le mea e fai i soo se tulaga. …
A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matuā faia ma le faamoemoe sili i ai. (Russell M. Nelson, “Faalogo ia te Ia,” Liahona, Me 2020, 89.
E mafai ona e faasoa atu se faataitaiga patino o se tasi o auala e te faalogo ai i le siufofoga o le Alii i lou olaga. Pe e mafai foi ona e faaali atu se faataitaiga mai se taitai o le Ekalesia, o loo maua i le faaputuga vitiō “Hear Him” i le Gospel Media (ChurchofJesusChrist.org).
Tuu atu i tagata aoga le pepa e tufa atu lenei:
Faalogo ia te Ia!
O Iesu Keriso ma Lana Talalelei e Faavavau Anomea a le Faiaoga—Lesona 21
Manatu faapea ua tuuina atu ia te oe le avanoa e fatu ai se vitiō puupuu e faaalia ai le ala e te faalogo ai i le siufofoga o le Faaola. Tusi se otootoga puupuu o mea o le a e faasoa atu e tali atu ai i le uunaiga “Pe Faapefea Ona Ou Faalogo ia te Ia.” E mafai ona fesoasoani fesili nei a o e fatuina lau otootoga:
O a ni aafiaga ua fesoasoani ia te oe e malamalama atili ai i le ala e fetalai mai ai le Alii ia te oe?
E mafai faapefea ona e faasoa atu ou manatu ma lagona i se auala o le a faigofie ona malamalama i ai isi?
Mai lau otootoga, fatu se sāvali puupuu (tasi i le lua parakalafa) e mafai ona e faasoa atu i le vasega.
Afai e te manao ai, e mafai ona e mafaufau loloto ma tusifaamaumau mea e te manao e fai e faateleina ai lou gafatia e faalogo ai i le siufofoga o le Faaola.
O Iesu Keriso ma Lana Talalelei e Faavavau Anomea a le Faiaoga—Lesona 21
Ata
pepa e tufa a le faiaoga
A maea se taimi talafeagai, valaaulia nisi o tamaiti aoga e faasoa mai a latou sāvali “Faalogo ia te Ia” i le vasega. Fautuaina tamaiti aoga e faasoa atu foi a latou sāvali “Faalogo ia te Ia” i fafo atu o le vasega. E mafai ona faia lenei mea i se talanoaga faafesagai, valaau i le telefoni, po o se feau tusitusia po o luga o ala o faasalalauga faaagafesootai.
A lava le taimi, mafaufau e valaaulia tagata aoga ia sili atu ona faamoemoeina a latou taumafaiga e faalogo i le Alii. Atonu latou te faaaluina ni nai minute e fuafua ai ma faatulaga pe faapefea ona latou faia lenei mea.
