Lesona 10 Anomea a le Faiaoga: Mulimuli i le Faataitaiga a Iesu Keriso o le Gauai Atu
“Lesona 10 Anomea a le Faiaoga: Mulimuli i le Faataitaiga a Iesu Keriso o le Gauai Atu,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 10 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga
Lesona 10 Anomea a le Faiaoga
O le Mulimuli i le Faataitaiga a Iesu Keriso o le Gauai Atu
Na afio mai Iesu Keriso i le lalolagi e fai le finagalo o Lona Tama ( tagai Ioane 5:19). I le lesona lenei, o le a mafai ai e tagata aoga ona mafaufau pe faapefea ona fesootai le faataitaiga atoatoa a le Faaola o le gauai atu i uiga paia o le lotomaualalo ma le agamalu. O le a mafaufau foi tagata aoga i mea e mafai ona latou faia e faamuamua atoatoa ai le Atua i o latou olaga.
Fautuaga mo le Aoao Atu
E gauai atu Iesu Keriso i le finagalo o le Tama Faalelagi i mea uma.
Mafaufau e faasoa atu le tulaga faataitai lenei:
Ua faatoa valaauina Lucas e avea ma peresitene o le korama a toeaina. Ina ua uma ona talia le valaauga, sa ia fesili atu i le epikopo, “O le a se mea e mafai ona ou faia ia avea ai ma se taitai malosi, se tasi o le a mananao tagata e mulimuli i ai?” E tomanatu le epikopo mo sina taimi ona faapea mai lea, “Ia lotomaualalo ma agamalu.” Ua faafetai Lucas i le epikopo mo lana fautuaga, ae na ia alu ma le popole ina nei avea le lotomaualalo ma le agamalu e ono foliga ai o ia o se taitai vaivai.
O a ni malamalamaaga sese e ono i ai ia Lucas e faatatau i uiga o le lotomaualalo ma le agamalu?
Afai e le amanaia e Lucas le fautuaga a le epikopo, o le a le ituaiga taitai e ono avea ai o ia?
Mafaufau e faaali atu faauigaga nei o le lotomaualalo ma le agamalu mai ia Elder David A. Bednar, ma talanoaina pe faapefea ona fesootai i le gauai atu o o tatou loto i le Atua:
Ata
Elder David A. Bednar
O le lotomaualalo na te faamatalaina lautele le faalagolago atu i le Atua ma le manaoga faifai pea mo Lana taitaiga ma le lagolago. …
O le agamalu e … iloa gofie i le tali atu ma le amiotonu, gauai atu ma le loto i ai, ma le malosi o le amio pulea. (“Agamalu ma Maualalo i le Loto,” Liahona, Me 2018, 32)
Mafaufau e faaali atu se ata o Iesu Keriso o loo tatalo i le Faatoaga o Ketesemane. Valaaulia tagata aoga e faitau le Luka 22:39–44 ma vaavaai mo mea ua aoao mai e lenei aafiaga ia i tatou e uiga i le gauai atu. E mafai foi ona e fesili:
O a isi faataitaiga mai le soifuaga o le Faaola o loo aoao ai i tatou e uiga i le lotomaualalo, agamalu, ma le gauai atu? (Afai o le a fesoasoani ai i tagata aoga, e mafai ona e faaali atu ni ata faaopoopo mai le soifuaga o le Faaola e faatatau i le gauai atu. E mafai foi ona e iloilo ma talanoaina le faamatalaga a Elder David A. Bednar i le vaega 1 o anomea mo sauniuniga.)
O a ni auala ua faamanuiaina ai i tatou uma ona sa gauai atu e Iesu Lona finagalo i le Tama? (E mafai ona e faaali atu le upumoni lenei: O Iesu Keriso na “tuu atu i le finagalo o le Tama i mea uma mai le amataga” (3 Nifae 11:11).)
E faapefea ona faamanuiaina oe ma tagata i lou olaga pe ana faapea e sili atu ona e gauai atu i le finagalo o le Atua? (E mafai ona e valaaulia tagata aoga e faaaoga ni nai minute e faailoa faalilolilo ai ma tusi i lalo se mea se tasi e mafai ona latou faia ina ia gauai atili atu ai i le finagalo o le Atua.)
E ono fesoasoani le toe iloilo faapuupuu o le tulaga faataitai e uiga ia Lucas ma valaaulia tagata aoga e faasoa mai pe faapefea ona faamanuiaina Lucas ma lana korama pe afai na te mulimuli i le fautuaga a le epikopo ina ia avea ma se taitai lotomaualalo ma agamalu.
O tagata o le feagaiga e faamuamua le Atua i o latou olaga.
E mafai e tamaiti aoga ona iloilo le saunoaga a Peresitene Russell M. Nelson i le vaega 3 o anomea mo sauniuniga ma talanoaina puupuu le taua o le upu loto malie. Atonu e te manao e molimau atu faapea e avea i tatou ma nuu o le Alii pe a tatou filifili ma le loto malie e faamuamua le Atua i o tatou olaga.
Faaleleia o Lo Tatou Aoao Atu ma le Aoaoina
Uunaia tagata aoga e faasoa mai mea ua latou aoaoina. A tuuina atu i tagata aoga ni avanoa e faasoa mai ai o latou manatu, lagona, ma uunaiga i isi, e mafai ona fesoasoani ia i latou e faalolotoina ai lo latou lava malamalama, faamalolosia a latou molimau, faateleina lo latou tomai e faamatala ai upumoni o le talalelei, ma faateleina ai lo latou talitonuga e talanoa e uiga i le talalelei i isi faatulagaga.
Ina ia fesoasoani i tagata aoga e mafaufau i auala eseese e mafai ai ona tatou faamuamua le Atua i o tatou olaga, e mafai ona e faaali atu faatonuga nei pe saunia foi i se pepa e tufa atu.
Ia Faamuamua le Atua
O Iesu Keriso ma Lana Talalelei e Faavavau Anomea a le Faiaoga,—Lesona 10
Faaalu ni nai minute e sosoo ai e saunia ai se manatu puupuu e uiga i le gauai atu i le finagalo o le Atua. O lou manatu e tatau ona aofia ai se faataitaiga o le gauai atu mai tusitusiga paia pe mai lou olaga po o le olaga o se tasi e te iloa. E ono aofia ai foi le auala e mafai ona tatou faaaogaina ai lena faataitaiga i o tatou olaga. Mafaufau e faaaoga se tasi o punaoa nei a o e sauniuni:
A uma ua lava se taimi o le vasega e saunia ai, valaaulia i latou e fai ni vaega laiti. O le toatele o le vaega e tatau ona atagia ai le aofaiga o le taimi o totoe i le vasega. O le puupuu o le taimi o totoe, o le laitiiti foi lea o le vaega. O le a fesoasoani lenei mea e faamautinoa ai e mafai e tagata aoga uma ona faasoa mai o latou manatu.
Ina ia uunaia le sauniuniga a le tagata aoga mo le vasega e sosoo ai, mafaufau e auina atu le savali lenei i le aluga o le vaiaso: Na saunoa mai Peresitene Dallin H. Oaks o le Au Peresitene Sili, “O le auai ma le toaaga i se lotu e fesoasoani ia i tatou ia avea ma ni tagata lelei atu ma ni tosinaga lelei atu i olaga o isi” (“O Le Manaomia o se Ekalesia,” Liahona, Nov. 2021, 24). A o e suesue i anomea mo sauniuniga mo le lesona 11, vaavaai mo auala eseese e mafai ai e le auai i le Ekalesia ona faamanuiaina lou olaga ma olaga o lou aiga ma uo.
