Inisitituti
Lesona 24 Anomea a le Faiaoga: Faatuatuaina o Iesu Keriso o lo Tatou Faamasino

“Lesona 24 Anomea a le Faiaoga: Faatuatuaina o Iesu Keriso o lo Tatou Faamasino,” O Iesu Keriso ma Lana Talalelei e Faavavau Anomea a le Faiaoga (2023)

“Lesona 24 Anomea a le Faiaoga,” O Iesu Keriso ma Lana Talalelei e Faavavau Anomea a le Faiaoga

Lesona 24 Anomea a le Faiaoga

Faatuatuaina o Iesu Keriso o lo Tatou Faamasino

I le “O Le Keriso Soifua: O Le Molimau a le Au Aposetolo” tatou te faitau ai, “O le a tatou tutū atu taitoatasi ina ia faamasinoina e Ia [lo tatou Faaola] e tusa ma ā tatou galuega ma manaoga o ō tatou loto.” (ChurchofJesusChrist.org). O lenei lesona o le a fesoasoani i tagata aoga e faamatala pe aisea e mafai ai ona tatou maua le talitonuga atoa ia Iesu Keriso o lo tatou faamasino. O le a latou maua foi se avanoa e iloilo ai mea e mafai ona latou faia e saunia ai mo le Faamasinoga Mulimuli.

Fautuaga mo le Aoao Atu

O Iesu Keriso o lo tatou faamasino.

Faasoa atu le tala faataitai lenei:

Manatu faapea e i ai sau uo ua molia i se solitulafono matuiā. Ua e iloa foi le tagata na aafia i le solitulafono. E te alofa i tagata uma e toalua.

  • Afai e te filifilia se faamasino mo lau uo, o a ni uiga e sili ona e manao e maua e le faamasino?

  • O a ni ou atugaluga pe afai e leai se tasi pe sili atu foi o uiga ua tatou faailoaina? (Mo se faataitaiga, e faapefea pe afai e agaalofa le faamasino ae lē amiotonu pe e amiotonu foi ae lē agaalofa?)

Faamanatu i tagata aoga sa valaaulia e saunia mo le vasega e ala i le faailoa mai o se uiga mai le soifuaga o le Faaola lea e faaalia ai e mafai ona tatou faatuatuaina o Ia e avea ma se faamasino amiotonu. Tuu atu i tagata aoga ni nai minute e iloilo ai le uiga sa latou faailoaina pe, pe a manaomia, e faailoa mai ai se tasi. Ona fai atu lea ia i latou e fai ni vaega toalaiti ma tuu atu ia i latou le pepa lenei.

O Iesu Keriso o “le Faamasino Amiotonu” (2 Timoteo 4:8)

O Iesu Keriso ma Lana Talalelei e Faavavau Anomea a le Faiaoga—Lesona 24

Faitau leotele le Salamo 9:8 ma le 96:11–13. Ona valaaulia lea o tagata taitasi o le vaega e faasoa mai se uiga mai le soifuaga o le Faaola lea e faaalia ai e faamasinoina e Iesu Keriso tagata uma i le amiotonu. A o e faasoa atu uiga, atonu e te manao e talanoaina fesili nei:

  • E faapefea e lenei uiga ona aafia ai le ala e faamasino ai i tatou e Iesu Keriso?

  • O le a le auala e faateleina ai e lenei uiga lou faatuatuaina e agavaa o le Faaola e avea ai ma ou faamasino?

A uma ona faailoa mai uiga patino, talanoa pe faapefea ona ese Iesu Keriso mai tagata faamasino uma. (Mafaufau e iloilo faamatalaga mai ia Peresitene Dallin H. Oaks ma Elder Robert D. Hales i le vaega 1 o anomea mo sauniuniga.) E mafai foi ona outou talanoaina pe aisea e tāua ai le tuuina mai e le Faaola o nei uiga uma i le avea ai ma o tatou faamasino.

© 2023 Puletaofia e le Intellectual Reserve, Inc. Ua taofia aiā tatau uma.

O Iesu Keriso o “le Faamasino Amiotonu” (2 Timoteo 4:8)

O Iesu Keriso ma Lana Talalelei e Faavavau Anomea a le Faiaoga—Lesona 24

Ata
O Iesu Keriso o le Faamasino Amiotonu pepa e tufa atu

A uma ua lava se taimi mo talanoaga, e mafai ona e valaaulia ni tagata aoga e faasoa mai o latou lagona e uiga i le avea ai o Iesu Keriso ma o latou faamasino.

O le a faamasinoina i tatou e Iesu Keriso e ala i a tatou galuega ma manaoga o ō tatou loto.

Faaleleia o Lo Tatou Aoao Atu ma le Aoaoina Mai

Ia ta’u manino mai mataupu faavae moni. Na aoao mai Elder B. H. Roberts, o lē sa avea muamua ma Fitugafulu, “Ina ia iloa, e tatau ona ta’u atu le mea moni ma o le manino ma le atoatoa o le faamatalaga, o le sili atu foi lea o le avanoa o le a maua e le Agaga Paia e molimau atu ai i agaga o tagata e moni le galuega.” (i le James E. Faust, “What I Want My Son to Know before He Leaves on His Mission,” Ensign, Me 1996, 41). Tuu atu i tagata aoga ni avanoa e faailoa ma faamatala mai ai mataupu faavae moni o loo maua i tusitusiga paia ma upu a perofeta o aso nei.

Valaaulia tagata aoga e iloilo filemu le Faaaliga 20:12 ma le Mataupu Faavae ma Feagaiga 137:9 ma faamaumau se upumoni e uiga i le ala o le a faamasinoina ai i tatou. Fai atu i ni nai tagata aoga e faasoa mai le upumoni na latou mauaina. I le faaaogaina o manatu o tagata aoga, atonu e te manao e tusi i luga o le laupapa se upumoni e talitutusa ma lenei: O le a taitasi i tatou ma tutū i luma o le Alii ma faamasinoina e tusa ai ma a tatou galuega ma manaoga o ō tatou loto. Ina ia faalolotoina le malamalama o tagata aoga, e mafai ona e fai atu se tasi pe sili atu o fesili nei:

  • Aisea e te manatu ai e tāua a tatou galuega i le Faamasinoga Mulimuli? (Ta’u atu o galuega e mafai ona aofia ai le tausia o poloaiga, mauaina o sauniga, faamamaluina o feagaiga, salamo, ma le auauna atu i isi.)

  • Aisea e te manatu ai o le a faamasinoina foi i tatou i o tatou manatu ma manaoga o ō tatou loto? (Atonu e te manao e faasoa atu le saunoaga lenei a Peresitene Oaks: “O manao tatou te faatinoina e iloa ai lo tatou suiga, o mea ua tatou ausia ma tagata e avea ai i tatou” [“Manao,” Liahona, Me 2011, 42].)

  • Aisea e tāua ai le iloilo e lē aunoa pe faapefea e o tatou manaoga, upu, ma faatinoga ona faatosinaina mea ua avea ai i tatou? (Mafaufau e toe faamanatu le saunoaga a Peresitene Oaks i le vaega 2 o anomea mo sauniuniga.)

Faamanatu i tagata aoga na fai e Alema le Itiiti ni fesili loloto e mafai ona fesoasoani ia i tatou e iloilo ai po o le a le ituaiga tagata e avea ai i tatou. Valaaulia tagata aoga e toe iloilo le Alema 5:15–16, 19, 26–27 ma mafaufau ia lē itiiti ifo ma le tasi se fesili e sili ona fesootai i o latou olaga. A uma ona tuu atu ia lava se taimi mo manatunatuga filemu, uuna’ia se tagata aoga se toatasi pe toalua e faasoa mai pe na faapefea ona fesoasoani ae pe mafai ona fesoasoani le faaavanoaina o se taimi mo le mafaufau loloto patino e avea atili ai e faapei o le Faaola.

E pei ona fautuaina mai e Alema, valaaulia tagata aoga e vaai faalemafaufau ia i latou lava o tutū i luma o le Atua ina ia faamasinoina.

  • O le a sou lagona i lenei taimi? Aisea?

  • O ai e sili ona e manao e faatasi ma oe?

  • Aisea e tāua ai le malamalama faapea e lē gata i le avea ma o tatou faamasino, o Iesu Keriso foi o lo tatou Fautua i le Tama? (Atonu e te iloiloina le uiga faapea o Iesu Keriso o lo tatou fautua [tagai vaega 2 o anomea mo sauniuniga].)

Faitau leotele le Mataupu Faavae ma Feagaiga 45:3–5, ma valaaulia tagata aoga e vaai faalemafaufau o loo aioi patino atu Iesu Keriso mo i latou.

  • Faamata o a ni ou lagona i le faalogo atu ia Iesu Keriso o aioi atu mo lau tagi i luma o le Tama Faalelagi? (Atonu e te manao e toe iloilo le upusii a Elder Dale G. Renlund i le vaega 2 o anomea mo sauniuniga ina ia mautinoa ai ua malamalama tagata aoga e lē o tetee le Faaola i le finagalo o le Tama i le avea ma o tatou Fautua.)

  • E faapefea e le malamalama ma le taliaina o le matafaioi a le Faaola i le avea ai ma o tatou Fautua ona aumaia le faamoemoe i se tasi ua manatu o le a lē lava lona lelei e toe fo’i atu ai i le afioaga o le Atua?

  • O le a se mea e mafai ona e faia i le asō e faaali atu ai i le Alii e te manao ia te Ia e avea ma ou Fautua?

Atonu e te molimau atu o le a lē gata ina fautua mai le Alii mo i tatou i le Faamasinoga Mulimuli ae ua Ia naunau foi e avea ma o tatou Fautua i aso nei (tagai Mataupu Faavae ma Feagaiga 29:5–6). O le a Ia aioi atu mo la tatou tagi a o tatou sailia Lana fesoasoani. E mafai foi ona e faaali atu le vitiō “Jesus Christ Is Our Advocate” (0:48) ma Elder D. Todd Christofferson o le Korama a Aposetolo e Toasefululua.

Mo Le Isi Taimi

Ina ia uuna’ia tagata aoga e faitau anomea mo sauniuniga a o le’i oo i le isi vasega e sosoo ai, mafaufau e auina atu se sāvali e talitutusa ma lenei: A o e suesue i anomea mo sauniuniga mo le lesona 25, fesili ifo ia te oe lava: O le a se aafiaga o lo’u avea ai ma soo i aso taitasi i lo’u taunuuga e faavavau?