1 Ma o lenei sa oo ina valoia e Samuelu, le sa Lamanā, i ni isi mea tetele sili atu e le mafai ona tusia.

2 Ma faauta sa fai atu o ia ia te i latou: Faauta, ou te tuu atu ia te outou se faailoga; ona toe lima ni tausaga, ma faauta, ona afio mai ai lea le Alo o le Atua e togiola i latou uma o e e faatuatua i lona suafa.

3 Ma faauta, o le mea lenei ou te tuu atu ia te outou mo se faailoga i le taimi o lona afio mai; aua faauta, o le a i ai malamalama pupula tele i le lagi, e oo ina leai se pogisa i le po ae lei afio mai o ia, e oo ina foliga mai i le tagata e peiseai o le ao.

4 O lea, o le a i ai se ao e tasi ma se po ma se ao, e peiseai ua tasi le ao ma ua leai se po; ma o lenei mea o le a avea mo se faailoga ia te outou; ona o le a outou iloa le oso ae o le la ma lona goto ifo foi; o lea o le a latou iloa mautinoa ai o le a i ai ni ao e lua ma se po; ae ui i lea o le a le pogisa le po; ma o le po lea ae lei soifua mai o ia.

5 Ma faauta, o le a i ai se fetu fou e oso mai, o se ituaiga o fetu tou te lei vaai lava i ai; ma o lea foi o le a avea mo se faailoga ia te outou.

6 Ma faauta ua le ona pau lea, o le a tele faailoga ma mea ofoofogia o le a i ai i le lagi.

7 Ma o le a oo mai o le a outou meia uma, ma taufaiofo, e oo ina outou pa’u’ū ifo i le eleele.

8 Ma o le a oo mai, o soo se tasi e talitonu i le Alo o le Atua, o ia lava lea o le a mauaina le ola faavavau.

9 Ma faauta, ua faapea ona poloaiina o au e le Alii, e ala i lana agelu, ia ou sau ma ta’u atu lenei mea ia te outou; ioe, ua ia poloaiina au e tatau ona ou vavalo atu nei mea ia te outou; ioe, na ia fetalai mai ia te au: Alaga atu i lenei nuu, ia salamo ma saunia le ala o le Alii.

10 Ma o lenei, ona o au o se sa Lamanā, ma ua ou tautala atu ia te outou upu ia na poloaiina ai au e le Alii, ma talu ai ona ua faigata e faasaga ia te outou, ua outou feita mai ia te au ma outou saili e faaumatia au, ma ua outou tuli ese au i fafo mai totonu ia te outou.

11 Ma o le a outou faalogo i au upu, ona, o le faamoemoe lenei ua ou sau ai i luga o pa o lenei aai, ina ia mafai ona outou faalogo ma iloa faamasinoga a le Atua ia ua faatalitali mai ia te outou ona o a outou amioletonu, ma ina ia outou iloa foi tuutuuga o le salamo.

12 Ma ina ia mafai foi ona outou iloa e uiga i le afio mai o Iesu Keriso, le Alo o le Atua, o le Tamā o le lagi ma le lalolagi, o le Foafoa o mea uma mai le amataga; ma ina ia mafai ona outou iloa e uiga i faailoga o lona afio mai, i le faamoemoe ia mafai ona outou talitonu ai i lona suafa.

13 Ma afai tou te talitonu i lona suafa o le a outou salamo ia outou agasala uma, ina ia mafai ai ona outou maua o se faamagaloga o a outou agasala e ala i ana galuega.

14 Ma faauta, ou te toe avatu se tasi faailoga ia te outou, ioe, o se faailoga o lona maliu.

15 Aua faauta, e tatau lava ona maliu o ia, ina ia mafai ona oo mai o le faaolataga; ioe, e ao ia te ia ma e tatau ona maliu o ia, e aumai ai le toetutu mai o e ua oti, ina ia mafai ai ona aumai o tagata i luma o le Alii.

16 Ioe, faauta, o lenei maliu e aumai ai le toetutu, ma togiola ai tagata uma mai le oti muamua—le oti faaleagaga lena; ona ua vavae ese tagata uma, i le pa’ū o Atamu, mai luma o le Alii, ma ua faapea ua feoti, e faatatau i mea faaletino ma mea faaleagaga.

17 Ae faauta, o le toetu mai o Keriso ua togiolaina ai tagata, ioe, o tagata uma, ma toe aumai ai i latou i luma o le Alii.

18 Ioe, ma ua faataunuu ai le tuutuuga o le salamo, o soo se tasi e salamo o le a le tatuuina i lalo ma lafoina i le afi; ae o soo se tasi e le salamo o le a tatuuina i lalo ma lafoina i le afi; ma toe oo mai ai lea i o latou luga se oti faaleagaga, ioe, o se oti faalua lea, ona ua toe vavae ese i latou mai mea e faatatau i le amiotonu.

19 O lea ia outou salamo ai, ia outou salamo, nei o outou tuu atu outou lava i lalo o le faasalaga i lo outou iloa o nei mea a ua le faia, ma aumai ai outou i lalo i lenei oti faalua.

20 Ae faauta, e pei ona ou fai atu ia te outou e uiga i se tasi faailoga, o se faailoga o lona maliu, faauta, i lena aso o le a mafatia ai o ia i le oti, o le a faapouliuligia ai le la ma musu e tuu mai lona malamalama ia te outou; ma faapea foi le masina ma fetu; ma o le a leai se malamalama i luga o le fogaeleele lenei, mai lava i le taimi o le a mafatia ai o ia i le oti, mo le va o aso e tolu, e oo atu i le taimi o le a toetu mai ai o ia mai le oti.

21 Ioe, i le taimi o le a to atu ai e ia le agaga, o le a i ai faititili ma uila mo le va o itula e tele, ma o le a luluina eleele ma gatete; ma o papa o loo i ai nei i luga o lenei fogaeleele, ia o loo i luga ma lalo o le eleele, ia ua outou iloa i le taimi nei ua malo, po o sona vaega tele o se papa malo e tasi, o le a nutililiiina;

22 Ioe, o le a vaeluaina i latou; ma o le a maua i taimi uma mai i le taimi lena i mavaevae ma taetaei, ma i nutigamaa i luga o le fogaeleele atoa, ioe, e faapea i luga ma lalo o le eleele.

23 Ma faauta, o le a i ai afā tetele, ma o le a tele mauga o i ai o le a soloia maualalalo, e pei o se vanu, ma e i ai nofoaga e tele ia ua ta’ua nei o vanu o le a avea ma mauga, o le a maualuluga lava.

24 Ma e tele aualatetele o le a mavaevae, ma e tele aai o le a tuufua.

25 Ma e tele tuugamau o le a lagaina, ma o le a latou tatala mai le toatele o o latou tagata oti; ma e toatele le au paia o le a faaali mai i le toatele.

26 Ma faauta, sa faapea ona fetalai mai o le agelu ia te au; ona sa ia fetalai mai ia te au o le a i ai faititili ma uila mo le va o itula e tele.

27 Ma sa ia fetalai mai ia te au faapea a o i ai pea le faititili ma le uila, ma le afā, o le a oo mai ia mea, ma o le a ufitia le eleele atoa i le pogisa mo le va o aso e tolu.

28 Ma sa fetalai mai le agelu ia te au e toatele o le a vaai i mea e sili atu i lo nei, i le faamoemoe ia mafai ai ona latou talitonu o le a faataunuuina nei faailoga ma nei mea ofoofogia i luga o le laueleele atoa lenei, i le faamoemoe ia leai se pogai mo le le talitonu i totonu o le fanauga a tagata—

29 Ma ua faia nei mea i le faamoemoe ia mafai ai ona faaolaina o soo se tasi e talitonu, ma ina ia mafai ai ona oo mai i luga o soo se tasi o i latou e le talitonu, se faamasinoga amiotonu e ono oo mai i o latou luga; o lenei foi afai e tausalaina i latou, ua latou aumai i o latou lava luga lo latou lava tausalaga.

30 Ma o lenei ia outou manatua, ia outou manatua, o’u uso e, o soo se tasi e fano, e fano ia te ia lava; ma o soo se tasi na te faia le amioletonu, e faia e ia ia te ia lava; aua faauta, ua outou saoloto; ua faatagaina outou tou te fai mo outou lava; aua faauta, ua tuuina mai e le Atua ia te outou se malamalama ma ua ia faia ia outou saoloto.

31 Ua ia tuuina mai ia te outou ia mafai ona outou iloa o le lelei mai le leaga, ma ua ia tuuina mai ia te outou ia mafai ona outou filifili le ola po o le oti; ma e mafai ona outou faia le lelei ma toefuataia outou i le mea ua lelei, pe toefuatai mai le mea lelei ia te outou; pe mafai foi ona outou faia le leaga, ma toefuatai mai le mea ua leaga ia te outou.