Iunite 14: Aso 3

Mosaea 28–29

Folasaga

Ina ua uma lo latou liliuga, sa lagona e atalii o Mosaea se naunau malosi e talai at ui le talalelei i sa Lamana. Sa lagolagoina e le Tupu o Mosaea le latou faaiuga, peitai na tuua ai o ia e aunoa ma se tasi e sui ia te ia i lona nofoalii ma se tagata e vaaia faamaumauga o tusitusiga paia. Sa ia tuuina atu ia Alema (le atalii o Alema) le tiutetauave mo faamaumauga. Nai lo o le tofia o se isi tupu, sa ia faavaeina ai se faiga o faamasino o se ituaiga o faigamalo fou.

Mosaea ma ona atalii

Mosaea 28:1–9

E toalua atalii o Mosaea na mananao e talai at ui i sa Lamana

I talane o faamatalaga o loo i lalo, faatulaga ai lou manao i eria nei. Faaaoga se fuafaatatau o le 1 i le 10 (1 e faailoa ai le “leai se manao,” ae o le 10 e iloa ai se “manao matuai malosi”).

• E i ai so’u manao faamaoni e fesoasoani atu i isi ia maua le fiafia e faavavau.

• Ou te naunau e ositaulaga e fesoasoani atu i isi.

• E i ai lo’u manao e faasoa atu le talalelei i isi.

• Afai o oe o se alii talavou, iloilo lou manao e fai se misiona talai. (Afai o oe o se tamaitai talavou, e mafai foi ona e filifili e iloilo lou manao.)

Toe faamanatu le Mosaea 27:8–10, ma faailoa pe o le a le faatulagaga o Alema ma atalii o Mosaea i faamatalaga o loo i luga a o le’i tupu lo latou liliuga.

Ia faitau la le Mosaea 28:1–3, ma faailoa pe na faapefea ona sui ia atalii o Mosaea i eria ua faailoa atu i luga. A o e faitau, manatua o le upu fano e faatatau i le leiloa faaleagaga.

Tusi au tali i fesili nei:

O ai na mananao atalii o Mosaea e faasoa i ai le talalelei?

Mai mea ua e suesueina i le Tusi a Mamona e tau mai i lenei, o a ni faigata po o ni tulaga lamatia e ono oo i ai atalii o Mosaea i se misiona i sa Lamana?

Faitau le Mosaea 28:4, ma fuafua pe faapefea ona e toe faamatalaina i a oe lava upu. Mataua le ala na faatosina ai e le liliuga o atalii o Mosaea lo latou manao e faasoa atu le talalelei. I le Mosaea 28:1–4 ua tatou iloa ai le mataupu faavae: A o faasolo loloto lo tatou liua, e faateleina foi lo tatou manao e faasoa atu le talalelei.

Faitau le faamatalaga lenei mai ia Elder Dallin H. Oaks o le Korama a Aposetolo e Toasefululua (atonu e te manao e tusi i le avanoa i autafa o au tusitusiga paia i autafa o le Mosaea 28:1–4): “O le malosi o lo tatou manao e faasoa atu le talalelei o se faailoaga lea o le maualuga o lo tatou liua patino” (“Sharing the Gospel,” Ensign, Nov. 2001, 7).

I le fuaiupu muamua o le Mosaea 28:4, faailoga le ala na faatosina ai atalii o Mosaea i lo latou manao e faasoa atu le talalelei. Ia matau o le Agaga o le Alii ua i ai se matafaioi taua i le faateleina o lo tatou manao e faasoa atu le talalelei.

1. Tali se tasi o fesili nei, i lau api talaaga mo le suesueina o tusitusiga paia:

   1. O faapefea ona faateleina lou manao e faasoa atu le talalelei a o e faamalosia lau molimau?

   2. O a ni aafiaga o lou olaga ua taitai atu ai oe i le manao e faasoa atu le talalelei i isi?

   3. Afai e te le o lagonaina o i ai sou manao malosi e faasoa atu le talalelei i le taimi lenei, o le a se mea e mafai ona e faia e faamalosia ai lena manao? (Faitau le Alema 17:2–3.)

Faatatauina o Mataupu Faavae o le Talalelei i Tulaga e Suesue Ai

A e faatatauina se mataupu faavae o le talalelei i tulaga masani o le olaga, e mafai ona e iloiloina lelei le mataupu faavae ma faigofie ona iloa lona taua i lou olaga. O le tele o le taumafaiga e te tuuina i le tali faamaoni atu i se tulaga e suesue ai, o le sili foi lena o le aoga o le a i ai i le faagasologa o lou aoaoina.

2. Mafaufau e faapea o se alii talavou o se tagata o le Ekalesia ae e itiiti pe leai foi se manao e fai se misiona. I lau api talaaga mo le suesueina o tusitusiga paia, tusi atu se tusi ia te ia, ma fautua i ai le mea e mafai ona ia faia e faateleina ai lona manao e faasoa atu le talalelei. Atonu e te manao e faamatala i ai le mea na faalolotoina ai lou liua i le talalelei a Iesu Keriso ma fautua atu ni gaoioiga po o ni aafiaga faapena mo lenei atalii talavou. Ia manatua a o e tusia, o le liliuga faateleina o le a oo atu ai i se faateleina o le manao e faasoa atu le talalelei i isi.

A o faaauau ona e suesue i le Mosaea 28, mafaufau po o a ni ou lagona pe afai e manao se tasi e te alofa i ai e nonofo faatasi ma se nuu e feita i tagata o e le pei o i latou. Faitau le Mosaea 28:5–9, ma faailoa mai pe aisea na tuu atu ai e Mosaea ia ona atalii e o i se misiona lamatia faapena. I le tusi o Alema, o le a e aoao ai e uiga i le “toatele [o e] o le a talitonu ia latou upu” (Mosaea 28:7)—o le faitau afe o sa Lamana o e na liliu mai o se taunuuga o taumafaiga a atalii o Mosaea.

Mosaea 28:10–20

Ua faaliliu e Mosaea ia papatusi a sa Iareto ma tuu atu uma faamaumauga sa ia teuina ia Alema

O le vaega o totoe o le Mosaea 28 o loo tusia ai e faapea, ua toeaina le Tupu o Mosaea ma lagona le tatau ona filifili o le tagata e sosoo ai e vaaia ia faamaumauga paia a o le’i oti o ia. Mo augatupulaga e lua na muamua atu, sa tuu atu ai e le tupu ia papatusi i le tupu na sosoo ai. Ae ona na o atalii o le Tupu o Mosaea i misiona, sa leai ai sona atalii e fai mo ia le nofoalii ma o lea sa leai ai se tagata e vaaia ia faamaumauga. Na aofia ai i totonu o faamaumauga nei ia papatusi a sa Iareto, lea na faaliliuina e Mosaea e ala i le mana o le Atua (tagai Mosaea 28:11–19).

palealii

papatusi auro

Afai e te filifilia se tasi e vaaia faamaumauga paia, o a ni uiga o le a e manao ia i ai i lena tagata?

Faamatala po o a ni ou lagona pe afai e filifili e se tasi oe e vaaia ia papatusi.

Faitau le Mosaea 28:20, ma vaai mo le igoa o le tagata na filifilia e Mosaea e vaaia papatusi.

3. Tusi i lau api talaaga mo le suesueina o tusitusiga paia, le aoaoga ua aoao ai oe e le faaiuga a le Tupu o Mosaea e uiga i le suiga i le loto o Alema. (Ina ia tali le fesili lenei, atonu e te manao e toe faamanatu amioga na i ai muamua a Alema, o loo tusia i le Mosaea 27.) Ma le isi, faamatala le ala e ono tuu atu ai e le faatuatuaina e Mosaea o Alema le faamoemoe ia i latou o e salamo.

Mosaea 29

Sa filifili e le nuu o Mosaea se faatulagaga o faamasino e avea o se faigamalo fou.

O Alema a o avea ma faamasino

E pei ona tusia i le Mosaea 29, sa fuafuaina e le Tupu o Mosaea ia le toe taitai le faigamalo a sa Nifae e se tupu, ae e ala i se faatulagaga o faamasino. Faitau ma faatusatusa le Mosaea 23:7–8 ma le Mosaea 29:13, 16–18. E tusa ai ma nei mau, o a tulaga po o itu e avea ai se faigamalo faatupu (e taitaiina e se tupu po o se tupu tamaitai) o se ituaiga faigamalo lelei? O le a le mea na fautuaina ai e Mosaea ia sa Nifae e faasaga i le faaauauina o a latou faigamalo faatupu?

Faitau le Mosaea 29:11, 25, ma li’o ia tali nei e faalia ai le mea na fai atu ai Mosaea i le ala e tatau ona faamasino ai e faamasino le nuu: (a) ma le alofa mutimutivale tele, (e) e tusa ma tulafono, (i) e tusa ma poloaiga a le Atua, (o) ma le lotomau.

Faitau le Mosaea 29:26, 30, 33–34, 37–38, ma vaai i le matafaioi o tagata i le ituaiga faigamalo fou lea na fuafuaina e le Tupu o Mosaea.

4. Tusi i lau api talaaga mo le suesueina o tusitusiga paia, le mafuaaga ua e talitonu ai e taua i tagatanuu uma o se atunuu ona “tauave lana vaega” i le tautuaina o lona atanuu (Mosaea 29:34).

Sa tofia Alema e fai ma uluai faamasino sili, ma sa ia faataunuuina lona tiutetauave i le amiotonu (tagai Mosaea 29:41–43).

I au lava upu, tusi se mataupu faavae se tasi ua e aoaoina mai le Mosaea 29:

O le tasi mataupu faavae o loo aoao mai i le mataupu lenei o le: Ua tofu tagata uma ma se tiute e lagolago i tulafono ma taitai amiotonu.

5. Tusi i lau api talaaga mo le suesueina o tusitusiga paia, se auala se tasi e mafai ona e lagolagoina ai tulafono ma taitai amiotonu i lou atunuu.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mosaea28–29 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: