Iunite 14: Aso 1

Mosaea 26

Folasaga

E pei ona tusia i le Mosaea 26, o nisi o sa Nifae le talitonu o le tupulaga faia’e na faatosinaina tagata o le Ekalesia i upu taufaasee ma taitai ai i latou i le agasala. Sa tatalo Alema e fia iloa le ala e faamasino ai nei tagata o le ekalesia e tusa ai ma le finagalo o le Atua. Sa faaali mai e le Alii ia Alema le ala e tuu ai i tagata o le Ekalesia ia tali atu mo a latou agasala. Sa faataatia mai foi e le Alii ia tulaga mo le salamo. Sa iloa e Alema le naunau o le Atua e faamagalo i latou o e salamao faamaoni.

Mosaea 26:1–6

O le toatele o le tupulaga faia’e e le talitonu, ma latou faia agasala

Faaalu se taimi e mafaufau ai e uiga i le fesili lenei: Aisea e te manatu ai o nisi o tagata talavou e le o i ai ni molimau pe e le o i ai ni molimau malolosi, e tusa lava pe ua latou faalogo i perofeta ma ua aoaoina e o latou matua?

Mosaea 26 o loo tuuina mai ai se malamalamaga i lenei fesili. Suesue i fuaiupu ma tali fesili i le siata lenei (tusi au tali i le tusi lesona):

Mosaea 26:1–2	O a mea e tolu na le talitonu i ai le toatele o le tupulaga faia’e?
Mosaea 26:3	E mafai faapefea e le faitauina o tusitusiga paia po o le faalogo i perofeta ma se uiga faaalia o le le talitonu ona tatou aafia ai?
Mosaea 26:4	O le a se mafuaaga autu e tasi sa le i ai ai se faatuatua o nei tagata i le Faaola ma auai i le Ekalesia?
Tusi se mataupu faavae se tasi na e aoaoina mai le suesueina o nei fuaiupu:

O le fasifuaitau “uputuu a o latou tamā” i le Mosaea 26:1 e faatatau i upumoni o le talalelei na tuufaasolo mai i lalo mai tupulaga na muamua atu; o le fasifuaitau e mafai i nisi taimi ona faatatau i manatu sese (mo se faataitaiga, tagai Alema 9:16). O le tasi o mataupu faavae o loo aoaoina i le Mosaea 26:1–4 o le: O le naunau e talitonu ma taumafaiga patino e manaomia e atinae ai e molimau.

Faitau le faamatalaga lenei mai ia Peresitene Henry B. Eyring o le Au Peresitene Sili, ma faailoga vasevase po o a faatinoga e manaomia ia maua ma faatumauina ai se molimau:

“O le molimau e manaomia ai le faafailelega a le tatalo o le faatuatua, o le galala mo le upu a le Atua i tusitusiga paia, ma le usiusitai i le upumoni ua tatou mauaina. E i ai le tulaga matautia i le faatalale i le tatalo. E i ai le tulaga matautia i a tatou molimau i le na o le suesue ma le faitauina o tusitusiga paia ae le o i ai le loto. O ni meaai ia e tatau ai mo a tatou molimau. …

“O le taumamafa i le Upu a le Atua, tatalo ma le loto, ma le usiusitai i poloaiga a le Alii e tatau ona faaaogaina tutusa ma ia faifai pea mo lau molimau ina ia ola ai ma manuia” (“O Se Molimau Ola,” Ensign po o le Liahona, Me 2011, 127).

Ia manatua o le vaitaimi o Alema, o i latou e i le tupulaga faia’e sa le’i faia mea na ta’ua mai e Peresitene Eyring.

1. Tali fesili nei, i lau api talaaga mo le suesueina o tusitusiga paia:

   1. I lou aafiaga, aisea e taua ai le i ai o se uiga talitonu a o e tatalo, faitau tusitusiga paia, ma taumafai e usitai i poloaiga?

   2. Faamatala e uiga i se aafiaga na faamalosia ai lau molimau ona o le faamaoni o tatalo, faitauina o tusitusiga paia, po o le usiusitai i le poloaiga.

Mafaufau mo se taimi pe na e vaai muamua i ni tagata e leai ni molimau o le talaelei o faatosinaina tagata o le Ekalesia. Faitau le Mosaea 26:5–6, ma vaai pe na faapefea ona faatosina e le au le talitonu i latou e i ai i le Ekalesia.

A o faaauau au suesuega, atonu o le a aoga le iloa o le uiga o le faamatalaga lenei mai le Mosaea 26:6: “[O] latou o e na faia le agasala, o e sa i ai i le Ekalesia, ona aoaia [lapatai ma faasa’o] e le ekalesia.” O le uiga o lenei mea sa alagatatau mo tagata tetee o le Ekalesia ona faamasinoina e tusa ai ma a latou agasala ma tuu i ai le avanoa e salamo ai.

Mosaea 26:7–39

Ua fesili Alema pe faapefea ona faamasino i latou e faia agasala

tamaitai talavou ma le epikopo i lana kesi

Ina ia saunia e suesue le vaega o totoe o le Mosaea 26, faapea la o oe o se epikopo o se uarota o loo i ai ni isi o le au paia o e na solia ni agasala matuia. I le avea ai ma se epikopo, ua tofia oe e le Alii e faamasino nei tagata ma fesoaosoani ia latou salamo. Mafaufau pe faapefea ona e taulimaina nei tagata ma o le a foi le auala sili ona lelei e te fesoasoani ai ia i latou.

O se tulaga faapenei sa faigata mo Alema. E pei foi o taitai perisitua faamaonia i aso nei, sa ia te ia le tiutetauave e fesoasoani ai i tagata o le Ekalesia o e na solia ni tulafono matuia ia salamo, maua le faamagaloina, ma toe foi i se tulaga malosi ma faamamaluina i le Ekalesia. Faitau le Mosaea 26:7–14, ma vaai pe o le a le tali a Alema i lenei tulaga ma le mea na ia faia e maua ai se tali mai le Alii.

2. Tusi i lau api talaaga mo le suesueina o tusitusiga paia, le mafuaaga e taua ai ia i tatou ona iloa, o taitai perisitua e sailia ma maua mai le taitaiga a le Alii pe a fesoasoani atu ia i latou o e ua agasala.

Ia manatua sa avea Alema ma se faitaulaga i le Tupu amioleaga o Noa a o le’i liua o ia. Faitau le Mosaea 26:15–18, ma faailoa le mea na fai e Alema ma lona nuu ia toe foi mai ai i le Alii ma faamanuiaga na faasafua mai e le Alii ia i latou.

3. Faitau le Mosaea 26:29–30. Ona tali atu lea i le tasi po o mea uma nei:

   1. Faamatala pe aisea e te manatu ai o mataupu faavae nei e taua ona malamalama i ai tagata uma, e aofia ai soo se tasi o e atonu na solia se agasala matuia: O le a faamagalo e le Alii i latou o e salamo ma le faamaoni atoatoa o o latou loto.

   2. Tusi lau molimau e uiga i le mataupu faavae lenei: O le a faamagalo e le Alii i latou o e salamo ma le faamaoni atoatoa o o latou loto.

Ina ua uma ona tatalo Alema mo le taitaiga i le ala e fesoasoani ai i tagata o le Ekalesia o e na solia ni tulafono matuia, sa tuuina mai e le Alii ia te ia ni faatonuga. E tatau ona ia tuuina atu i le au paia le avanoa e salamo ai, ae afai na latou le salamo, sa le faitaulia i latou faatasi ma tagata o le Alii. O nei faatonuga ua tuuina mai ai ni aoaoga manino i le mataupu faavae o le salamo. Faitau le Mosaea 26:21–31, ma vaavaai mo ni aoaoga manino e faatatau i le salamo.

4. Ina ia fesoasoani i lou suesueina o le mea na e faitauina i nei fuaiupu, tali ni galuega se lua pe sili atu i lau api talaaga mo le suesueina o tusitusiga paia:

   1. E faapefea ona e otootoina le fetalaiga a le Faaola o loo i le Mosaea 26:23? Aisea e te manatu ai e taua ona tatou iloa na totogi e le Faaola lava Ia a tatou agasala?

   2. O a fasifuaitau i le Mosaea 26:21–31 o ta’u mai ai le talitonuina ma le faatuatuaina e le Faaola o Alema i le avea ai o se taitai perisitua? E mafai faapefea i le i ai o le fesoasoani a se taitai perisitua ona lagolagoina i latou o e e tauivi ma agasala faigata po o faaosoosoga?

   3. O le a sou manatu i le uiga o le ia salamo “ma le faamaoni o lona loto”? Mosaea 26:29.

   4. Aisea e te manatu e tatau ai ona tatou faamagalo atu i isi ia maua ai le faamagaloga a le Alii? (tagai Mosaea 26:31).

I au lava upu, tusi se mataupu faavae na e tau i ai i le Mosaea 26:21–31:

E ui ina atonu na e maua se mataupu faavae e ese mai, pe atonu foi na e faaaogaina ni upu e ese mai, ae o nisi nei o faataitaiga o mataupu faavae o loo aoao mai i le Mosaea 26:21–31:

• O epikopo ma peresitene o paranesi e fai ma sui o le Alii e fesoasoani mai ia i tatou ia salamo ma maua le faamagaloga.

• O le ta’uta’u atu o a tatou agasala e oo atu ai i le faamagaloina. (O agasala uma e tatau ona ta’uta’u atu i le Atua, ae o agasala matuia e tatau ona ta’uta’u atu i se taitai perisitua o lē e mafai ona fesoasoani i le faagasologa o le salamo.)

• E tatau ona tatou faamagalo atu i isi ina ia maua ai le faamagaloga a le Alii.

5. Ina ia fesoasoani ia te oe e suesue nei mataupu faavae, faitau ia tulaga nei e suesue ai. Filifili se tulaga se tasi e suesue ai ma tusi i lau api talaaga mo le suesueina o tusitusiga paia, pe mafai faapefea e fuaiupu ma mataupu faavae sa e suesueina nei ona fesoasoni i tagata i tulaga na faamatalaina:

   1. Ua soli e se tamaitai talavou se agasala matuia, ae e fefe o ia e talanoa atu i lona epikopo.

   2. O loo i ai le manao o se alii talavou e salamo, ae na te le iloa pe faapefea ona fai.

   3. Ua toe fai e se tamaitai talavou se agasala sa ia soliina muamua, ma ua popole o le a le toe faamagaloina o ia e le Alii.

   4. Ua filifil se alii talavou e salamo, ae e musu e faamagalo se isi sa faatiga ia te ia.

6. Filifili se mataupu faavae se tasi o mataupu faavae na faailoaina i lenei lesona ma mafaufau loloto i se auala e mafai ona e faatatauina ai i a oe lava taumafaiga e salamo. Tusi i lau api talaaga o le suesueina o tusitusiga paia le ala o le a e faaaogaina ai lenei mataupu faavae.

Faitau le Mosaea 26:37–39 e iloa ai le mea na tupu a o faatino e Alema le fautuaga a le Alii. O le aafiaga o Alema ma lona nuu ua aoao mai ai, a o tatou salamo ma ola amiotonu, e mafai foi ona tatou maua le filemu ma le manuia.

7. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mosaea 26 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: