1 Ug ang tanang adlaw ni Enoch mga upat ka gatos ug katloan ka tuig.

2 Ug nahitabo nga si Metusela, ang anak ni Enoch, wala kuhaa, aron matuman ang mga pakigsaad sa Ginoo, nga gihimo niya ngadto ni Enoch; kay mipakigsaad siya sa pagkatinuod ngadto ni Enoch nga si Noe mahimong bunga sa iyang mga bat-ang.

3 Ug nahitabo nga si Metusela nanagna nga gikan sa iyang mga bat-ang motungha ang tanang gingharian sa yuta (pinaagi ni Noe), ug gihimaya niya ang iyang kaugalingon.

4 Ug dihay miabot nga usa ka dakong gutom sa yuta, ug gitunglo sa Ginoo ang yuta sa usa ka mapait nga tunglo, ug daghan sa lumulupyo niini ang namatay.

5 Ug nahitabo nga si Metusela nagpuyo sa yuta og usa ka gatos ug kawaloan ug pito ka tuig, ug nanganak ni Lamech;

6 Ug si Metusela nagpuyo sa yuta, human siya nanganak ni Lamech, mga pito ka gatos ug kawaloan ug duha ka tuig, ug nanganak og mga anak nga lalaki ug mga anak nga babaye;

7 Ug ang tanang adlaw ni Metusela mga siyam ka gatos ug kan-uman ug siyam ka tuig, ug namatay siya.

8 Ug si Lamech nagpuyo sa yuta og usa ka gatos ug kawaloan ug duha ka tuig, ug nanganak og usa ka lalaki,

9 Ug gitawag niya ang iyang ngalan og Noe, nga nag-ingon: Kini nga anak nga lalaki mohupay kanato kalabot sa atong buhat ug sa pag-ugmad sa atong mga kamot, tungod kay ang yuta gitunglo sa Ginoo.

10 Ug si Lamech nagpuyo sa yuta, human siya nanganak ni Noe, mga lima ka gatos ug kasiyaman ug lima katuig, ug nanganak og mga anak nga lalaki ug mga anak nga babaye;

11 Ug ang tanang adlaw ni Lamech mga pito ka gatos ug kapitoan ug pito ka tuig, ug namatay siya.

12 Ug nagpanuigon si Noe og upat ka gatos ug kalim-an ka tuig, ug nanganak ni Japet; ug human sa kap-atan ug duha ka tuig nanganak siya ni Shem gikan kaniya nga mao ang inahan ni Japet, ug sa dihang nagpanuigon siya og lima ka gatos ka tuig nanganak siya ni Ham.

13 Ug si Noe ug ang iyang mga anak mipatalinghog sa Ginoo, ug mituman, ug gitawag sila nga mga anak nga lalaki sa Dios.

14 Ug sa dihang misugod kini nga mga tawo sa pagdaghan sa ibabaw sa yuta, ug ang mga anak nga babaye natawo ngadto kanila, ang mga anak nga lalaki sa mga tawo nakakita nga kadtong mga anak nga babaye mga matahom, ug sila gihimo nila nga mga asawa, gani sumala sa ilang pagpili.

15 Ug gisultihan sa Ginoo si Noe: Ang mga anak nga babaye sa imong mga anak nga lalaki mibaligya sa ilang mga kaugalingon; kay tan-awa ang akong kasuko napukaw batok sa mga anak nga lalaki sa mga tawo, kay wala sila mopatalinghog sa akong tingog.

16 Ug nahitabo nga nanagna si Noe, ug mitudlo sa mga butang sa Dios, sama sa sinugdanan.

17 Ug ang Ginoo miingon ngadto ni Noe: Ang akong Espiritu dili kanunay moimpluwensya sa tawo, kay siya masayod nga ang tanang tawo mamatay; apan ang iyang mga adlaw mahimo nga usa ka gatosan ug kawhaan ka tuig; ug kon ang mga tawo dili maghinulsol, ipadala nako ang mga lunop diha kanila.

18 Ug niadtong mga adlawa dihay mga higante sa yuta, ug nagtinguha sila sa pagpatay ni Noe; apan nagauban ang Ginoo kang Noe, ug ang gahom sa Ginoo diha kaniya.

19 Ug giordinahan sa Ginoo si Noe subay sa iyang kaugalingong kapunongan, ug mimando kaniya sa paglakaw ug sa pagpahayag sa iyang Ebanghelyo ngadto sa katawhan, sumala sa gisugo ngadto ni Enoch.

20 Ug nahitabo nga gitawag ni Noe ang katawhan nga kinahanglan nga maghinulsol sila; apan wala sila maminaw sa iyang mga pulong;

21 Ug usab, human sila makapaminaw kaniya, miduol sila kaniya, nga nag-ingon: Tan-awa, kami mga anak nga lalaki sa Dios; wala ba kami makigminyo sa mga anak nga babaye sa mga tawo? Ug wala ba kami mokaon ug mag-inom, ug magminyoay ug gipaminyo? Ug ang among mga asawa naghatag kanamo og mga anak, ug kini sila gamhanan nga mga tawo, nga sama sa mga tawo sa karaan, mga tawo nga bantogan. Ug wala sila maminaw sa mga pulong ni Noe.

22 Ug nakita sa Dios nga ang pagkadaotan sa mga tawo misamot diha sa yuta; ug gibayaw ang matag tawo sa handurawan sa mga hunahuna sa iyang kasingkasing, nga sa kanunay daotan.

23 Ug nahitabo nga mipadayon si Noe sa iyang pagsangyaw ngadto sa katawhan, nga nag-ingon: Paminaw, ug patalinghog sa akong mga pulong;

24 Motuo ug maghinulsol sa inyong mga sala ug magpabunyag pinaagi sa ngalan ni Jesukristo, ang Anak sa Dios, gani sama sa atong mga amahan, ug kamo makadawat sa Espiritu Santo, aron makaangkon kamo sa tanang butang nga gipakita; ug kon dili ninyo kini buhaton, moabot ang mga lunop diha kaninyo; bisan pa niana wala sila maminaw.

25 Ug nakapabasol kini ni Noe, ug ang iyang kasingkasing nasakitan nga gibuhat sa Ginoo ang tawo diha sa yuta, ug nakapaguol kini sa iyang kasingkasing.

26 Ug misulti ang Ginoo: Laglagon nako ang tawo nga akong gilalang, gikan sa ibabaw sa yuta, ang tawo ug mga mananap, ug ang nagkamang nga mga butang, ug ang mga langgam sa kahanginan; kay kini nakapasubo ni Noe nga gilalang nako sila, ug nga gibuhat nako sila; ug mitawag siya kanako; kay nagtinguha sila sa iyang kinabuhi.

27 Ug sa ingon niana naangkon ni Noe ang pagsalig sa mga mata sa Ginoo; kay si Noe usa ka matarong nga tawo, ug hingpit diha sa iyang kaliwatan; ug naglakaw siya kauban sa Dios, ingon man usab ang iyang tulo ka anak nga lalaki, si Shem, Ham, ug si Japet.

28 Daotan ang yuta sa atubangan sa Dios, ug kini napuno sa kasamok.

29 Ug mitan-aw ang Dios sa yuta, ug, tan-awa, daotan kini, kay ang tanang tawo naghugaw-hugaw sa ilang agianan diha sa yuta.

30 Ug gisultihan sa Dios si Noe: Ang kataposan sa tanang tawo miabot sa akong atubangan, kay napuno sa kasamok ang yuta, ug tan-awa laglagon nako ang tanang tawo gikan sa yuta.