Tempol, Haos blong Lod

I minim stret haos blong Lod. Oltaem Lod i bin givim komanmen long ol pipol blong Hem blong bildim ol tempol, ol tabu bilding we, insaed long hem, ol Sent we oli klin inaf oli mekem ol tabu seremoni mo odinens blong gospel blong olgetawan, mo tu, blong olgeta we oli ded. Lod i visitim ol tempol blong Hem, mo oli ol ples blong wosip we oli moa tabu long ol narafala ples.

Tabenakol we Moses mo ol pikinini blong Isrel oli bin wokem, hem i wan tempol we oli save tekem i go olbaot. Ol Man Isrel oli bin yusum tabenakol ia long taem blong wokbaot blong olgeta i go aot long Ijip.

Tempol we oli save gud long hem bitim ol nara tempol we oli tokbaot insaed long OlTesteman, i tempol ia we Solomon i bildim long Jerusalem (2 Kron 2–5). Hem i lus evriwan long 587 B.K.B. we Ol Man Babilon oli prapa spolem gud, mo Serubabel i putumbak samples 70 yia afta (Esra 1–6). Pat blong tempol ia, oli bonemdaon long 37 B.K.B., mo Haeman ia, Herod, i bildim bakegen afta. Ol man Rom oli bin prapa spolem gud tempol ia long 70 A.K.B.

Long Buk blong Momon, olgeta stret mo gud man we oli stap folem God, God i bin stap lidim olgeta blong bildim mo wosip insaed long ol tempol (2 Nif 5:16; Mos 1:18; 3 Nif 11:1). Blong bildim mo yusum gud wan tempol, oli ol saen blong tru Jos long eni dispensesen, wetem tu, Jos we i kambak long taem blong yumi. Ketlan Tempol i fas tempol we oli bildim mo oli dediketem long Lod long dispensesen ia. Stat long taem ia, oli bin dediketem ol tempol long plante graon raon long wol.