Leta blong Pol, Ol

Pol i raetem ol leta ia i go long ol man long Tesalonaeka, taem hem i stap long Korin, long taem blong seken misinari wokbaot blong hem. Oli tokbaot wok blong hem long Tesalonaeka long Ol Wok 17. Hem i wantem gobak long Tesalonaeka, be hem i no bin save mekem (1 Tes 2:18). Taswe, hem i sendem Timoti i go toktok gud long ol konvet mo tekem toktok i go long saed blong olsem wanem nao oli stap mekem. Fas leta i risal blong tangkyu blong hem long taem we Timoti i kambak. Seken leta, hem i bin raetem i no longtaem afta.

Pol i raetem ol leta ia long ol man Korin long taem blong nambatri misinari wokbaot blong hem, blong ansarem ol kwestin mo blong stretem fasin blong wok olbaot we i bin stap long medel blong olgeta Sent long Korin.

Leta i go long Ol Man Galesia, ating hem i raetem i go long plante yunit blong Jos raon long Galesia. Sam memba blong Jos oli bin stap livim gospel blong stap folem loa blong Ol Man Jiu. Long leta ia, Pol i stap eksplenem stamba tingting blong loa blong Moses mo hamas nao i impoten blong gat wan relijin long saed blong spirit.

Pol i raetem leta i go long Ol Man Rom taem hem i stap long Korin, blong mekem ol Sent blong Rom blong oli rere blong kasem wan visit we bae hem i mekem long olgeta. Leta ia i blong talemaot tu bakegen ol doktrin we samfala man Jiu we oli jenisim laef i kam long Kristin laef oli bin stap askem.

Pol i raetem ol leta ia taem hem i bin stap long kalabus blong fas taem long Rom.

Pol i raetem leta i go long Ol Man Filipae blong talemaot tangkyu blong hem mo lav blong hem long ol Sent long Filipae mo blong leftemap tingting blong olgeta from oli harem nogud we hem i stap long kalabus longtaem.

Pol i raetem leta i go long Ol Man Kolosi afta we wan ripot i kamaot se ol Sent long Kolosi oli stap foldaon long bigfala mistek. Oli stap bilivim se fasin blong kam stret gud evriwan i kam taem oli stap obei fulwan long ol odinens we man i save luk nomo, be i no taem wan i stap traem blong kasem fasin olsem hemia blong Kraes.

Leta i go long Ol Man Efesas i impoten tumas, from se hem i tekem ol tijing blong Pol long saed blong Jos Ia blong Kraes.

Leta i go long Filimon i wan praevet leta abaot Onesimas, wan slef we i bin stilim masta blong hem, Filimon, mo i ronwe i go long Rom. Pol i sendem Onesimas i gobak long masta blong hem wetem leta ia we i askem Masta blong fogivim Onesimas.

Leta blong Pol i go long Ol Man Hibru, Pol i raetem i go long Ol Jiu we oli memba blong Jos, blong winim tingting blong olgeta se loa blong Moses i kamtru finis tru long Kraes, mo we gospel loa blong Kraes nao i tekem ples blong hem.

Pol i bin raetem ol leta ia afta we hem i kamaot long kalabus long Rom long fas taem.

Pol i bin go long Efesas, mo long ples ia hem i livim Timoti i stap blong hem i stopem sam defren kaen toktok, mo hem i gat tingting blong kambak. Hem i bin raetem fas leta i go long Timoti, ating taem hem i stap long Masedonia, blong givim kaonsel mo blong leftemap tingting blong hem blong mekem wok blong hem.

Pol i bin raetem leta i go long Taetas long wan taem we hem i bin aot long kalabus. Maet hem i visitim Krit, long ples we Taetas i stap wok long hem. Leta ia, plante taem i lukluk long saed blong fasin blong laef stret mo gud, mo i lukluk long saed blong disiplin insaed long Jos.

Pol i bin raetem seken leta blong hem long Timoti taem hem i go long kalabus long nambatu taem, i no longtaem bifo we hem i ded from bilif blong hem. Leta ia, i tekem ol las toktok blong Pol mo i soem bigfala paoa long tingting blong hem, mo i soem tras ia we hem i fesem ded wetem.