Pem Praes, Atonmen

Blong mekem man mo God, tufala i stap gud bakegen

Olsem we oli yusum long ol skripja, blong pem praes, hem i blong safa ful panismen from wan aksen we i wan sin; long wei ia, i tekem ol risal blong sin aot long hem we i mekem sin, mo i letem hem blong i stap gud bakegen wetem God. Jisas Kraes i wan man ia nomo we i gat paoa inaf blong mekem wan atonmen we i stret evriwan long bihaf blong evri man. Hem i bin save mekem hemia from se God i bin jusum Hem o i bin odenem Hem bifo long taem blong Bigfala Kaonsel bifo oli mekem wol ia (Ita 3:14; Moses 4:1–2; Ebr 3:27), mo tu, from Hem i Stret Pikinini blong God, mo laef blong Hem i no gat sin. Atonmen blong Hem, i tekem safaring from ol sin blong evri man, taem blad blong Hem i bin ron, ded blong Hem, mo afta, taem Hem i laef bakegen long ded mo i kamaot long gref (Aes 53:3–12; Luk 22:44; Mos 3:5–11; Alma 7:10–13; D&K 19:16–19). From Atonmen ia, evri pipol bae oli girap long ded wetem wan bodi we i nomo save ded (1 Kor 15:22). Atonmen i givim rod tu blong yumi kasem fogivnes from ol sin blong yumi, mo yumi laef blong oltaem wetem God. Be wan we i kasem yia we hem i naf blong ansa from ol aksen blong hem, mo i akseptem gospel ia, i save kasem ol blesing ia nomo sapos hem i gat bilif long Jisas Kraes, i sakem ol sin blong hem, i kasem ol odinens blong fasin blong sevem man, mo i obei long ol komanmen blong God. Olgeta we oli no kasem yia we oli kam inaf blong ansa from ol aksen blong olgeta, mo olgeta we oli no akseptem gospel, Atonmen i pemaot olgeta (Mos 15:24–25; Moro 8:22). Ol skripja oli tijim klia se sapos Kraes i no bin pemaot praes from ol sin blong yumi, bae i no gat wan loa, i no gat wan odinens, o wan sakrifaes we bae i inaf blong pemaot wanem jastis i askem, mo man bae i neva save gobak stap wetem God bakegen (2 Nif 2; 9).

Hemia i blad blong mi, we i ron blong tekemaot ol sin blong plante man, Mat 26:28.
Swet blong hem i stap folfoldaon long graon olsem blad nomo, Luk 22:39–44.
Kakae we bae mi givim i mit blong bodi blong mi we bae mi givim blong ol man long wol oli gat laef, Jon 6:51.
Mi nao mi stamba blong laef bakegen long ded. Mi nao mi stamba blong laef, Jon 11:25.
Kraes i prapa man blong sevem man; hem i save sevem olgeta we oli stap obei, Hib 5:9.
Yumi kam tabu tru long blad blong Kraes we i bin ron from yumi, Hib 9; 10:1–10.
Kraes tu, long wan taem, i bin safa from ol sin, 1 Pita 3:18.
Blad blong Jisas Kraes i klinim yumi long evri sin, 1 Jon 1:7.

Oli leftemap hem antap long kros mo oli kilimded hem from ol sin, 1 Nif 11:32–33.
Fasin blong pemaot man i kam long olgeta we oli gat wan hat we i fulap wetem sore mo wan spirit we i wantem blong sakem sin, 2 Nif 2:3–10, 25–27.
Hem i givim hemwan olsem wan sakrifaes blong pemaot sin, 2 Nif 2:7.
Atonmen i pemaot man long Foldaon, mo i sevem man long ded mo hel, 2 Nif 9:5–24.
I nid blong i gat wan atonmen we i no gat en, 2 Nif 9:7.
Stretem yu wetem God tru long atonmen blong Kraes, Jek 4:11.
Blad blong hem i pemaot ol sin blong olgeta we oli mekem sin be oli no save, Mos 3:11–18.
Man i kasem fasin blong sevem man tru long Atonmen, Mos 4:6–8.
Sapos i no Atonmen, bae oli mas lus nomo, Mos 13:27–32.
Bae Hem i pemaot praes from ol sin blong wol, Alma 34:8–16.
God hemwan i pemaot praes from ol sin blong wol, blong mekem plan blong sore i kamtru, Alma 42:11–30.
Mi God blong ful wol, we oli kilimded mi from ol sin blong wol, 3 Nif 11:14.