Haos blong Prea

Wan miting ples we oli yusum long saed blong relijin. Long taem blong Niu Testeman, ol fenija oli simpol nomo, mo i gat wan bokis we insaed i gat ol rol blong loa mo ol nara tabu raeting, wan pulpit blong rid, mo ol jea blong ol man we oli stap wosip.

I gat wan lokol kaonsel blong ol elda insaed long wanwan haos blong prea. Oli disaed hu nao bae i save joen mo hu i no save joen (Jon 9:22; 12:42). Ofisol man we i moa impoten, i man ia we i rul long haos blong prea (Mak 5:22; Luk 13:14). Plante taem, hem i wan man blong raet, we i mas lukaot long bilding, mo i lukluk long ol wok we oli stap. Wan man blong help bae i lukluk long ol wok blong klak (Luk 4:20).

I gat wan haos blong prea long evri taon we Ol Jiu oli stap long hem, tugeta long Palestaen mo ol narafala ples. Hemia i bin help bigwan blong serem gospel blong Jisas Kraes from se ol fas misinari blong Jos oli save toktok long ol haos blong prea (Wok 13:5, 14; 14:1; 17:1, 10; 18:4). Semfala praktis ia i stap long medel blong ol misinari insaed long Buk blong Momon (Alma 16:13; 21:4–5; 32:1), mo tu, long medel blong ol fas misinari long dispensesen ia (D&K 66:7; 68:1).