Ol Stadi Help
God, Godhed

God, Godhed

I gat trifala defren man insaed long Godhed: God, Papa we I No Save Finis; Pikinini blong Hem, Jisas Kraes; mo Tabu Spirit. Yumi biliv long wanwan long Olgeta Tri (TbB 1:1). Long lata-dei revelesen, yumi lanem we Papa mo Pikinini, Tufala i gat bodi blong mit mo bun we yumi save tajem, mo we Tabu Spirit i wan man long spirit, we i no gat mit mo bun (D&K 130:22–23). Olgeta trifala man ia oli wan long wan yuniti we i stret evriwan, oli wan long stamba tingting mo doktrin (Jon 17:21–23; 2 Nif 31:21; 3 Nif 11:27, 36).

God we i Papa

Plante taem, Papa, o Elohim nao we oli singaotem wetem taetol ia, God. Oli singaotem Hem Papa, from se Hem i papa blong spirit blong yumi (Nam 16:22; 27:16; Mal 2:10; Mat 6:9; Efes 4:6; Hib 12:9). God we i Papa i rula we i hae olgeta long yunives. Hem i gat olgeta paoa (Jen 18:14; Alma 26:35; D&K 19:1–3), i save evri samting (Mat 6:8; 2 Nif 2:24), mo i stap long evri ples tru long Spirit blong Hem (Sam 139:7–12; D&K 88:7–13, 41). Ol man i gat wan spesel rilesensip wetem God we i mekem se man i defren, i spesel evriwan long evri narafala samting we Hem i krietem: ol man mo ol woman oli ol spirit pikinini blong God (Sam 82:6; 1 Jon 3:1–3; D&K 20:17–18).

I gat samfala taem nomo we oli rekodem, abaot God we i Papa, we i kamaot, o i toktok long man. Ol skripja oli talem se Hem i bin toktok long Adam mo Iv (Moses 4:14–31) mo i soemaot Jisas Kraes long plante taem (Mat 3:17; 17:5; Jon 12:28–29; 3 Nif 11:3–7). Hem i kamaot long Steven (Wok 7:55–56) mo Josef Smit (JS—H 1:17). Afta, Hem i bin kamaot long tugeta, Josef Smit mo Sidni Rigdon (D&K 76:20, 23). Long olgeta we oli lavem God mo oli mekem olgeta oli kam klin long fored blong Hem, samtaem God i givim olgeta spesel janis ia blong luk mo save olgetawan se Hem, Hem i God (Mat 5:8; 3 Nif 12:8; D&K 76:116–118; 93:1).

God we i Pikinini

God we oli save olsem Jehova i Pikinini, Jisas Kraes (Aes 12:2; 43:11; 49:26; 1 Kor 10:1–4; 1 Tim 1:1; Rev 1:8; 2 Nif 22:2). Jisas i wok anda long daereksen blong Papa mo i wok wetem ful tingting wetem Papa. Evri defren kaen man oli ol brata mo ol sista blong Hem, from Hem nao i fasbon blong ol spirit pikinini blong Elohim. Sam skripja oli tokbaot Hem wetem toktok ia, God. Eksampol. Skripja i talem se: “God i mekem skae mo graon” (Jen 1:1); be Jisas nao i bin Krieta anda long daereksen blong God we i Papa (Jon 1:1–3, 10, 14; Hib 1:1–2).

God we i Tabu Spirit

Tabu Spirit i wan God tu, mo oli singaotem Tabu Spirit, Spirit ia, mo Spirit blong God wetem sam narafala nem mo taetol we oli semmak. Wetem help blong Tabu Spirit, man i save kam blong save tingting blong God we i Papa mo save se Jisas Hem i Kraes (1 Kor 12:3).