Mared, Maredem

Wan kavenan we i folem loa, o wan kontrak bitwin wan man mo wan woman se i mekem se tufala i kam hasban mo waef. God i odenem mared (D&K 49:15).

Kavenan blong mared we i niu mo i no gat en

Mared we oli mekem anda long loa blong gospel mo tabu prishud i blong laef long wol ia, mo tu, blong taem we i no save finis. Ol man mo ol woman we oli klin inaf oli sil olsem long tempol long wan mared, bae oli save gohed olsem hasban mo waef long taem we i no save finis.

Blong kasem digri blong selestial kingdom we i moa hae, wan man i mas mekem kavenan ia blong mared we i niu mo i no gat en, D&K 131:1–4.
Sapos wan man i maredem wan waef blong hem long wol, mo hem i no maredem hem tru long mi, nao kavenan mo mared blong tufala i nomo laef taem tufala i ded, D&K 132:15.
Sapos wan man i maredem wan waef tru long toktok blong mi, mo tru long kavenan we i niu mo i no gat en, mo Tabu Spirit blong promes i silim long tufala, bae mared ia i laef taem bae tufala i aot long wol ia, D&K 132:19.

Mared bitwin ol relijin

Mared bitwin wan man mo wan woman we tufala i gat ol defren bilif blong relijin mo praktis.

Bae yu no tekem wan gel Kenan blong i kam waef blong boe blong mi, Jen 24:3.
Sapos Jekob i tekem wan waef long ol gel blong laen blong Het, ating i moa gud mi mi ded nomo, Jen 27:46 (Jen 28:1–2).
Isrel bae i no mas maredem olgeta blong Kenan, Dut 7:3–4.
Isrel i bin maredem olgeta blong Kenan, i wosipim ol giaman god, mo i kasem trabol, Jaj 3:1–8.
Ol waef blong Solomon oli tanem hat blong hem blong hem i wosipim ol giaman god, 1 King 11:1–6.
Mifala i no wantem givim ol gel blong mifala long ol pipol long kantri ia, mo mifala i no wantem tekem ol gel blong olgeta blong maredem ol boe blong mifala, Neh 10:30.

Fulap Mared

Mared blong wan hasban i go long tu o moa long tu waef we tufala i stap laef. Hem i folem loa blong wan man blong gat wan waef nomo, nomo sapos Lod i givim oda se i save hapen long nara wei, hemia tru long revelesen (Jek 2:27–30). Tru long revelesen, oli bin praktisim fasin blong gat fulap mared long taem blong OlTesteman mo long stat blong Jos we i kambak tru long daereksen blong profet we i holem ol ki blong prishud (D&K 132:34–40, 45). Samting ia i nomo stap hapen insaed long Jos (OTK 1); tedei, blong gat moa bitim wan waef i no stret blong kam memba insaed long Jos Ia blong Jisas Kraes blong Ol Lata-dei Sent.