OlTesteman

Ol raeting blong ol profet blong bifo we oli mekem samting ia anda long paoa blong Tabu Spirit, mo afta plante senturi, oli testifae abaot Kraes mo fiuja seves blong Hem. Insaed i gat rekod blong histri blong Ebraham mo ol pikinini we oli kamaot long laen blong hem, stat long Ebraham, mo wetem kavenan, o testeman we Lod i bin mekem wetem Ebraham mo olgeta we bae oli kamaot long laen hem.

Ol faef fas buk blong OlTesteman, Moses nao i raetem. I gat Jenesis, Eksodas, Levitikas, Namba, mo Dutronome. Jenesis i tokbaot stat blong wol, blong man, blong ol lanwis, blong ol defren kaen man, mo stat blong haos blong Isrel.

Ol histri buk ia oli tokbaot ol samting we oli bin hapen long Isrel. Ol buk ia i gat Josua, Jaj, Rut, 1 mo 2 Samuel, 1 mo 2 King, 1 mo 2 Kronikel, Esra, Nehemaea, mo Esta.

Ol buk wetem ol poem oli rekodem sam long ol waes tingting mo toktok blong ol profet. I gat Job, Ol Sam, Ol Proveb, Prija, Singsing blong Solomon, mo Ol Krae.

Ol profet oli givim woning long Isrel abaot ol sin blong hem, mo oli testifae abaot ol blesing we oli kam long fasin blong stap obei. Oli bin profesae abaot kaming blong Kraes, we bae i pemaot praes from ol sin blong olgeta we oli sakem sin, kasem ol odinens, mo laef folem gospel. Ol buk blong ol profet oli Aesea, Jeremaea, Esikel, Daniel, Hosea, Joel, Amos, Obadaea, Jona, Maeka, Neham, Habukuk, Sefanaea, Hagae, Sekaraea, mo Malakaea.

Plante long ol buk blong OlTesteman oli bin raetem long lanwis blong Hibru. Samfala raeting nomo oli raetem long wan lanwis we i kolosap long lanwis blong Aremia.