Seksen 99
Revelesen i go long Profet Joseph Smith long John Murdock, 29 Ogas, 1832, long Hiram, Ohio. Winim wanpela yia samting, John Murdock i bin wok long autim toktok bilong gospel taim ol pikinini bilong em—nogat mama bilong ol bihain long dai bilong meri bilong em, Julia Clapp, long Epril 1831—ol i bin wok long stap wantaim ol narapela famili long Ohio.
1–8, Bikpela i singautim John Murdock long tokaut long gospel, na ol dispela lain husat i kisim em i kisim Bikpela na bai i kisim marimari.
1 Lukim, olsem Bikpela i tok long wokman bilong mi John Murdock—Bikpela i singautim yu long go long ol kantri long is haus i go long narapela haus, long ples i go long narapela ples, na long siti i go long narapela siti, long tokaut long oltaim oltaim gospel long ol lain husat i stap long hap, namel long taim bilong hevi na pasin nogut.
2 Na husat i kisim yu i kisim mi; na yu bai gat pawa long tokaut long tok bilong mi wantaim soim klia bilong Holi Spirit bilong mi.
3 Na husat i kisim yu olsem wanpela liklik pikinini, i kisim kingdom bilong mi; na blesim ol, long wanem ol bai kisim marimari.
4 Na husat i no laik long kisim yu bai Papa bilong mi na haus bilong em bai no laik long kisim em; na yu bai klinim lek bilong yu long ol hait ples arere long rot olsem wanpela testimoni agensim ol.
5 Na lukim, na lukim gen, mi kam kwiktaim long jasmen, long soim olgeta ol nogut pasin bilong ol, ol i bin mekim agensim mi, olsem ol profet i bin raitim long mi long hap bilong dispela buk.
6 Na nau, tru mi tokim yu, olsem em i no gutpela long mi olsem yu i mas go bipo long yu lukautim ol pikinini bilong yu, na salim ol wantaim pasin bilong laikim i go long bisop bilong Zion.
7 Na bihain long sampela yia, sapos yu laikim long mi, yu inap tu long go antap long dispela gutpela graun, na kisim hap graun bilong yu;
8 Sapos nogat yu mas go het yet long tokaut long gospel bilong mi inap yu dai. Amen.