Seksen 96
Revelesen i go long Profet Joseph Smith, soim oda bilong dispela siti o stek bilong Zion long Kirtland, Ohio, 4Â Jun, 1833, olsem wanpela eksampol i go long ol Seint long Kirtland. Long dispela taim i bin wanpela konferens bilong ol hai pris, na bikpela toktok bilong ol em long tilim ol sampela hap graun, Sios i bin kisim klostu long Kirtland, ol i kolim olsem French fam. Bikos dispela konferens i no bin inap long wanbel husat bai mas lukautim dispela fam, olgeta bin wanbel long askim Bikpela long dispela samting.
1, Dispela Kirtland Stek bilong Zion ol memba bilong Sios i mas mekim kamap strong; 2–5, Bisop i bai tilim ol dispela samting bilong ol Seint; 6–9, John Johnson i mas kamap wanpela memba bilong dispela united oda.
1 Lukim, mi tokim yupela, dispela em i gutpela save, we yupela inap long save long wokim samting long dispela samting, long wanem em i gutpela long mi olsem dispela stek em mi bin putim long strong bilong Zion ol Sios memba i mas mekim strong.
2 Olsem na, larim wokman bilong mi Newel K. Whitney bai bosim dispela ples em mi bin givim long yupela, antap long dispela we mi tingim long mekim holi haus bilong mi.
3 Na gen, larim yupela brukim i go long ol blok, wantaim gutpela save, long gutpela bilong ol dispela lain husat i wok long painim hap graun na samting, olsem bai yupela stretim insait long kaunsil namel long yupela.
4 Olsem na, harim gut olsem yupela bai wokim dispela samting, na dispela hap samting i gutpela bilong oda bilong mi, long kisim tok bilong mi i go long ol lain pikinini bilong ol man.
5 Long wanem lukim, tru mi tokim yupela, dispela em i gutpela tru long mi, olsem tok bilong mi i mas go long ol pikinini bilong ol man, bilong kolim bel bilong ol lain pikinini bilong ol man long gutpela bilong yupela. Em tasol. Amen.
6 Na gen, tru mi tokim yupela, em i gutpela save na gutpela long mi, olsem wokman bilong mi John Johnson husat ofa bilong em mi kisim pinis, na husat beten bilong em mi harim pinis, long husat mi givim wanpela promis bilong laip oltaim oltaim inap olsem em i holimpas ol komanmen bilong mi long nau an i go bihain—
7 Long wanem em i tumbuna pikinini bilong Joseph na i wanpela tu husat bai kisim blesing bilong dispela promis i go long ol papa bilong em—
8 Tru mi tokim yupela, em i gutpela long mi olsem em i mas kamap wanpela memba bilong dispela oda, olsem em inap long halivim long bringim tok bilong mi i go long ol lain pikinini bilong ol man.
9 Olsem na yupela mas odenim em long dispela blesing, na em mas painim wantaim olgeta strong long rausim i go ol dinau we i stap antap long dispela haus mi givim long yupela, olsem em inap stap insait long en. Em tasol. Amen.