Seksen 134
Dispela seksen em i toktok long wanpela tokaut bilong bilip long ol samting bilong ol gavman na long olgeta lo, we olgeta lain i bin wanbel long ol dispela lo wantaim wanpela vot long wanpela jenerol bung bilong Sios ol i bin holim long Kirtland, Ohio, 17 Ogas, 1835. Planti ol Seint i bin bung wantaim long lukluk long ol dispela samting ol i bin tok long putim i go insait long dispela nambawan edisen bilong Doktrin na ol Kavanen. Long dispela taim, ol sios lida i bin givim dispela tokaut long dispela het tok: “Olsem bilip bilong mipela long ol gavman bilong dispela ples graun na long olgeta lo, bai ol narapela lain i no inap long kisim rong tingting o i no inap long kisim krangi tingting, mipela i tingting olsem em i stret long givim, long pinis bilong hap bilong dispela buk, em tingting bilong mipela long dispela samting.”
1–4, Ol gavman i mas lukautim fridom bilong wanwan manmeri long wokim samting long tingting na bilip bilong em yet, na hau em i laik lotu; 5–8, Olgeta manmeri i mas sapotim ol gavman bilong ol na givim rispek na pasin bilong bihainim ol dispela lo; 9–10, Ol lotu sosaiti i mas noken wokim wok bilong lo bilong graun; 11–12, Ol manmeri i gat rait long lukautim ol yet na ol samting bilong ol.
1 Mipela i bilip olsem God i bin kamapim ol gavman bilong gutpela bilong man; na olsem God i mekim ol man risponsibol long ol pasin bilong ol long ol gavman, long mekim ol lo na tu long mekim ol lo na long lukautim ol, bilong gutpela na sefti bilong sosaiti.
2 Mipela i bilip olsem nogat gavman inap long stap long bel isi, inap tasol ol i kamapim ol dispela kain lo na lukautim ol na nogat man bai brukim, olsem bai ol wanwan manmeri inap long gat fridom long wokim ol samting long tingting na bilip bilong ol yet, gat privilis na kontrol long ol samting bilong ol, na lukautim gut laip.
3 Mipela i bilip olsem olgeta gavman i mas gat nid long ol sivil ofisa na ol mejistret long mekim ol manmeri long bihainim ol lo bilong ol; na olsem ol dispela husat bai bosim dispela lo long pasin i stret na ol i mas lukluk long jastis na sapot i mas kam long vot bilong ol pipol sapos dispela em i wanpela ripablik, o long laik bilong king.
4 Mipela i bilip olsem lotu em God yet i bin kamapim; na olsem man i bai givim olgeta bekim long em, na long em tasol, long wok bilong en, inap olsem tasol ol bilip bilong lotu bilong ol i no mekim ol long burukim ol rait na fridom bilong ol narapela lain; tasol mipela i no bilip olsem lo bilong ol manmeri i gat rait long putim ol yet i go insait long tokim ol lain hau ol i mas lotu long pasim ol tingting na bilip bilong ol manmeri, o long tokim ol hau long beten long ples klia na long hait; olsem ol sivil mejistret i mas kontrolim pasin bilong brukim lo, tasol noken tru kontrolim tingting na bilip; i mas kalabusim asua bilong ol manmeri, tasol noken tru rausim fridom bilong sol.
5 Mipela i bilip olsem ol manmeri i gat risponsibiliti long sapotim na holimpas ol wanwan gavman insait long we ol i stap, taim ol i stap banis aninit long ol lo bilong ol dispela gavman, em ol rait bilong ol, ol i bin bon wantaim na nogat man i bai rausim long ol; na olsem pasin bilong statim ol krospait na pasin bilong agensim gavman i no stret olsem na olgeta sitisen i banis stap, na ol dispela lain i mas kisim mekim save long asua bilong ol; na olsem olgeta gavman i gat rait long putim ol dispela kain lo olsem long jasmen bilong ol yet i gutpela stret long wokim samting long mekim sua wanem samting i gutpela moa bilong ol pablik; long wankain taim, tasol, holimpas long ol fridom bilong tingting na bilip olsem i holi samting.
6 Mipela i bilip olsem olgeta wanwan man i mas kisim ona long wok bilong em olsem ol hetman na ol mejistretl, long wanem ol i stap long lukautim ol manmeri husat i stap stret na long mekim save bilong ol husat i mekim rong; na olsem olgeta manmeri i mas givim rispek na pasin bilong bihainim ol dispela lo, bikos sapos i nogat ol dispela lo, pasin bilong brukim lo na pasin bilong mekim man poret, bai kisim ples bilong bel isi na gutpela sindaun; ol i bin kamapim ol lo bilong man long wanpela as stret em long kontrolim ol wari bilong yumi olsem ol wanwan manmeri na ol nesen, namel long wanpela man na narapela man; na ol lo bilong God i kam long heven, i kamapim ol rul long ol spirit samting, bilong feit na lotu, tupela wantaim bai man i mas givim bekim i go long Man husat i mekim em.
7 Mipela i bilip olsem ol hetman, ol nesen, na ol gavman i gat rait, na i gat risponsibiliti long putim ol dispela lo long lukautim olgeta sitisen long laik bilong ol yet long bihainim lotu bilip bilong ol; tasol mipela i no bilip olsem ol i gat rait we i stret long pasim ol sitisen long dispela privilis, o long tabuim ol long tingting bilong ol, inap olsem ol i soim luksave na rispek long ol lo na ol dispela kain save bilong lotu i no sapotim pasin bilong bikhet long gavman na ol plen nogut.
8 Mipela i bilip olsem pasin bilong brukim lo i mas kisim mekim save long en long wanem kain rong wanpela i mekim; olsem pasin bilong kilim man, pasin bilong birua long gavman, pasin bilong stil, na pasin bilong bagarapim sindaun isi bilong olgeta, long olgeta wei, i mas kisim mekim save long wanem kain pasin bilong brukim lo ol i mekim na kisim mekim save bilong ol long laik bilong ol long mekim pasin nogut long ol man, aninit long ol lo bilong dispela gavman we dispela rong i bin kamap; na bilong pis na gutpela sindaun bilong olgeta lain, olgeta man i mas putim lek i go pas na yusim save bilong ol long bringim ol man husat i brukim ol gutpela lo i kisim long mekim save bilong ol.
9 Mipela i no bilip long miksim pawa bilong lotu wantaim sivil gavman, we bai yumi apim wanpela lotu sosaiti na tambuim narapela long ol privilis bilong ol lotu samting bilong ol, na ol wanwan rait bilong ol memba bilong ol, olsem ol sitisen, na tok nogat long ol.
10 Mipela i bilip olsem olgeta lotu sosaiti i gat rait long lukluk long ol memba bilong ol long ol husat i wokabaut long pasin i no stret, olsem long ol rul na lo bilong ol dispela kain sosaiti; inap olsem ol dispela kain wok i bilong ol memba na bilong gutpela sindaun bilong ol; tasol mipela i no bilip olsem wanpela lotu sosaiti i gat atoriti long kotim man long rait bilong em long ol samting na long laip bilong em; long rausim ol dispela samting bilong ol, o long putim laip o bodi bilong ol long bagarap, o long bringim wanpela mekim save bilong bodi antap long ol. Ol i ken rausim ol tasol long sosaiti bilong ol na pinisim ol olsem memba bilong sosaiti.
11 Mipela i bilip olsem man i mas askim na painim save long sivil lo long lukluk gen long olgeta rong na ol hevi, we rong i kamap long wanpela, o rait long samting o gutnem bilong ol i bagarap, we ol dispela kain lo i stap long lukautim ol dispela kain samting; tasol mipela bilip olsem olgeta man i gat rait long lukautim ol yet, ol poroman bilong ol, na ol samting bilong ol, na gavman, long ol dispela birua i agensim lo na pasin bilong brukim rait bilong olgeta manmeri long ol taim bilong birua stret, we askim na painim save long ol lo, bai no inap long kamap kwik taim na halivim bai no inap long kam kwiktaim.
12 Mipela i bilip em i stret long autim toktok long gospel long olgeta nesen bilong dispela ples graun, na tok lukaut long ol lain husat i stap wantaim stretpela pasin long seivim ol yet long korapsen bilong dispela wol; tasol mipela no bilip em i stret long putim miepla yet go insait wantaim ol wokman husat i wok na no kisim pe, na tu long tokaut long gospel long ol, o baptaisim ol agensim plen na laik bilong ol masta bilong ol, o long toktok wantaim na grisim ol long liklik wei stret long i no hamamas long stap bilong ol long dispela laip, olsem na bringim birua i kam long laip bilong ol manmeri; dispela kain pasin long go insait long bisnis bilong narapela mipela bilip olsem em i agensim lo na i no stret, na i ken bringim birua long bel isi bilong olgeta wanwan gavman long larim ol manmeri long stap aninit long pasin bilong sleiveri.