Seksen 87
Revelesen na profesi long pait, i go long Profet Joseph Smith, long o klostu long Kirtland, Ohio, 25 Disemba, 1832. Long dispela taim ol tokpait long United States long pasin mangi-masta na pasin bilong ol lain long South Carolina long i no peim ol takis bilong bikpela gavman i bin planti tru. Histori bilong Joseph Smith i tok olsem “ol lukluk bilong ol trabel namel long ol nesen” i wok long kamap o “soim moa” long Profet “planti moa long taim Sios i bin statim raun bilong em kamaut long ples i nogat man.”
1–4, Tokaut bilong pait namel long ol Stet long not na ol Stet long saut; 5–8, Bikpela taim nogut bai pundaum antap long ol lain bilong dispela ples graun.
1 Tru, olsem Bikpela i tok long dispela ol pait em bai kamap klostu, stat long pait bilong Saut Carolina, na dispela pait bai i go inap i pinis wantaim dai na planti lain bai sori;
2 Na dispela taim bai kam taim pait bai kapsait i go aut antap long olgeta nesen, statim long dispela ples.
3 Long wanem lukim, dispela ol Stet long saut bai bruk long ol Stet long not, na dispela ol Stet long saut bai singautim ol narapela nesen, na tu dispela nesen bilong Great Britain, olsem ol i save kolim, na ol bai singautim tu ol narapela nesen, olsem bai ol i sambai long ol yet agensim ol narapela nesen; na olsem pait bai kapsait i go aut long olgeta nesen.
4 Na em bai kamap olsem, bihain long planti de, ol mangi-masta bai kirap agensim ol master bilong ol, husat gavman bai bungim na skulim ol long pait.
5 Na em bai kamap olsem tu ol lain husat bai stap bihain long graun bai bungim ol yet, na bai belhat nogut tru, na bai givim hevi long ol Jentail wantaim wanpela bikpela hevi.
6 Na bikos long dispela, wantaim dispela pait na long kapsait bilong blut, ol lain bilong dispela ples graun bai soim sori; na wantaim taim nogut, na bikpela sik, na guria, na klaut pairap bilong heven, na laitning i strong tru na tu olsem paia, bai olgeta lain bilong dispela ples graun bai pilim dispela belhat, na bel nogut i gat paia, na han bilong korosim man bilong God I Gat Olgeta Strong, inap dispela bagarap God i bin makim i pinisim tru olgeta nesen;
7 Olsem dispela krai bilong ol seint, na bilong blut bilong ol seint, i kamaut long graun bai pinis long kam long yau bilong Bikpela bilong Sabaoth, long pebek long ol birua bilong ol.
8 Olsem na, yupela mas sanap long ol ples holi, na no inap surik, inap dispela de bilong Bikpela i kam; long wanem lukim, em bai kam kwiktaim, Bikpela i tok. Amen.