Seksen 91
Revelesen i go long Profet Joseph Smith, long Kirtland, Ohio, 9Â Mas, 1833. Long dispela taim Profet i bin wok long tanim tok long Olpela Testamen. Taim em i kamap long hap bilong ol rait bilong bipo stret ol i kolim Apokrifa, em i bin askim Bikpela na bin kisim dispela toksave.
1–3, Planti tanim tok bilong Apokrifa i stret tasol i gat planti narakain tok long ol han bilong ol man we em i no tru; 4–6, Em i gutpela bilong ol dispela lain husat i kisim lait long Spirit.
1 Tru, olsem Bikpela i tokim yupela long dispela Apokrifa—I gat planti samting i stap insait we em i tru, na planti ol i tanim tok long en stret;
2 I gat planti samting i stap insait we em i no tru, dispela em ol narakain tok long ol han bilong ol man.
3 Tru, mi tokim yu, olsem i nogat nid long tanim tok bilong dispela Apokrifa.
4 Olsem na, husat bai ridim dispela, larim em bai save gut, long wanem Spirit bai soim aut toktru;
5 Na husat i kisim lait long Spirit bai kisim gutpela save long dispela;
6 Na husat bai no inap long kisim long Spirit, i no inap long kisim gutpela long en. Olsem na em i no nid olsem yu bai tanim tok long dispela. Amen.