1 Tru mi tokim yupela ol poroman bilong mi, mi toktok long yupela wantaim nek bilong mi, em dispela nek bilong Spirit bilong mi, olsem mi inap long soim long yupela laik bilong mi long ol brata bilong yupela long Zion, planti long ol husat i gat daun pasin na wantaim olgeta strong painim wei long lainim gutpela save na long painim toktru.

2 Tru, tru mi tokim yupela, blesing i go long ol dispela lain, long wanem ol bai kisim; long wanem mi, Bikpela, soim marimari long ol dispela lain i gat daunpasin, na antap long olgeta husat mi bai laik long soim, olsem mi bai inap long kisim pe taim mi bai bringim ol long jasmen.

3 Lukim, mi tokim yupela, long dispela skul long Zion, mi, Bikpela, mi hamamas tru olsem i mas gat wanpela skul long Zion, na tu wantaim wokman bilong mi Parley P. Pratt, long wanem em i bihainim mi gut.

4 Na inap olsem em i go het yet long bihainim mi em bai go het long bosim dispela skul insait long Zion inap mi givim long em ol narapela komanmen.

5 Na mi bai blesim em wantaim planti blesing tru, long tok klia gut long ol skripsa na ol trupela samting bilong God dispela i hait yet long skul long strongim bilip bilong ol long dispela skul, na long sios long Zion.

6 Na long ol narapela lain long dispela skul, mi, Bikpela, mi gat laik long soim marimari; tasol, i gat ol dispela lain husat Mi mas givim ol mekim save, na ol wok bilong ol Bikpela bai soim aut.

7 Silipim dispela akis long rop daunbilo bilong ol diwai; na olgeta wanwan diwai dispela i no bringim kamaut gutpela prut Bikpela bai katim daun na tromoim i go insait long paia. Mi, Bikpela, i bin tok pinis long en.

8 Tru, mi tokim yupela, olgeta namel long ol husat i save bel bilong ol i trupela, na i bruk, na ol i gat spirit bilong sori pasin, na ol i gat laik long luksave long ol kavanen bilong ol wantaim sakripais—tru, olgeta wanwan sakripais em mi, Bikpela, bai tok strong long en—mi hamamas long ol.

9 Long wanem mi, Bikpela, bai mekim ol long bringim kamaut olsem wanpela diwai is gat planti gris dispela ol i planim long wanpela gutpela graun tru, klostu long wanpela klinpela wara tru, dispela i karim planti gutpela prut stret.

10 Tru mi tokim yupela, olsem em i laik bilong mi olsem ol memba bilong sios mas mekim wanpela haus long mi long Zion, olsem long dispela eksampol em mi bin givim yupela.

11 Tru, larim yupela bai mekim dispela kwiktaim tru, wantaim taiting bilong ol pipol bilong mi.

12 Lukim, dispela em taiting na sakripais em mi, Bikpela, askim long ol han bilong ol, olsem bai i gat wanpela haus ol i mekim long mi bilong salvesen bilong Saion—

13 Olsem wanpela ples bilong olgeta seint long givim tenkyu, na bilong wanpela ples bilong skul bilong olgeta lain husat mi singautim ol long dispela wok bilong dispela ministri long olgeta wanwan wok na opis bilong ol;

14 Olsem ol bai inap long kamap stretpela moa long dispela save bilong ministri bilong ol, long wei bilong wokim samting, long toktru na long doktrin, long olgeta samting dispela i toktok long kingdom bilong God antap long dispela ples graun, ol dispela ki bilong dispela kingdom Bikpela i bin givim yupela.

15 Na inap olsem ol pipol bilong mi i mekim wanpela haus long mi long nem bilong Bikpela, na i no larim wanpela samting i no klin long kam insait long en, olsem bai em i no inap doti, glori bilong mi bai malolo antap long en;

16 Tru, na mi bai stap long hap, long wanem mi bai kam insait long en, na olgeta husat i piua long bel husat bai i kam insait long en bai lukim God.

17 Tasol sapos dispela i doti mi bai no inap long kam insait long en, na glori bilong mi bai no inap long stap long en; long wanem mi no inap long kam insait long ol temple i no holi.

18 Na, nau, lukim, sapos Zion wokim ol dispela samting em bai kamap gutpela, na go bikpela na pulap long glori, strongpela moa yet, na kamap nogut tru long ol birua blong en .

19 Na ol dispela nesen bilong dispela ples graun bai onaim em, na bai tok: Tru Zion em i siti bilong God bilong yumi, na tru Zion i no inap long pundaun, na tu no inap long surik long ples bilong en, long wanem God i stap long hap, na han bilong Bikpela i stap long hap;

20 Na em i wokim strongpela promis long pawa bilong strong bilong em long kamap salvesen bilong em na tawa bilong em we i antap tru.

21 Olsem na, tru, olsem Bikpela i tok, larim Saion i hamamas, long wanem dispela em Saion—dispela piua long bel; olsem na, larim Saion i hamamas, taim olgeta lain nogut bai sori.

22 Long wanem lukim, na lukim gen, pe bekbai kam kwiktaim antap long ol man nogut olsem dispela raunwin; na husat bai ronowe long en?

23 Mekim save bilong Bikpela bai kamap antap long ol pipol long nait na long de, na dispela stori long en bai givim hevi long olgeta pipol; tru, dispela bai no inap long stop inap Bikpela i kam;

24 Long wanem dispela kros bilong Bikpela i kirap agensim ol pasin nogut na ol nogut wok bilong ol.

25 Tasol, Saion bai abrusim sapos em i luksave long wokim ol wanem samting mi bin tok strong long em.

26 Tasol sapos em i no luksave long wokim wanem samting mi bin tok strong long em, bai mi kam long em olsem long olgeta wok bilong em, wantaim hevi nogut tru, wantaim sik nogut, wantaim bikpela sik, wantaim pait, wantaim pe nogut, wantaim paia bilong kukim olgeta.

27 Tasol, larim mi ridim dispela long wanpela taim long yau bilong em, olsem mi, Bikpela, i kisim pinis ofa bilong em; na sapos em i no sin gen nogat wanpela long ol dispela samting bai kam antap long em;

28 Na mi bai blesim em wantaim ol blesing, na kapsaitim planti blesing tru antap long em, na antap long ol tumbuna pikinini bilong em long oltaim na oltaim, Bikpela God bilong yupela i tok. Amen.